1256.
Une fois avint que le roi chevauchoit parmi Paris; si oï et entendi un
homme qui jura trop villainement de Dieu: si en fu le roy moult
courroucié en son cuer et commanda que il feust pris, et le fist
signer d'un fer bien chaut et ardant parmi la lèvre de sa bouche, pour
ce que il eust perdurable mémoire de son péchié et que les autres
doubtassent à jurer villainement de leur créateur. Moult de gens
murmurèrent contre le roy pour ce que cil estoit si laidement signé.
Le roy, qui bien entendit leur murmurement, ne s'en esmut de rien
contre eux, ainsois fu remembrant de l'Escripture, qui dit: «Sire
Dieu, il te maudiront et tu les béniras.» Si dist une parole qui bien
fu escoutée: «Je voudroie estre ainsi signé et en telle manière comme
celluy est, et jamais villain serement ne feust juré en mon royaume.»
La sepmaine emprès que cil fu signé le roy donna aux povres femmes
lingières qui vendent viez peufres[260] et viez chemises, et aux
povres ferrons qui ne pevent avoir maisons la place d'entour les murs
des Innocents pour Dieu et en aumosne. Si en fu moult bénéi du
peuple[261].
[260] Vieilles fripperies.
[261] De là sans doute l'origine du nom des rues de la _Grande
Fripperie et de la Ferronnerie_. (_Note de M. Paulin Pâris._)
_Les Grands Chroniques de Saint Denis_, publiées et annotées par
M. Paulin Pâris.