1186.
Après ce que le roy fu retourné en la cité de Paris, il séjourna ne
sçai quans jours. Une heure alloit par son palais pensant à ses
besongnes, comme celluy qui estoit curieux de son royaume maintenir et
amender. Il s'appuya à une des fenestres de la sale à la quelle il
s'appuyoit aucune fois pour Saine regarder et pour avoir récréacion de
l'air: si avint en ce point que charrettes que l'en charioit parmi les
rues esmeurent et touillèrent si la boue et l'ordure dont elles
estoient plaines que une pueur en yssi si grant qu'à paine la povoit
nul souffrir; si monta jusques à la fenestre où le roy estoit appuié.
Quant il senti celle pueur qui estoit si corrompue, il s'en tourna de
celle fenestre en grant abominacion de cuer.
Pour celle raison conçut-il en son courage à faire une euvre grant et
somptueuse, mais moult nécessaire, et telle que tous ses devanciers ne
l'osèrent oncques emprendre né commencier, pour les grans cousts qui à
celle euvre aferoient. Lors fist mander le prévost et les bourgeois de
Paris, et leur commanda que toutes les rues et les voies de la cité
feussent pavées de grés gros et fors, soigneusement et bien. Pour ce
le fist le roy qu'il vouloit oster la matière du nom de la cité
qu'elle avoit eu anciennement de ceux qui la fondèrent; car elle fu
appelée en ce temps par son premier nom Lutesce, qui vaut autant à
dire comme ville plaine de boue et boueuse. Et pour ce que les
habitans qui en ce temps estoient avoient horreur du nom, qui estoit
lais, luy changièrent ce nom et l'appellèrent ville de Paris, en
l'honneur de Paris l'ainsné fils le roy Priant de Troye; car, si
comme l'en treuve, il estoient descendus de celle lignée. Il ostèrent
le nom tant seulement, mais le bon roy osta la cause et la matière du
nom, quant il la fist atourner si que pueur né corruption n'y péust
demourer.
_Les Grandes Chroniques de Saint-Denis_, éditées par M. Paulin
Paris.