_De l'ost de France qui s'en vint sans riens faire._
Adecertes, en celui an, au moys de septembre ensement, de rechief après
le rebellement quatre fois du conte de Flandres Robert de Béthune, et
les Flamens qui les convenances de paix avec le roy de France et de
leur seaux scellées et accordées en nulle manière ne vouloient tenir,
si comme nous avons dit ci devant; Phelippe-le-Biau roy de France, Loys
son ainsné fils, roy de Navarre, et ses deux autres fils Phelippe conte
de Poitiers, et Charles conte de la Marche, avec eux Charles conte de
Valois et Loys son frère conte de Evreux, Gui conte de Saint-Pol, et
Enguerran de Marigni, un ost très grant à pié et à cheval, à noble
compaingnie, en Flandres destina et envoia. Et lors jusques à Lille
à tout leur noble ost parvindrent, qui toute Flandres peust avoir
conquis et occis, s'il fust à droit gouverné. Et comme ilec fussent
proposans et ordenans Flandres et les Flamens assaillir, par le conseil
de Enguerran coadjuteur et gouverneur du royaume de France et du roy
Phelippe avec, et du conte de Nevers fils au conte de Flandres, par
le fait du dit Enguerran, environnés et tenus sans rien faire furent
déboutés à revenir sans honneur en France.