82.
Now is the knight gone on his way;
This game hym thought full gode;
Whanne he loked on Bernësdale
He blessyd Robyn Hode.
83.
And whanne he thought on Bernysdale,
On Scarlok, Much and Johnn
He blyssyd them for the best company
That ever he in come.
84.
Then spake that gentyll knyght,
To Lytel Johan gan he saye,
'To-morrowe I must to Yorke toune,
To Saynt Mary abbay.
85.
'And to the abbot of that place
Foure hondred pounde I must pay;
And but I be there upon this nyght
My londe is lost for ay.'
86.
The abbot sayd to his covent,
There he stode on grounde,
'This day twelfe moneth came there a knyght
And borowed foure hondred pounde.
87.
['He borowed four hondred pounde]
Upon all his londë fre;
But he come this ylkë day
Disherited shall he be.'
88.
'It is full erely,' sayd the pryoure,
The day is not yet ferre gone;
I had lever to pay an hondred pounde,
And lay downe anone.
89.
'The knyght is ferre beyonde the see,
In Englonde is his ryght,
And suffreth honger and colde
And many a sory nyght.
90.
'It were grete pytë,' said the pryoure,
'So to have his londe;
And ye be so lyght of your consyence,
Ye do to hym moch wronge.'
91.
'Thou arte ever in my berde,' sayd the abbot,
'By God and Saynt Rycharde';
With that cam in a fat-heded monke,
The heygh selerer.
92.
'He is dede or hanged,' sayd the monke,
'By God that bought me dere,
And we shall have to spende in this place
Foure hondred pounde by yere.'
93.
The abbot and the hy selerer
Stertë forthe full bolde,
The highe justyce of Englonde
The abbot there dyde holde.
94.
The hye justyce and many mo
Had take in to theyr honde
Holy all the knyghtës det,
To put that knyght to wronge.
95.
They demed the knyght wonder sore,
The abbot and his meynë:
'But he come this ylkë day
Dysheryte shall he be.'
96.
'He wyll not come yet,' sayd the justyce,
'I dare well undertake';
But in sorowe tymë for them all
The knight came to the gate.
97.
Than bespake that gentyll knyght
Untyll his meynë:
'Now put on your symple wedes
That ye brought fro the see.'
98.
[They put on their symple wedes,]
They came to the gates anone;
The porter was redy hymselfe
And welcomed them everychone.
99.
'Welcome, syr knyght,' sayd the porter,
'My lorde to mete is he,
And so is many a gentyll man,
For the love of thee.'
100.
The porter swore a full grete othe:
'By God that madë me,
Here be the best coresed hors
That ever yet sawe I me.
101.
'Lede them in to the stable,' he sayd,
'That eased myght they be';
'They shall not come therin,' sayd the knyght,
'By God that dyed on a tre.'
102.
Lordës were to mete isette
In that abbotes hall;
The knyght went forth and kneled down,
And salved them grete and small.
103.
'Do gladly, syr abbot,' sayd the knyght,
'I am come to holde my day.'
The fyrst word that the abbot spake,
'Hast thou brought my pay?'
104.
'Not one peny,' sayd the knyght,
'By God that makëd me.'
'Thou art a shrewed dettour,' sayd the abbot;
'Syr justyce, drynke to me.
105.
'What doost thou here,' sayd the abbot,
'But thou haddest brought thy pay?'
'For God,' than sayd the knyght,
'To pray of a lenger daye.'
106.
'Thy daye is broke,' sayd the justyce,
'Londë getest thou none.'
'Now, good syr justyce, be my frende
And fende me of my fone!'
107.
'I am holde with the abbot,' sayd the justyce,
'Both with cloth and fee.'
'Now, good syr sheryf, be my frende!'
'Nay, for God,' sayd he.
108.
'Now, good syr abbot, be my frende,
For thy curteysë,
And holde my londës in thy honde
Tyll I have made the gree!
109.
'And I wyll be thy true servaunte,
And trewely serve the,
Tyll ye have foure hondred pounde
Of money good and free.'
110.
The abbot sware a full grete othe,
'By God that dyed on a tree,
Get the londë where thou may,
For thou getest none of me.'
111.
'By dere worthy God,' then sayd the knyght,
'That all this worldë wrought,
But I have my londe agayne,
Full dere it shall be bought.
112.
'God, that was of a mayden borne,
Leve us well to spede!
For it is good to assay a frende
Or that a man have nede.'
113.
The abbot lothely on hym gan loke,
And vylaynesly hym gan call;
'Out,' he sayd, 'thou false knyght,
Spede thee out of my hall!'
114.
'Thou lyest,' then sayd the gentyll knyght,
'Abbot, in thy hal;
False knyght was I never,
By God that made us all.'
115.
Up then stode that gentyll knyght,
To the abbot sayd he,
'To suffre a knyght to knele so longe,
Thou canst no curteysye.
116.
'In joustës and in tournement
Full ferre than have I be,
And put myself as ferre in prees
As ony that ever I se.'
117.
'What wyll ye gyve more,' sayd the justyce,
'And the knyght shall make a releyse?
And ellës dare I safly swere
Ye holde never your londe in pees.'
118.
'An hondred pounde,' sayd the abbot;
The justice sayd, 'Gyve hym two';
'Nay, be God,' sayd the knyght,
'Yit gete ye it not so.
119.
'Though ye wolde gyve a thousand more,
Yet were ye never the nere;
Shal there never be myn heyre
Abbot, justice, ne frere.'
120.
He stert hym to a borde anone,
Tyll a table rounde,
And there he shoke oute of a bagge
Even four hundred pound.
121.
'Have here thi golde, sir abbot,' saide the knight,
'Which that thou lentest me;
Had thou ben curtes at my comynge,
Rewarded shuldest thou have be.'
122.
The abbot sat styll, and ete no more,
For all his ryall fare;
He cast his hede on his shulder,
And fast began to stare.
123.
'Take me my golde agayne,' saide the abbot,
'Sir justice, that I toke thee.'
'Not a peni,' said the justice,
'Bi God, that dyed on tree.'
124.
'Sir abbot, and ye men of lawe,
Now have I holde my daye:
Now shall I have my londe agayne,
For ought that you can saye.'
125.
The knyght stert out of the dore,
Awaye was all his care,
And on he put his good clothynge,
The other he lefte there.
126.
He wente hym forth full mery syngynge,
As men have tolde in tale;
His lady met hym at the gate,
At home in Verysdale.
127.
'Welcome, my lorde,' sayd his lady;
'Syr, lost is all your good?'
'Be mery, dame,' sayd the knyght,
'And pray for Robyn Hode,
128.
'That ever his soulë be in blysse:
He holpe me out of tene;
Ne had be his kyndënesse,
Beggers had we bene.
129.
'The abbot and I accorded ben,
He is served of his pay;
The god yoman lent it me
As I cam by the way.'
130.
This knight than dwelled fayre at home,
The sothë for to saye,
Tyll he had gete four hundred pound,
Al redy for to pay.
131.
He purveyed him an hundred bowes,
The stryngës well ydyght,
An hundred shefe of arowes gode,
The hedys burneshed full bryght;
132.
And every arowe an ellë longe,
With pecok well idyght,
Inocked all with whyte silver;
It was a semely syght.
133.
He purveyed him an hondreth men,
Well harnessed in that stede,
And hym selfe in that same sete,
And clothed in whyte and rede.
134.
He bare a launsgay in his honde,
And a man ledde his male,
And reden with a lyght songe
Unto Bernysdale.
135.
But as he went at a brydge ther was a wrastelyng,
And there taryed was he,
And there was all the best yemen
Of all the west countree.
136.
A full fayre game there was up set,
A whyte bulle up i-pyght,
A grete courser, with sadle and brydil,
With golde burnyssht full bryght.
137.
A payre of gloves, a rede golde rynge,
A pype of wyne, in fay;
What man that bereth hym best i-wys
The pryce shall bere away.
138.
There was a yoman in that place,
And best worthy was he,
And for he was ferre and frembde bested,
Slayne he shulde have be.
139.
The knight had ruthe of this yoman,
In placë where that he stode;
He sayde that yoman shulde have no harme,
For love of Robyn Hode.
140.
The knyght presed in to the place,
An hundreth folowed hym [free],
With bowes bent and arowes sharpe,
For to shende that companye.
141.
They shulderd all and made hym rome,
To wete what he wolde say;
He took the yeman bi the hande,
And gave hym al the play.
142.
He gave hym five marke for his wyne,
There it lay on the molde,
And bad it shulde be set a broche,
Drynkë who so wolde.
143.
Thus longe taried this gentyll knyght,
Tyll that play was done;
So long abode Robyn fastinge
Thre hourës after the none.
[Annotations:
83.4: From here to 118.3 the Edinburgh fragment is wanting.
86.1: 'covent' = convent.
87.1: Wanting: supplied by Ritson.
87.3: 'But,' unless: 'ylkë,' same.
88.3: 'lever,' rather.
91.4: 'selerer' cellarer or steward.
92.2: 'bought,' ransomed.
93.3: 'highe,' supplied from Copland's edition.
95.1: 'demed,' judged.
95.4: 'dysheryte,' dispossessed; cf. 87.4.
98.: Wanting in all editions: supplied by Ritson.
100.3: 'coresed,' perhaps = coursed; _i.e._ a horse used in
tourneys, a courser, or charger.
102.4: 'salved,' greeted.
103.1: See 34.1.
104.3: 'shrewed,' cursed.
105.2: 'But,' unless. So 111.3
106.4: 'fone,' foes.
107.1,2: 'retained by presents of cloth and money.' --Child.
108.4: 'made the gree,' paid my dues. (Old French _gre_, Latin
_gratum_.)
112.2: 'Leve,' grant.
112.4: 'Or that,' before that. The proverb is a favourite in Middle
English: see _Early English Lyrics_, CXI.
116.3: 'as ferre in prees,' in as thick a part of the fight.
118.4: From here to 124.1 the Edinburgh fragment is available.
119.2: 'nere,' nearer. Cp. _Robin Hood and the Potter_, 46.3.
123.2: 'toke,' gave.
126.4: 'Verysdale,' Wyresdale or Wyersdale.
127.4: The Edinburgh fragment is again available as far as 133.2.
128.2: 'tene,' trouble.
131.2: 'ydyght,' fitted.
132.3: 'Inocked' = i-nocked, notched.
133.1,2: The latter halves of these lines are torn away in the
Edinburgh fragment. The Cambridge text is resumed at 133.3.
133.2: 'stede,' place.
134.1: 'launsgay,' javelin.
134.2: 'male,' baggage. Cp. 374.1.
135.1: So the Cambridge text: Child suggests '? But at Wentbrydge
ther was.' See Argument.
136.2: 'i-pyght,' put.
136.4: Edinburgh fragment again.
138.3: 'frembde bested,' in the position of a foreigner or stranger.
See fore-note.
140.2: 'free,' supplied from the 'fere,' misprinted in the Cambridge
text. Copland, 'in fere.'
140.4: 'shende,' put to rout.
141.1: 'rome,' room.]