§ =457=. P. 196, l. 15: Apriès ce que cil signeur.--_Ms. d’Amiens_:
Apriès chou que chil estrange seigneur et chevalier orent tout ce
dilliganment regardé et comsideret, et il eurent saluet reveranment le
prinche, les seigneurs et les barons qui estoient avoecq lui, et il les
ot bellement et courtoisement rechups et conjoïs, enssi que chilx qui
bien le savoit faire, il prissent congiet de lui et li desmoustrèrent
leur besoingne et leur povreté, en priant humblement qu’il volsist
descendre à lor necessité; et s’en allèrent par deviers Callais logier
le nuit et pour attendre le responsce et le bonne vollenté dou dit roy.
Le second jour apriès chou qu’il furent venu à Calais, li roys envoya
à yaux sa responsce par trois souffissans chevaliers et troix escuiers
qui lor dissent plainnement qu’il n’avoient mies aportet si grant
tresor d’Engleterre que pour yaux paiier tous leurs frès et tout chou
qu’il vorroient demander, et li besongnoit bien ce qu’il en avoit fait
venir, pour parfurnir ce qu’il en avoit entrepris; mais, se il estoient
si conssilliet qu’il volsissent venir avoecq lui et prendre l’aventure
de bien et de mal, et fortune li cheist bien, il volloit bien qu’il y
partesissent largement à lor avenant, sauf tant que il ne li pewissent
riens demander pour lor gaiges, ne pour chevaux perdus, ne pour despens
ne dammaigez qu’il pewissent faire ne avoir; car il avoit assés amenés
de gens de son pays pour achiever sa besoingne.
Celle responsce ne plaisi mie moult bien à cez estrainges seigneurs ne
à lors compaignons, qui avoient durement travilliet à grant mesaise de
famine, lors chevaux et harnas vendus et engagiés par povreté, enssi
comme vous avés oy; et touttesfois il n’en peurent autre cose avoir,
fors tant que on presta à çascun aucunne cose par grasce, pour raller
en son pays, mès ce fu moult petit. Si se parti chacuns de Calais enssi
qu’il peult, et en ralla chacuns par deviers son pays, li ungs à piet,
par deffaute de ceval et d’argent, comme des gens desconffis. Li uns
vendoit chou qu’il avoit de harnas et le metoit en gagez à son hoste;
li autre vendoit se cotte, li autres sez estivaux, chacuns enssi que
mieux pooit, car il n’y avoit si rice qui riens ewist de remannant
pour deffendre ne pour aidier son compaignon.
Bien ay oy dire que li marchis de Misse et d’Eurient y avoit longement
sejourné à grant compaignie, et avoit tant despendut qu’il n’en pewist
raller en son pays pour nul fin qu’il pewist faire. Si eult consseil
qu’il s’en yroit apriès le roi Edouwart, si se meteroit en aventure de
tout perdre et d’aucunne cose recouvrer, si qu’il fist. Si s’en alla
par deviers le roy et se mist en le compaignie dou prinche de Galles.
Je me tairay atant de celle chevauchie que li dus de Lancastre
fist avoecq ces estraingnes seigneurs et chevaliers, par grant
sens et subtilité, pour yaux menner hors de Callais, affin que li
roys et ses gens y pewissent estre hebregiés en pais et à leur
aise, quant il seroient armet, et que ces gens estragnes ne leur
fesissent destourbier, ou par aventure qu’il ne s’en vosissent point
partir jusques adonc que on leur ewist paiiés lors frès et rendu
lors dammaiges. Et retourneray au roy d’Engleterre et compteray
l’ordounnance de son arroy et de se chevauchie, affin que tout
seigneur, baron et chevalier y pewissent prendre exemple. Fºs 118 vº et
119.
P. 197, l. 21: deviserons.--_Ms. A 7_: deviserai. Fº 216 vº.
§ =458=. P. 197, l. 27: Ançois que li rois.--_Ms. d’Amiens_: Vous devés
savoir que li roys englès fist en celle saison le plus grant appareil
et le plus souffissant que nuls ewist oncques veus ne oy à parler en
Engleterre, pour acomplir sen entension et pour venir en Franche si
puissamment, seloncq ce qu’il avoit dit, enssi que vous avés oy chy
devant. Et ainschois qu’il se partesist d’Engleterre, il fist tous les
comtez et les barons de France qu’il tenoit pour prisounniers partir
et mettre en pluisseurs lieux, en fors castiaux, pour estre mieux au
deseure d’iaux. Et fist mettre le roy de France ens ou castiel de
Londres, qui est grans et fors, seans sus le Tamise, et son jone fil
monseigneur Phelippe, avoecq lui, et le retraindi et tolli mout de
leurs deduis, et le fist garder plus estroitement que devant. Apriès,
quant il fu appareilliés, il fist assavoir partout que tout cil qui
estoient appareilliet et pourveus pour venir en France avoecq lui, se
traisissent par deviers le ville de Douvres; car il lor liveroit nés
et vaissiaux pour passer. Chacuns s’apareilla au mieux qu’il peut. Et
n’y demoura nulx escuiers ne chevalliers ne homs d’ounneur qui fuist
haitiés, de l’eage de entre vingt ans et soissante ans, en Engleterre,
qui ne fuist honteux de demorer ou pays, quant il virent que li roys
leurs sires qu’il aimoient tant, en aloit si puissamment, et que
chacuns le sieuwoit de tel pooir qu’il avoit: si ques priès tout li
comte, li baron, li chevalier et li escuier dou royaumme d’Engleterre
vinrent à Douvres à grant vollenté apriès leur seigneur, si richement
montéz et appareilliés qu’il peurent, excepté chiaux que li roys et ses
conssaux avoient ordounné et estaubli, pour garder ses castiaux, ses
baliages, ses mairies, ses offisses et ses pors de mer.
Quant tout furent assamblet à Douvres et ses naves appareillies, li
roys fist touttes ses gens, petis et grans, assambler en une plache;
si lor dist plainnement que sen intention estoit telle qu’il volloit
passer oultre et entrer ou royaumme de Franche, sans jamais rapasser
jusques adonc qu’il aroit fin de gerre ou pais à se souffissanche et à
se grant honneur, ou il moroit en le painne; et, se il y avoit entre
yaulx aucuns qui ne fuissent de chou atendre conforté, il looit et
prioit que chil s’en volsissent raller en lors maisons par bon gret.
Mès sachiés que tout y estoient venu de si grant vollenté que nuls
ne fu telx qu’il en volsist raller. Si entrèrent tout en naves et en
vaissiaux qu’il trouvèrent appareilliés, ou nom de Dieu, de saint Gorge
et de saint Nicolas, et arivèrent à Calais deux jours devant le feste
de le Toussains, qui fu l’an de grace mil trois cens cinquante neuf. Fº
119.
P. 198, l. 3: Et fist mettre.--_Ms. A 29_: Et ordonna que le roy de
France iroit faire sa residense et demeure au chastel de Londres, qui
estoit moult grant et fort, seant sur la rivière de la Tamise, et
monseigneur Philippe, son jeune fils avecques luy; et les restraignit
et leur tollit moult de leurs deduits. Et avec tout ce les fist garder
plus estroittement que devant; et ce faisoit il, pour tant qu’il
s’absentoit de son royaume et les eslongnoit pour aller achever son
entreprise sur ses ennemis.
Après, quant il eut faict ses besognes pour partir, il fist assavoir
par tout son royaume où il estoit mestier, que tous ceux qui estoyent
appareillés et pourveus pour venir en France en sa compagnie, se
tirassent devers la cité de Douvres, car il leur feroit livrer nefs et
vaisseaux pour passer la mer. Chascun s’appareilla au mieux qu’il peut,
et ne demoura ou royaume d’Engleterre nul chevalier n’escuyer n’homme
d’honneur qui fut de l’aage d’entre vingt ans et soixante, que tous n’y
allassent, excepté ceux que le roy et son conseil avoyent establi pour
garder les places et forteresses.
Quant tous furent assemblés à Douvres et à l’entour et que ces nefs
furent appareilliées, le roy fit toutes ses gens, grans et petis,
assembler en une place, au dehors de Douvres. Si leur dit pleinement
que son intention estoit telle qu’il vouloit passer outre au royaume
de France sans jamais rappasser en Angleterre jusques à tant qu’il
auroit fin de guerre ou paix à suffisance et à son grand honneur, ou il
mourroit en la peine. Et s’il y avoit aucuns entre eux qui ne fussent
de ce faire tous confortés pour entierement attendre l’aventure, il
leur prioit affectueusement qu’ils s’en retournassent en leur pais
tout à bon gré. Mais tous dirent qu’ils suivroyent leur roy, et ne
s’en voulut un seul retourner; ainçois entrèrent tous en nefs et en
vaisseaux qu’ils trouvèrent appareillés au nom de Dieu et de sainct
Georges, et y bouttèrent leurs chevaux et leurs habillemens.
§ =459=. P. 199, l. 7: Quant li rois.--_Ms. d’Amiens_: Quant li roys
Edouwars fu arivés à Calais, il et li prinches de Galles, ses ainnés
filz, et encorres troy de ses filx, monseigneur Lionnel, monseigneur
Jehan et monseigneur Aimmon, et tout li autre seigneur enssieuwant
et touttes lors gens, il fissent descargier lors chevaux et touttes
leurs pourveanches, et sejournèrent à Calais par quatre jours ou cinq.
Puis fist li roys coummander que chacuns fust appareilliés de mouvoir,
car il ne volloit plus sejourner; ains en volloit aller apriès son
cousin le duc de Lancastre, car il ne savoit coumment il li estoit.
Si se parti l’endemain au matin de le ville de Calais et vint sus les
camps à tout son grant ost et à tout le plus grant charoy et le mieux
atelet que nuls veist oncques yssir d’Engleterre: on disoit qu’il y
avoit plus de six mil chars bien attelés, qui tout estoient apasset
d’Engleterre. Puis ordounna ses batailles, si noblement et si richement
parés, petis et grans, que c’estoit solas et grans deduis à regarder.
Et fist premier son connestable, que on clammoit le comte de le Marche,
chevauchier au devant d’une lieue par devant se bataille, à tout six
cens armures de fier des plus appers de son host et mil archiers.
Apriès, il fist et ordounna se bataille et prist bien trois mil armures
de fier avoecq lui et cinq mil archiers, et chevauchoit toudis, tous
rengiés et sierrés, apriès sen connestable, enssi que pour tantost
combattre, se besoings en fuist.
Apriès celle grant bataille, chevauçoit et charioit li grans charois
qui duroit bien deux lieuwes franchoises et plus, qui menoit touttes
coses que on pooit adviser, dont on a besoing en ost et en terre de
gerre, et que on n’avoit oncques plus en avant veu, si comme moulins
à le main, fours pour quire pain, pour doubtanche que tous fours et
moullins ne fuissent brisiet là où il venroient. Apriès, venoit li
forte bataille dou prinche de Gallez et de ses frères. Et avoient chil
seigneur enffant dou roy vingt cinq cens armures de fer, noblement
montés et richement parés; et cevauçoient toudis par derrierre
et d’encoste le charoy, rengiés et serrés, si comme pour tantost
combattre, se besoings en fust. Et avoient quatre mil archiers avoecq
yaux et otant de brigans qui toudis faisoient l’ariere garde. Et ne
laissoient mies ung garchon derierre yaux, con petis qu’il fust, qu’il
ne le attendesissent, et ne pooient aller bonnement plus loing que
trois lieuwes le jour.
Et si doit on savoir que toudis plouvoit ouniement nuit et jour, qui
faisoit à tous trop grant contraire, ossi bien as hommes comme as
chevaux, et as grans comme as petis. Si trouvèrent tout le pays gastet
jusques à Arras, et wuidiet de tous biens dont on devoit vivre. Si poet
on savoir que touttes mannierrez de gens furent et estoient à trop
grant mescief et mesaise, tant pour defaulte de pain, de vin et de
char, comme pour le lait tamps et le grant plouvaige qu’il faisoit et
avoit fait tout le temps d’estet et le wain enssuiwant, par quoy li vin
de celle vendenge ne vallirent riens en Franche; et aussi fist grant
plouvage et ounit tout le tamps d’ivier après....
.... C’est bien raisons que je vous nomme lez comtes et les seigneurs
qui furent avoecq le roy englès en ce voiage: premierement monseigneur
Edouwart, son aisné fil, prinche de Galles, et puis monseigneur
Lion, son autre fil, qui fu puis dus de Clarense, et son autre fil
monseigneur Jehan, qui s’apelloit adonc comtez de Richemont, et puis
messires Aimmons, li mainnéz des quatre. Si y estoient messires Henris,
dus de Lancastre, li comtes de le Marce, connestables d’Engleterre,
li comtez de Herfort et de Norhantone, li comtez d’Arondel, li comtes
de Sallebrin, li comtez de Warvich, li comtez de Sufforch, li comtes
d’Askesufforch, li evesque de Lincolle, li evesques de Durem, li sirez
de Gobehen, messires Richars de Stantfort, li sires de Persi, li
sirez de Ros, li sires de Neuefville, li sires de Moutbray, messires
Gautiers de Mauny, li sires de le Warre, messires Jehans Camdos, li
sires de Felleton, messire James d’Audelée, li sires de Braseton, li
viscontes de Biaumont, li sires de Fil Wautier, li sires de Basset, li
sirez de Manne, li sires de Willebi, messires Bietremieu de Bruech,
messires Richars de Pont Chardon, messires Richars de Pennebruges et
grant fuisson de barons et de bons chevaliers que je ne puis mies tout
nomer. Et si y estoient li grans sires Despenssiers en grant arroy et
li troisimmes de chevaliers frerres messires Hues et messires Thummas,
et sept autres chevaliers de son hostel. Si y estoient messires Thummas
de Grantson, li sires de Ferrièrez, messires Estievènes de Gousenton;
et de le comté de Bourgoingne, li comtes de Montbliar, messires
Guillaummes de Grantson et messires Jehans dou Noef Castiel. De tous
autres seigneurs estragniers y avoit petit, car il s’estoient parti dou
roy très Callais, si comme vous avés oy, excepté li marquis de Mise et
d’Eurient. Fº 119 vº.
P. 199, l. 28 et 29: sa bataille.--_Mss. A 8, 9, 15 à 17, 20 à 22_: la
bataille des mareschaulx.
P. 199, l. 29: trois mil.--_Mss. A 20 à 22 et B 6_: deux mil.
P. 199, l. 30: cinq mil.--_Mss. A 20 à 22_: six mil.--_Ms. B 6_: quatre
mil. Fº 598.
P. 200, l. 9: vingt cinq cens.--_Mss. A 3, 11 à 14_: vingt cens.
P. 200, l. 15: trois.--_Mss. A 3, 11 à 14_: quatre.
P. 200, l. 23: aise.--_Ms. A 29_: En ce grand charroy dessusdict
avoient les seigneurs et les riches hommes d’Angleterre tentes et
pavillons, moulins, fours pour cuire et forges pour forger fers de
chevaux et toutes autres choses à leur faict necessaires. Et si avoyent
plusieurs nacelles et batelets moult subtilement faicts de cuir boulu,
et se povoyent dedans bien ayder troys hommes pour nager dedans ung
estang ou parmi un vivier, combien grant qu’il fust et pescher dedans
à leur volonté, de quoy ils eurent grant aise tout le temps et tout le
caresme, voire les seigneurs et gens d’estat; mais les communes gens se
passoyent de ce qu’ils povoyent avoir. Et avec tout ce, le roy avoit
bien pour lui soixante fauconniers à cheval, chargés d’oiseaux et bien
soixante couples de forts chiens et autant de levriers, dont il alloit
tous les jours ou en chasse ou en gibier d’oyseaux; et aussi plusieurs
grands seigneurs et riches hommes avoyent leurs chiens et oyseaux comme
le roy.
P. 201, l. 11: Carleton.--_Mss. A 1 à 6, 11 à 14_: Carbeton.--_Mss. A
8, 9_: Carlenton.
P. 202, l. 13: wain.--_Mss. A 8, 9_: empainte.
§ =460=. P. 202, l. 27: d’Uedins.--_Mss. A 1 à 6, 11 à 14, 23 à 29_: de
Hesdin.
P. 204, l. 25: variier.--_Ms. A 7_: varier. Fº 218.--_Mss. A 15 à 17_:
cerchier.
P. 204, l. 25: bos.--_Ms. A 7_: boys.