[Sidenote: 1460 / [OCT.]]
Jesus, Maria, &c. Reverende domine, si contingat ut sitis Londoniæ hoc
termino in principio parliamenti, hæc poteritis in secretis dicere
domino Warwik ac domino Cancellario, quomodo Johannes W.[227.4] apud
Felbrigg jacet cum manu forti contra pacem domini Regis et patriæ, qui
quantum valere potest est hostis publicus et inimicus capitalis domini
Regis et suorum fidelium dominorum utilitatem rei publicæ et
communitatem Angliæ diligentium, pro quo taliter esset modo indilate et
cum omni festinacione possibili providendum quod esset commissio directa
sub pœna ligeanciæ et pœna mortis et privatione bonorum vicecomiti,
domino M. Stapilton, domino W. Chambirleyn, W. Yelverton justiciario, W.
Calthorp, Johanni Twyre, Johanni Geney, T. Gurnay, Johanni Fyncham,
Johanni Yelverton Juniori, Edmundo Bokyngham, Johanni Gros, Johanni Dam,
Johanni Lomenour, Jacobo Arblaster, T. Denys, ut assistant sub pœna
prædicta sex primis militibus et armigeris ad excitandum populum de
patria pro domino T. T.,[227.5] J. H.,[227.6] P. Wentworthe,
J. A.,[227.7] T. Danyel, H. Hunton, J. Wode, W. Prentys, S. Gunnor, H.
Todynham, Joh. Wyndham, Palmere Ballivo de Costsey, T. Brygge, et suis
complicibus subito et secretiori modo capiendo et versus London
adducendo cum manu forti, et in Turri vel Newgate firmiter cum Thorp de
Scacario carcere collocando, &c. Et tunc eorum clientes et eis
adhærentes non possent, ymmo nec auderent, nocere populo patriæ bonæ
disposicionis. Certe si in hac parte fideliter laborare in effectu
volueritis, dominus Comes Warwic, et omnes sibi et suis benivoli essent
vobis multiformiter obligati, et tunc esset in Norffolchia mansio
concors et valde pacificus. Utinam bona voluntas vestra non sit in hac
materia pigra, &c.
2º. Item, quod Episcopus Norwicensis esset in curia Regis ad tempus, vel
in parliamento omnino, quia hic parvum bonum facit, nisi supportando
iniquos et paci patriæ contrarios; est enim satis dives ad comprestandum
pecunias Regi in necessitate sua. Ipse enim cum ducissa Suff. et aliis
personis prænominatis sunt Reginæ et principi maxime favorabiles cum
totis suis viribus; et ideo maxime expediens est parti Regis et comitis
Warwic subtrahere, diminuere, et pocius opprimere, vires omnium illorum
prædictorum eis et suis continue malignantium ex adverso, &c.
3º. Item, vos et vestri præmunire poteritis, si placeat, Doctores Kyrry
et Godard quomodo fama communis hic volat continue per Boreales et eorum
fautores quod Regina ac sui firmiter statuerunt unanimi decreto ipsos
doctores et me non solum morti ignominiose tradere sed etiam generaliter
omnes Fratres Minores citra flumen Trent commorantes interfici facere.
Sed Magister Vergeant cum socio qui in sermonibus Reginam cum principe
solempniter recommendat et in suis missis Reginam nominatim specificat
per instanciam Ducissæ Suff. erit cum socio privilegiatus ab hac
punicione.
4º. Item, bonum esset quod juvenis dux Suff. cum suis militibus et
armigeris uteretur suis calcaribus et jam probaretur in bello cui esset
fidelis, an caro vel piscis. Si T. T. cum suis prius recitatis essent
unde memorati in parliamento a dominis et communibus, non dubium quin
puniti essent causatores insurrectionis falsorum Regis contra Comitem
Warwic apud pontem Westmonasterii, &c.
5º. Item, memorari dignetur dominus Comes Warwic quomodo T. T., J. H.,
J. A., et H. T.,[228.1] J. W. et cæteri gravissime comminantur priorem
Wals’ [Walsingham], &c.
6º. Item, caveant Comes Marchiæ et Comes Warwic ne quovis modo sit inter
eos controversia, sed sint omnino unanimes et concordes, nec aliqua
cupiditas consiliariorum suorum faveat alicui eorum adversario propter
lucrum bonorum in finalem deperdicionem ipsorum et amicorum suorum.
7º. Item, fiat per decretum parliamenti diminutio juris peritorum ac
legis attornatorum Suff. et Norff. punicioque taxata singulorum
oppressorum, generosos ac eorum liberos, nativosque tenentes cotidie et
annuatim gravissime infestancium.
8º. Continue ac continue cordialiter cogitate ac scrutinio diligenti
sæpius revolvite quomodo inimici vestri et adversarii antiqui, spiritu
rancoris et invidiæ maliciose agitati, nituntur pro posse suo, et totis
viribus, vos, et vostros vobis benevolos funditus destruere et finaliter
deperdere, quod absit omnino; quare ex naturali legis dictamine potestis
et debetis vim vi volenter ac potenter reprimere ac repellere et eorum
maliciis inveteratis virili congressu rigorose resistere, quia minus
malim incomparabiliter videtur existere quod eorum obstinata malicia
potestate politica sit diminuta et quasi dejecta quam vos et vestri
affines, propinqui et amici essetis nimis depauperati, et quasi, quod
absit, finaliter abjecti.
[Footnote 227.4: John Wyndham.]
[Footnote 227.5: Sir Thomas Tuddenham.]
[Footnote 227.6: John Heydon.]
[Footnote 227.7: John Andrews. _See_ p. 222.]
[Footnote 228.1: Henry Tuddenham.]
[[Sidenote: 1460 / [OCT.] _closing bracket missing or invisible_]]
[[propinqui et amici essetis nimis depauperati
_text has “propinuqi”_]]
417