_To my Maistr Jon Paston in Norffolk._
[Sidenote: 1459 / NOV. 12]
Rythe will belovyd broder, I recomand me to zow, sertefyeng zow that on
Fryday last was in the mornyng, Wurceter and I wer come to London be
viij. of the clok, and we spak with my Lord Chanceler,[191.3] and I fund
hym well disposyd in all thyng, and ze schall fynd hym ryth profytabyll
to zow, &c. And he desyred me to wrythe zow a letter in hys name, and
put trust in zow in gaderyng of the good togeder, and pray zow to do so
and have all his good owthe of every place of his, and his awne place,
qwer so ever they wer, and ley it secretly wer as ze thowth best at zowr
assynement, and tyll that he speke with zow hym selff, and he seyd ye
schuld have all lawfull favor. I purpose to ryde to him this day ffor
wryttis of _diem clawsit extremum_,[191.4] and I sopose ze schall have a
letter sent from hym selff to zow.
As for the good of Powlis, it is safe j now [_enough_]; and this day we
have grant to have the good owthe of Barmundsey with owthe avyse of any
man, sawyng Worseter, Plomer, and I my selff, and no body schall know of
it but we thre.
My Lord[191.5] Treasorer[191.6] spekyth fayr, but zet many avyse me to
put no trust in hym. Ther is laboryd many menys to intytill the Kyng in
his good. Sothewell[191.7] is Eschetor, and he is rythe good and well
disposyd. My Lord of Exsater[192.1] cleymyth tytill in myn master plase,
with the aportynancys in Sothewerk, and veryly had purposyd to have
entrid; and his consayll wer with us, and spak with Wurseter and me. And
now afterward they have sent us word that they wold meve my Lord to sue
be menys of the lawe, &c. I have spoke with my Lord of Canterbury and
Master Jon Stokys, and I fynd hem rythe will disposyd bothe, &c.
Item, to morow ar the nexst day ze schall have a noder letter, for be
that tyme we schall know mor than we do now.
My Lord Chanceler wold that my master schuld be beryed wurchyply, and C.
mark almes done for hym; but this day I schall holly know his enthent.
Master Jon Stokys hathe the same consaythe and almes gevyng. Harry
Fenyngley is not in this towne, ner the Lord Bechamp.
Item, we have gethe men of the speretuall law with haldyn with us, qwat
casse some ever hap. We have Master Robert Kenthe, but in any wyse have
all the good ther to gedyr, and tary for no lettyng, thow ze schuld do
it be day a lythe [_daylight_] opynly, for it is myn Lord Chanceler
ffull in thenthe that ze schuld do so.
As for Wyllyam Worceter, he trustythe veryly ze wold do for hym and for
his avaylle, in reson; and I dowthe nott and he may veryly and
feythefully understand zow so disposyd to hym ward, ze schall fynd hym
feythefull to zow in leke wysse. I understand by hym he will never have
oder master butt his old master; and to myn consaythe it were pete butt
iff he schull stand in suche casse be myn master that he schuld never
nede servyce, conserying [_considering_] how myn master trustyd hym, and
the long zers that he hathe be with hym in, and many schrew jornay for
his sake, &c.
I wrythe zow no mor, be cawse ze schall [have] a noder letter wretyn to
morow. Wretyn at Lundon the xij. day of Novembr, in hast, be