_To my ryght worshipfull unkle, and my ryght good master, Syr John
Fastalf, Knyght._
[Sidenote: 1456(?) / JULY 17]
Ryght worshipfull unkull, and my ryght good master, I recomaund me to
yow wyth all my servys. And, Sir, my brother Paston and I have comened
togeder as touchinge to your colage that ye wold have made; and, Sir,
hit ys to gret a good that ys axed of yow for youre lycens; for they ax
for every C. marc that ye wold amortyse D. marcz, and woll gefe hit noo
better chepe.
And, Sir, y told my brother Paston that my Lady of Bargeveney[98.2]
hath, in dyvers Abbeyes in Lecestershyre, vij. or viij. prestes singinge
for her perpetuell, by my brother Darcyes and my unkle Brokesbyes
meanes, for they were her executors; and they acorded for money, and
gafe a cc. or ccc. marc, as they myzt acord for a prest. And for the
suerte that he shuld synge in the same abbey for ever, they had maners
of good valew bounden to such persones as plesed the sayd barthern
[_brethren_] Brokkesby and my brother Darcy, that the sayd servyse
shulde be kept. And for lytell moore then the Kynge axed hem for a
lycence, they went thorgh with the sayd abbots. And y hold this wey as
sure as that other. Ye may comen with youre councell therof.
And yf there be any servyse that I can do for yow, hit shall be redy at
all tymes, with the grace of God, who have yow in his kepynge.
Wryten at London, the xvij. day of Juyll.
Your nevew and servaunt,