[Sidenote: 1455 / APRIL 2]
Right high and myghty Prynce, my right noble and good Lord, in my right
humble wyse I recomaunde me to your good grace. And for the noble
lordship and supportacion shewid unto me at all tymes, I beseche our
Lord God guerdon yow, where as I may not, but only as yowr daily and
contynuell bedeman, now in myn age, pray for the good prosperite of
youre right highe and noble estate, as I am gretly bounde to doo; prayng
tendirly yowre Highnesse to contynue yowre good lordship and
supportacion in the materes touchyng your servaunt John Porter and my
pore Chappelleyn Sir Thomas Howes, trustyng verily to God that, with the
supportacion of your good Lordship, there mater shall yette come to a
good conclusion in punisshyng of perjure and embracery that many yeris
hathe ben and yette is usid in this shire, whiche were grete merite, and
to my conceyte, in yow that ar soo noble a Prynce, a singler renoune, as
for the beste dede that may be doo for the weel of bothe shires.
And in like wise that it please youre right good grace to contynue youre
noble favour and supportacion to me in remedyeng the force doon by Sir
Philip Wentworth, kepyng now wrongful possession of certeyn londes in
Suffolk, nygh youre Castel of Framyngham; whiche londs certeyn of my
frendes, to myn use, have of the Kyngs graunte by his lettres patent
byfore ony patent that the seid Sir Philip hathe, whiche is my singler
matier in myn owen parte that I have now to doo, as my cosyn Paston can
enforme yowr Lordship, for he knowith the mater and myn hole entente, to
whom your good grace lyke to yife credence. He cometh to awaite upon
your Lordship at this tyme, as I understande, by my cosyn youre servaunt
Richard Suthwell, youre Lordship desired.
Right highe and myghty Prynce, my noble and right good Lord, I beseche
the Holy Goste be with yow, and evere more sende yow the accomplishment
of youre right noble desires to his plesir and youres.
Writen at my pore place of Castre, the ij^de day of Aprill.
Your humble man and servaunt,