Sire, après que j'ay heu escript à Vostre Majesté, au pied de ma
dépesche du XXIIIe du présent, ce que, à la haste, j'avois peu
aprandre du rencontre que le capitaine Briquonel disoit estre advenu
le XVIe auparavant en Escoce, milord de Burlay, le jour d'après feste
de St Jehan, m'a envoyé mestre Vuynbenc, l'ung des clercs de ce
conseil, pour m'en faire l'entier récit, jouxte ce qu'il m'a asseuré
que le mareschal de Barvyc en escripvoit. Lequel a mandé qu'estant
arrivé par dellà il avoit trouvé les seigneurs du pays fort anymez les
ungs contre les aultres, et que néantmoins, par la dilligence qu'il
avoit uzé d'aller devers ceulx du party de la Royne d'Escoce à
Lillebourg, et puys devers les aultres du Petit Lith, il avoit tant
faict qu'il les avoit ramenez à vouloir entendre ung bon accord,
auquel la Royne, sa Mestresse, les exortoit, et les avoit, deux jours
durant, engardez de combattre; et nonobstant que le troisiesme ilz
fussent sortys en campaigne par l'opiniastreté de milord de Humes,
encor les avoit il retardez, aultant qu'il avoit peu, qu'ilz ne
vinsent aulx mains, et le différant n'avoit resté qu'au poinct de la
réputation à qui premier se retireroit; dont il s'estoit miz entre les
deux troupes pour, au signal de son chappeau, quant il le lanceroit,
l'on commanceât égallement de chacun costé de s'en aller; mais, quant
l'on en est venu là, le dict de Humes, se sentant piqué de quelque
chose, avoit attaqué le combat où il estoit demeuré prins, l'abbé de
Quelouin avec sèze aultres tuez, et deux petites pièces de campaigne
perdues, et que, nonobstant cella, le dict Drury mandoit qu'ilz
estoient encores de toutz costez en bonne disposition d'apointer: ce
que la Royne, sa Mestresse, me vouloit bien faire entendre au vray, et
qu'au reste il m'envoyoit une lettre que la Royne d'Escoce m'avoit
escripte.
J'ay leu incontinent la dicte lettre, et parce que par icelle elle me
prioit de prendre le soing de ses affaires, et de solliciter la
liberté de son ambassadeur, et d'incister au parachèvement du tretté,
j'ay envoyé la dicte lettre à icelluy de Burlay pour la veoir, et pour
le prier que, sur l'ocasion d'icelle et des nouvelles que le mareschal
de Barvyc avoit mandées, il luy pleût me faire meintenant avoir la
responce de la Royne, sa Mestresse, touchant les bons expédiantz que
naguières Vostre Majesté m'avoit faict luy offrir. Sur quoy il m'est
despuys venu trouver en mon logis pour me confirmer les mesmes choses,
qu'il m'avoit mandées d'Escoce, et m'a dict, au reste, qu'il n'y avoit
rien que la Royne, sa Mestresse, heust en plus grand desir que de
prendre expédiant ez affaires de la Royne d'Escoce et de son royaulme;
et puysque Drury espéroit de pouvoir conduyre les seigneurs du pays en
accord, ainsy qu'ilz l'avoient, des deux costez, priez de demeurer
encores pour le moyenner, la dicte Dame me prioit aussi d'attandre
jusques à ce qu'elle eust heu de ses nouvelles, et puys j'en yrois
conférer avec elle; et que cependant elle me vouloit bien faire veoir
que la matière n'avoit esté acrochée à des difficultez qui ne fussent
fort grandes et fort considérables, lesquelles il s'est mises à
racompter par ordre. Mais parce que je les ay la pluspart desjà
récitées en mes précédantes dépesches, je ne toucheray icy sinon celle
qu'il a dict avoir plus irrité la dicte Dame; c'est qu'elle avoit
vériffié que la Royne d'Escoce et l'évesque de Roz avoient pratiqué de
nouveau à luy susciter une grande rébellion de ses subjectz, laquelle
avoit esté si preste à exécuter que Ridolfy, à la fin de mars,
l'estoit allée proposer au duc d'Alve, luy demandant ung bien petit
nombre de harquebuziers pour les faire descendre en ung port de ce
royaulme, à ce mois de juillet; et que incontinent ceulx de la
conjuration, lesquelz debvoient avoir toutes choses bien prestes, et
qui estoient en grand nombre et des principaulx de la noblesse, s'y
joindroient et marcheroient droict à Londres, où, avec la faveur des
deux causes qu'il disoit y estre fort desirées, sçavoir, la religion
catholique et l'advancement du tiltre de la Royne d'Escoce, ils se
randroient facillement maistres de la ville, et de la Tour, et de tout
le royaulme: ce que le dict duc avoit receu avec grand affection, et
avoit promiz en la main du dict Ridolfy le secours qu'on luy
demandoit, seulement l'avoit chargé d'escripre par deçà, qu'on tînt
toutes choses prestes et en estat, sans rien mouvoir, jusques à ce que
icelluy mesmes Ridolfy heust faict ung voyage en grand dilligence à
Rome et en Espaigne, pour avoir l'ordre et le consentement du Pape et
du Roy Catholique là dessus; dont, avant prendre la poste, il avoit
escript les choses dessus dictes en chiffre à l'évesque de Roz, et luy
avoit envoyé deux aultres lettres, marquées de 30 et de 40, que
celluy qui les a chiffrées afferme que s'adressoient à deux seigneurs
de ce royaume, et qu'elles contenoient la promesse du duc d'Alve, avec
advertissement de n'en rien communiquer à l'ambassadeur de France,
parce qu'il en advertiroit Leurs Majestez Très Chrestiennes,
lesquelles, pour l'ocasion de l'alliance qui se pourchassoit,
pourroient descouvrir toute l'entreprinse à la Royne d'Angleterre; et
que le dict évesque de Roz confessoit avoir receu les dictes lettres
ainsy merquées, mais que l'une s'adressoit à sa Mestresse, et l'aultre
à l'ambassadeur d'Espaigne qu'il luy avoit desjà délivrée, ce que le
dict ambassadeur dényoit; dont se cognoissoit assés qu'on avoit heu
grand occasion de resserrer le dict évesque; et que la Royne, sa
Mestresse, me prioit de peser bien ces choses, qui estoient pour la
justiffication de tout ce qu'elle avoit usé vers la Royne d'Escoce et
son ministre.
J'ay remercyé très humblement la Royne de ceste communication qu'elle
me faisoit faire; et ay loué sa prudence, et celle de ses sages
conseillers, d'avoir sceu si sagement pourvoir à ung dangier si
imminant; et que néantmoins, considéré les mesmes choses qu'elle me
venoit de mander, et d'aultres qui, possible, n'estoient encores
descouvertes, et que le bien et la seurté d'elle et l'honneur et
l'obligation de Vostre Majesté concouroient à l'accommodement des
affaires de la Royne d'Escoce et de ses subjectz, je ne pouvois cesser
de la supplier qu'elle y vollust entendre par ce mesmement que, à
ceste heure plus que jamais, vous seriez pressé d'assister à ceulx de
Lillebourg; et qu'au reste, de tant que les ambassadeurs n'avoient à
randre compte de leurs actions qu'à leurs Maistres, que je la
supplioys de ne faire préjudice à cestuy leur inviolable droict,
lequel elle mesmes avoit intérest de bien conserver. A quoy il m'a
respondu que la dicte Dame m'asseuroit que, nonobstant ses offances,
elle ne lairroit de prandre ung si honnorable expédiant avec la Royne
d'Escoce que Vostre Majesté s'en contanteroit, et encores avecques son
ministre; et qu'il espéroit que bientost elle feroit procéder à sa
liberté.
J'attandray, Sire, ces segondes nouvelles d'Escoce, et cependant je
tiendray toutjour fort ferme qu'on n'y doibve envoyer d'icy nulles
forces, et verray ce que je pourray gaigner par négociation avecques
ceulx cy, qui toutesfoys sont trop artifficieulx, et, quant
l'artiffice leur deffault, ilz se desdisent tout ouvertement.
Les choses d'Yrlande, à ce que j'entendz, se broillent, et desjà il y
a de la rébellion en deux endroictz du pays; dont se parle que milord
de Sidenay y sera renvoyé en dilligence, et qu'il layssera son voyage
des beings de Liège, pour lequel voyage toutesfoys l'ambassadeur
d'Espaigne luy a desjà faict tenir le passeport du duc d'Alve en la
plus favorable forme qu'il est possible de le faire, avec deux lettres
du dict duc, l'une à la Royne, et l'aultre à luy. Et cependant ung
sire Jehan Hubande, personnage assés principal, et fort inthime du
comte de Lestre, est passé dellà pour aller aus dicts beings, et a
prins lettres de banque en Envers pour assés bonne somme de deniers,
dont je souspeçonne que ce n'est sans qu'il ayt quelque commission
vers le dict duc. L'accord des prinses se poursuyt toutjour, et encor
que ce que le duc d'Alve a faict publier (que nulz, sinon les seulz
commissaires, puyssent faire aulcun party là dessus avec les Anglois),
ayt offancé plusieurs, si en demeurent iceulx commissaires plus
authorisez; et desjà le Sr Thomas Fiesque a trouvé moyen de faire
consigner ez mains de Spinola une partie des merchandises qui
apartennoient aulx Gènevoys, avec grand espérance qu'à l'arrivée du
jeune Coban, tout le différand s'accommodera. Et pour parler librement
de ce que j'en sentz, le duc d'Alve condescend et s'abaysse tant à
tout ce que ceulx cy veulent qu'ilz ne sçauroient reffuzer l'accord:
dont, de ma part, je le tiens pour tout faict. Sur ce, etc.
Ce XXVIIIe jour de juing 1571.