Vous qui lisez, ô dames lionnoises...
. . . . . . . . . . . . . .
Ne veuillez point condamner ma simplesse
Et jeune erreur de ma folle jeunesse,
Si c'est erreur; mais qui, dessous les cieus,
Se peut vanter de n'estre vicieus?
L'un n'est content de sa sorte de vie,
Et tousjours porte à ses voisins envie;
L'un, forcenant de voir la paix en terre,
Par tous moyens tasche y mettre la guerre;
L'autre, croyant povreté estre vice,
A autre Dieu qu'Or ne fait sacrifice;
L'autre sa foy parjure il emploira
A decevoir quelcun qui le croira;
L'un, en mentant de sa langue lézarde,
Mile brocars sur l'un et l'autre darde.
Je ne suis point sous ces planetes née
Qui m'ussent pu tant faire infortunée.
Oncques ne fut mon œil marri de voir
Chez mon voisin mieux que chez moi pleuvoir.
Oncq ne mis noise ou discord entre amis;
A faire gain jamais ne me soumis;
Mentir, tromper et abuser autrui,
Tant m'a desplu que mesdire de lui.
. . . . . . . . . . . . . .