_To John Paston, Esquyer, be thys delivered._
[Sidenote: 1472 / FEB. 5]
I grete you wele, and send you Godds blyssyng and myn, letyng you wete
that the woman that sewyth the appell ageyn your brother and his men is
comyn to London to call ther up on. And whan that she shuld come to
London ther was delivered her C. _s._ for to sewe with, so that be that
I here in this countre she wull not leve it, but that she shall calle
ther up on such tyme as shall be to your most rebuke, but if [_unless_]
ye ley the better wetch. She hath evill councell, and that wull see you
gretely uttered, and that ye may understand be the money that was take
her whan she came up, and ye shuld fynd it, I knowe it wele, if ther
myght have you at avauntage; ther for, for Godds sake make diligent
serge be the advyce of your councell, that ther be no necglicens in you
in this mater ner other for diffaught of labour, and call upon your
brother, and telle hym that I send hym Godds blyssyng and myn, and
desire hym that he wull now a while, whill he hath the Lords at his
entent, that he seke the meanes to make an ende of his maters, for his
elmyses arn gretly coraged now of late; what is the cause I knowe not.
Also, I pray you speke to Playter that ther may be fownd a meane that
the shereffe or the gaderer of grene wax[134-2] may be discharged of
certeyn issues that renne up on Fastolf for Mariotts mater, for the
balyfe was at hym this weke, and shuld have streyned hym, but that he
promysed hym that he shuld with in this viij. days labore the meanes
that he shuld be discharged or ell[es] he must content hym, &c. Also,
I send you be the berer her of, closed in this letter, v. _s._ of gold,
and pray you to bey me a suger loyfe, and dates, and almaunds, and send
it me hame, and if ye bewar [_lay out_] any mor money, whan ye came hame
I shall pait you ageyn. The Holy Gost kepe you bothyn, and deliver you
of your elmyse [_enemies_]. Wretyn on Sent Agas Day, in hast.
Item, I pray you speke to Mayster Roger[135-1] for my sorepe, for I had
never mor nede therof, and send it me as hastly as ye can.