Cxi tie Londone ni ricevis tre interesajn vizitojn de multaj fremdaj
samideanoj. Vere estas mirinde ke jen tute ne estas malsameco de
elparolado inter la diverslandanoj kun kiuj ni gxis nun paroladis.
Plezurege ni nun renkontis Esperantistojn el Francujo, Italujo kaj
Bohemujo. Tiu cxi ofta intersxangxo de pensoj kun personoj kiuj
antauxe estis apartigitaj per manko de komuna lingvo certe estas unu
el la plej grandaj plezuroj kiujn Esperanto donas al siaj adeptoj. Ni
korege esperas ke ni baldaux vidos multajn fremdajn kunlaborantojn.
Vicprezidanto de la Hispana Societo skribis al ni kaj sendis afablajn
bondezirojn je la estonta sukceso de nia granda entrepreno. Li ankaux
sciigas nin ke oni eldonos Novembre novan Esperantan gazeton "La
Hispana Suno." Ke gxi estos sukcesplena, ni esperegas. Sed Hispanujo
ne estas la sola lando kiu havas novan organon. Malproksima Peruo
jxus eldonis "Antauxen Esperantistoj!" Vere felicxa nomo por la
naskinto, kaj ni fidas ke la Peruanoj respondos al la devizo, kaj
rapide antauxmarsxos.
Sudameriko sxajnas esti bona loko por Esperanto, cxar ni jxus ricevis
sciigojn pri la fondo de nova grupo en Santiago, Cxile. La Direktoro
estas Sinjoro E. Sepulveda Cuadro, Profesoro de Fonetiko.
Sed ne estas necese ke oni sercxos Sudamerikon por eltrovi pruvojn de
la progreso de Esperanto. Niaj amikoj en Keighley--elparolata
Kihxli--havis sian jarkunvenon post tre aktiva vivo de dek monatoj.
Vere ili faris grandan propagandon, cxar, kvankam la urbo ne estas
granda, jen estas preskaux sesdek Esperantistoj tie. Eble estas pli
facila afero disvastigi la lingvon en urbeton kie cxiu konas siajn
najbarojn, sed, cxu tiu cxi estas vera aux ne, oni devas gratulegi la
Kihxlian Societon pri gxia rapidega kresko.
Ankaux cxi tie ni havas novajn societojn. Je la lasta tago de
Septembro, nia tre sindonema helpanto, Sinjoro Clephan, paroladis
pri Esperanto cxe la Literary and Philosophical Institute,
Newcastle-on-Tyne. Jen estis okdek cxeestantoj, kaj, post la
parolado, dudek el ili deziris grupigxi. Tiel nia plej norda Angla
Grupo naskis. Ni petas cxiujn kiuj logxas en aux apud tiu urbo ke
ili aligxu al la nova societo.
Nia tre agema kunlaboranto, Sinjoro Motteau, jxus fondigis la "Forest
Gate Esperanto Group." Ni petas ke oni skribu al la Hon. Sek. de la
Grupo, Sinjoro E. J. R. Beal, 74, Claremont Road, Forest Gate. Niaj
amikoj tie tre deziras ke ili povus havi la uzon de tauxga cxambrego
en kiu So. A. Motteau volonte donus senpagan kurson de Esperanto.
La tre entuziasma propagandisto Sinjoro Thill, 6, Barton Crescent,
Mannamead, Plymouth, ankaux deziregas cxambregon kie li povos doni
senpagan instruadon. Ni korege esperas ke ia amiko povos helpi niajn
du kunlaborantojn.
Doktoro R. J. Lloyd, D.Litt.M.A., komencis Esperantan kurson cxe la
Liverpool Universitato je Oktobro 14. Ni fidas ke multaj lernantoj
venos tie, kaj ke la entrepreno estos sukcesa. Sxajnas al ni ke estas
notindege ke Angla Universitato malfermis kurson.
Doktoro Adolf von Mayer estas la aktivega estro de la Esperanta
movado en Manchester. Unu el liaj lernantoj baldaux komencos kurson
en Jxaponujo. Jen estas multaj fremduloj en la Manchester Grupo, kaj
ni kredas ke gxi kreskos rapide.
Ni petas ke amikoj skribos al Sinjoro E. W. Eagle, 21, Kellett Road,
Brixton, S.W. Ankaux al Sinjoro P. G. Bacon, 170, Clapham Park Road,
S.W. Tiuj cxi sinjoroj estas la sekretarioj de novaj grupoj por
studii Esperanton. En Ilford Sinjoro W. A. Jeffery deziras fondi
grupon. Lia adreso estas 42, Park Road, Ilford, kaj li fidas ke oni
skribos al li pri la afero.