Chapitre .xxv.
Or reste encores a ma dame ung signet
D’or de ducas & de façon jolye
A demy rond esmailé pur & net
Dessus lequel pourra estre pourtrait
Pour tout devis son blason d’armoyrie
Et deux anneaulx de belle pierrerie
D’ung escharboucle & saphir de richesse
Que je diray les anneaulx de noblesse
Il fait bon veoir a femme belles mains
Bien aorneez belles & refulgentes
D’honnestes bagues plaisantes aux humains
Pour leurs vertus ou sinon c’est du mains
Car autrement ne sont vers Dieu plaisantes
Et pource doncques les mains belles & gentes
Fault acoustrer & parer de vertus
Les bonnes dames en ont les cueurs vestus
En ce signet ou sera le blason
Est designé de noblesse l’estat
Si vous diray selon Dieu & raison
Comment noblesse est tout temps & saison
A droit congnue & perceue tout a plat
Noblesse prent es vertus son esbat
Qui la demonstre en toute compaignie
Mais villain est qui fait la vilennie
D’autant que l’or est metal precieux
Sur tous les autres par singularité
Si est noblesse quant par faitz vertueux
Elle degecte tous pechez vicieux
Car c’est ou gist vraye nobilité
On voit plusieurs en grande auctorité
Nobles de non/ mais grans blasphemateurs
Telz de noblesse ne sont que usurpateurs
L’escharboucle est pierre tresprecieuse
Qui resplendit & rend clarté de nuyt
Aussi ma dame par estre vertueuse
Rendrés clarté a chascun fructueuse
Car sans doubter vertu par tout reluyt
Si fait noblesse mais sans les vertus nuit
Je le vous dy & vous l’entendez bien
Qui n’a vertu en ce monde il n’a rien
Le saphir est une pierre azuree
Belle & propice a porter en ses dois
Et qui preserve une dame asseuree
Sans peur ne doubte pour estre bien paree
Le saphir est pour grans princes & Roys
Si le vous donne & fais ce que je doibs
Car je congnois vraye noblesse en vous
Jesus la donne a toutes & a tous
Par ces anneaulx sont les dois reliez
Comme vertus doivent estre en chacun
Tous nobles cueurs sont joyeulx & lyez
Quant par vertus se sentent raliez
Il n’est tel don en secret ou commun
Or donc ma dame prenez temps opportun
A maintenir vostre haulte noblesse
Et gardez bien que pechié ne la blesse
A tant vous laisse de vertus aornee
Ou bien sçavez faire vostre devoir
De noble lieu estes yssue & nee
Parquoy vous ay noblement ordonnee
Sans espargner or argent ne avoir
Vueillez le donc en bon gré recevoir
Pour le salut du cueur & de vostre ame
C’est grant plaisir de servir noble dame