Chapitre .xxii.
Or est coiffee ma dame debonnaire
Si nous convient conduire son atour
D’une templette ou n’aura que reffaire
De couleur propre pour aux voyans mieulx plaire
Sus le cerveau doit faire son sejour
Nom de vertu fault qu’elle ait a son tour
Dont ma maistresse puisse avoir relucence
Pour ce luy donne le tiltre de prudence
Prudence scet deviser terre & mer
Et tient vers Dieu femme & homme paisible
Prudence fait tout homme renommer
Et des merveilles fait la chose possible
Prudence fait amollir cueur terrible
Si la mettons sur nostre entendement
Se nous querons de vivre saigement
Prudence fault a femme quoy qu’il couste
De telz vertus doit dame estre paree
Prudence n’est ne en bras ne en coulte
Mais est au chief qui voit parle ou escoute
Par la le cueur declaire sa pensee
Se vous voulez donc bien estre aornee
Ayez prudence pour estre vostre guyde
Qui n’a prudence c’est ung cheval sans bride
Le poete fainct prudence une sphere
Ou les vertus preignent leur influence
Boece aussi prudence bien compere
A la geline qui garde comme mere
Ses poussinetz de mal & de grevance
Ainsi prudence soubz ses helles s’avance
A mettre ensemble vertus & les garder
Ma chere dame vueillez y regarder
Ayons prudence se voulons parvenir
En paradis ou sommes appellez
Sans prudence nous n’y povons venir
Si nous convient de tout vice abstenir
Puis par vertu serons tous consolez
Prudence paist les povres desolez
En leurs donnant si bon sens & sçavoir
Que l’ennemy ne les peut decevoir
Ayons prudence qui va le droit chemin
Fuyons cautelle ou vertus perdent lieu
Qui bien voyage il est bon pelerin
Eureux est cil qui vient a bonne fin
Qui ne peut estre sans l’ayde de Dieu
Prenez en gré mon desir humble & pieu
Veu qu’on vous nomme princesse si parfaicte
Que Dieu vous a de sa propre main faicte
Soyons prudens pour seure voye eslire
Soyons saiges sans estre forvoyez
Soyons subtilz pour eviter le pire
Soyons constans pour soy taire ou bien dire
Vous tous & toutes qui ce livre lirez
Par prudence tous voz faitz provoyez
C’est la vertu qui voz faitz guidera
Si saigement que l’on vous prisera