Chapitre .xxi.
Coiffer nous fault les cheveulx & la teste
De ma maistresse pour son atour tenir
Car s’il tomboit pas ne seroit honneste
Ceste coiffe qui n’est pas deshonneste
D’or & de soye sera pour soustenir
Nom je luy donne pour le mieulx retenir
Entre vertus vraye honte de meffaire
Ce pensement peult beaucoup de biens faire
Comme la coiffe est tissue & lassee
Communement a façon d’une roitz
Honte a des yeulx maint regard & visee
En bon propos qui est bien advisee
Pour corriger les faultes & desroys
Autant en dis aux princes & aux Roys
Qui honte n’a honneur ne peult nourrir
Honte refraint maulx qui font mains perir
Honte est la fleur des perles precieuses
Honte soustient la dame a estre bonne
Honte maintient les femmes vertueuses
Honte reboute les oeuvres vicieuses
Entre vertus & vices c’est la bonne
Honte est le fruit que bonnes meurs flouronne
Ou honte n’est honneur n’a jamais lieu
Pensez y dames qui voulez servir Dieu
Honte & vergongne c’est une mesme chose
Et sont les filles d’honneur & de prudence
Dessoubz icelles est enfermee la rose
Que dangier tient enfermee & enclose
Que homme n’y touche car ce seroit offense
Toutes dames pour soy chascune y pense
Car ce l’aymant y prenoit une entree
Dictes a Dieu la bonne renommee
Fuyons Venus qui honte met en chasse
Fuyons oyseuse ou Venus se repaire
Jamais meffait ne doit venir en place
Qui n’a mesprins il peult lever la face
Contre le ciel ou chacun se doit traire
Pour parvenir a ce treshault affaire
De nostre honneur tousjours fort decorer
Il nous fault Dieu servir & honnorer
Garder nous fault de toute esmotion
Pour fouyr vice & d’autruy & de soy
Qui ne se veult mettre en perdition
L’escripture nous en fait mencion
Et est ainsi ung article de foy
Qui fait pecher autruy c’est contre loy
Et vauldroit mieulx estre mains agreable
Que d’encourir la peine pardurable