Chapitre .xvi.
Ung orfevre nous convient recouvrer
Qui nous saiche faire une cordeliere
Du plus fin or que l’on pourra trouver
Esmaillee de blanc noir rouge cler
Pour a ma dame faire ceinture chere
Des patenostres pour faire la maniere
Pendront devant de fin blanc cassidoine
Le temps present le dit ainsi ydoine
Ainsi le point qui clost du corps l’habit
C’est la ceinture dont dame se doit ceindre
La ceinture la personne embellit
C’est la parure qui plus fort anoblit
Elle est seant au grant & au maindre
A quel vertu la ferons nous attaindre
Qui soit servant a ce cas & notoire
C’est la ceinture de devote memoire
Le corps paré tout cloz par la ceinture
Dame ce point bien entende & le notte
Car on ne peut oster quelque vesture
Jusques le ceingt en face deffermure
Tant soit de robe de chemise ou de cotte
Et ainsi garde la memoire devotte
Que les vertus ne se separeront
Du digne cueur ou trouvees seront
Le cueur qui tourne en devote pensee
Si ne peult cheoir es latz de l’ennemy
La memoire qui en bien est tournee
Est tost de Dieu tellement confermee
Que l’ame sent paradis a demy
Qui de Dieu fait son souverain amy
Celle peut dire certes je suis aymee
Du plus leal qui soit en la contree
Memoire fait revoir le temps passé
Et souvent des maulx & des biensfaitz
Ung cueur devot ne peut estre lassé
De cogiter tout ce qu’il a brassé
Soit bien soit mal aulmosnes ou tors faitz
Car la se poisent les fardeaux & les faitz
La conscience se peut la regarder
C’est le moyen pour sa vie amender
Noble ceinture riche d’or & d’esmail
Je treuve cy pour ma dame servir
Memoire tient des vertus le fermail
Le cueur devot est tousjours sans sommeil
Pour veiller l’ame & garder de perir
Ma maistresse a qui vueil obeir
Se meilleur don en ce monde trouvoye
Dieu m’est tesmoing que je le vous donroye