Chapitre .xiii.
Alons plus hault affin que riens ne celle
A ma dame fault une gorgerette
Pour luy couvrir le col & la forcelle
Le beau tetin la chair fresche & nouvelle
La se peut veoir une beaulté parfaicte
La toille doit estre fine & bien faicte
De doulx fillez aussi bon que de soye
Affin que l’oeil sans descouvrir le voye
La gorgerette de toille bien sortie
Garde la chair de hasle & noirciture
La gorgerette/ habitue la partie
Honnestement affin qu’on ne mesdie
De trop monstrer ce qui doit couverture
De peu a trop il doit avoir mesure
Et conseille toutes dames de pris
De moyenner l’estat de ses habitz
La gorgerette servant a ma maistresse
Je la juge qu’on la nomme & appelle
En office la vertu de sobresse
Ceste vertu vous fera garderesse
De vostre corps affin que ne chancelle
Le corps soullé souvent vice l’appelle
Vice se nomme dangereux messager
Qui maine gens a honte de leger
Pas ne souffit que sobresse nous serve
Pour nostre chair abaisser & matter
Mais fault la langue a legeretté serve
Tenir si sobre que riens ne nous asserve
A trop parler qui peut beaucop couster
Ainsi sobresse servira sans cesser
A soy garder de vie dangereuse
Et la langue d’estre trop perilleuse
Ainsi comment la gorgerette garde
La chair tresblanche d’empirer ou mal mettre
Sobresse prent en conduicte & en garde
La chair fragille affin qu’elle ne perde
Par trop nourrir & en pechié se mettre
Sobre parler est de bon sens le maistre
Ainsi sobresse est mere de santé
Sobresse vault qu’elle ait auctorité
Soyons sobres & fuyons gloutonnie
Qui des pechés est allectant nourrice
Sobresse fait santé & longue vie
Gourmandise paresse l’endormie
C’est la fontaine & la source de vice
La sobresse est moult aux dames propices
De sobresse faictes en ung mestier
Elle est si bonne qu’elle vous a mestier
Sobres soyons de mengier & de boire
Soyons sobres de parler & respondre
Gourmandise vault pis que le tonnoirre
Trop parler nuyt plus qu’on ne le peult croire
Cathon le dit & nous en veult semondre
Et devroit on comme fol celuy tondre
Qui ne compasse sa langue saigement
Dont tant de maulx adviennent longuement