Chapitre .xii.
Nobles dames mettez memoire & cure
A retenir les habitz & les pompes
Que le donne a ma dame & procure
Qui vient a point de façon & mesure
A toutes femmes d’estat & lieu quelconques
Or nous convient en perseverant doncques
Ung coustellet en villes & citez
Pour ayder femme en ses necessitez
Je sçay tresbien que princesse a cousteaulx
Pour la servir pompeusement a table
Garniz dorez richement fais & beaulx
Manches armoyez aussi bien grans oyseaulx
C’est ung service treshonneste & notable
Mais je treuve le cousteau prouffitable
Que dame porte sur soy pour ce servir
A tout besoing qui luy peult souvenir
Le cousteau pend a ung cordon de soye
Le manche doulx l’alumelle asceree
La guayne gente combien que peu se voye
Selon les dames il est cher de monnoye
Le cousteau sert bien souvent & agree
Dame ne porte ne dague ne espee
Et n’a glaive qui luy feroit offence
Que ung coutellet de petite deffence
Et toutesfois fault que vertu se tire
Du coutelet dont la dame est paree
C’est justice qui vault bien de l’escripre
Car de justice ne se peult trop bien dire
Justice vault d’estre hault eslevee
C’est le moyen pour estre separee
Toute dame qui celle vertu garde
De tous les vices dont l’ennemy nous larde
Le manche doulx a trenchant alemelle
A le cousteau qui nous fera service
C’est a dire que doulceur sans cautelle
Doit avoir dame comme la torterelle
Sans quelque hayne sans rigueur & sans vice
Mais quant l’offence desire la justice
Le tendre cueur doit en rigueur tourner
Et consentir de justice ordonner
Justice tient le peuple en sa droicture
Justice garde les povres des puissans
Justice tient raison en sa mesure
Elle deffend le loyal de torture
Elle rompt guerre debat discord contens
Ce toy qui lis justice bien entens
Chacun de soy & de son propre faic
Doit raison faire qui veult estre parfait
Autant princesse que une simple bourgoise
Et une royne comme une bergiere
Celle a sur cueur tort d’autruy qui luy poise
De soy mesmes sans parolle & sans noise
Face justice & la raison legiere
Du bien publicque eslieve la baniere
Le cueur le sens se doit la employer
Qui veult avoir des vertus le loyer
Justice & droit & vivre honnestement
Ne blesser ame son prochain ne autruy
Rendre a chascun le sien entierement
Vivre en tous faitz tousjours si justement
Et vers chacun tout ainsi que vers luy
Chacun congnoist n’y a celle ou celuy
Que par justice est paix en chascun lieu
Dame justice est vraye fille de Dieu