Chapitre .x.
Recouvrer fault en l’hostel d’un mercier
Et bien choisir dedans sa mercerie
Pour quelque pris qu’on puisse aprecier
Ung tabourin qu’on dit ung espinglier
Pour mieulx estre ma maistresse sortie
La ceingturette en doit estre garnye
C’est des utilz l’ung qui fault preparer
Espingles fault pour les dames parer
Cest espinglier doit avoir couverture
D’un beau drap d’or pour princesses servir
De drap de laine doit estre la bordure
Pour des espingles recepvoir la pointure
C’est son mestier & si doit asservir
Dames le doivent bien garder & cherir
L’espinglier donc vient a point a ce pas
Et a tel heure qu’on ne le croiroit pas
En conduisant nostre oeuvre par science
A l’espinglier quel don luy donrons nous
Nous en ferons vertu de pascience
Fille de sens & mere de constance
La vertu sert a toutes & a tous
Gardez ce bien nobles dames pour vous
Pascience c’est la fleur & digne perle
Des grans vertus dont on escript & parle
Se des espingles on picque perce & poingt
C’est espinglier qui endure l’office
Cueur pacient en sa vertu se point
Qui porte tout & si ne le sent point
Faict ne parolle injure ne malice
Pacience porte tout fors que vice
Car patience fuit tout peché par droit
Et aussi Dieu autrement ne vouldroit
Cest espinglier se doit riche estoffer
Pour presenter a princesse si noble
Signifiant qu’il se doit honnorer
Plus riche don ne peult Dieu conferer
C’est des grans biens le vert & le si noble
Cest espinglier vault plus que escu ne noble
Ceste vertu prennent en bonne part
Toutes dames qui en auront leur part
Le bort du drap qui seuffre les pointures
Des espingles nous est signifiance
Que pour pompes richesses ou vestures
Nous ne sommes que povres creatures
Subjectz a Dieu selon la providence
Pour ung plaisir ung cent de desplaisance
Si nous convient paciemment souffrir
Se corps & ames voulons a Dieu offrir
Pacience par raison enduree
Vainct desplaisir/ courroux/ despit & deul
Pacience de couraige portee
Conforte corps/ entendement/ pensee
Oste regretz tant du cueur que de l’oeil
Pacience despite tout orgueil
C’est des vertus l’estandart & penon
Pacience nous fault vueillons ou non