Chapitre .vii.
Une piece fault a ma dame avoir
De cramoisy le plus ardant qu’on face
A la parer n’espargneray avoir
Et si ne doit ne sentir ne sçavoir
Peché ou vice en quelque lieu ne place
Affin doncques que nostre habit perface
Ceste piece humblement luy presente
Qui servira a nostre oeuvre presente
La piece coeuvre le cueur & la forcelle
Le beau du corps & les nobles parties
L’estomach tient la challeur naturelle
Par fois se monstre/ par fois elle se celle
La piece saulve beaucop de maladies
La piece pare/ & laides & jolies
Ce qu’elle vault je le declaireray
Es plus briefz motz que faire le pourray
Chascune piece je l’ay appropriee
A la vertu ou elle peult servir
Ceste piece pour mieulx estre nommee
Vous soit ma dame dicte bonne pensee
Qui vous fera les vertus maintenir
Bonne pensee vous soit en souvenir
Qui pense bien ses oeuvres sont sans blasmes
Penser a mal perit hommes & femmes
Comme la piece cueur & fourcelle coeuvre
Et fait au corps moult de bien & santé
Bonne pensee entretient & recoeuvre
Le noble cueur en vertu & bonne oeuvre
Si dignement qu’il demeure en purté
Et lors se treuve de force conforté
Le cramoisy grace Dieu signifie
Qui les vices estaint & mortifie
Pensons en bien & tout bien nous viendra
Et reboutons pensees inutilles
Qui mal pense le vice le prendra
Puis vient peché qui tout desconfira
Par les pensees ce sont oeuvres subtilles
Entendez femmes soit de champs ou de villes
Par bien penser on suyt le train divin
Et par contraire on tresbuche en declin
Bonne pensee Dieu tousjours retribue
Car c’est celuy qui regarde le cueur
Et voit la ou la pensee se attribue
Affin que grace a celle distribue
Qui des vertus pense avoir la liqueur
Bonne pensee est de telle valeur
Si souveraine & vers Dieu auctentique
Qu’elle maintient ung cueur net & pudique