TRATTENEMIENTO III De la Jornata Primma.
_Peruonto, sciaurato de coppella, và pe ffare na sarcena a lo
vosco, usa no termene d’amorevolezza a ttre che ddormeno a lo Sole,
nne receve na fatazione; e burlato da la figlia de lo Rrè, le manna
la mmardezzione, che ssia prena d’isso, la quale cosa soccesse; e
ssapenno essere isso lo patre de la creatura, lo Rrè lo mette dinto
na votta co la mogliere e li figlie, jettannolo dinto mare: ma pe
bertute de la fatazione soja se libera da lo pericolo, e ffatto no
bello giovane, deventa Rrè._
_Mostraro tutte d’avere sentuto no gusto granne pe la consolazione
avuta da lo povero Prencepe, e ppe lo castico recevuto da chella
marvasa femmena: ma avenno da secotejare lo parlamiento Meneca, se deze
fine a lo vesvesiamiento de ll’autre, e essa commenzaje a ccontare lo
socciesso, che ssecota._
Non se perdette maje lo ffare bene: chi semmena cortesie, mete
beneficio; e cchi chianta amorevolezza, recoglie amorosanze: lo piacere
che se fa ad anemo grato, non fu maje sterele, ma ’ncria gratetudene,
e ffiglia premmie: se ne vedeno sprementate ne li continue fatte de
ll’uommene, e nne vedarrite esempio nne lo cunto, ch’aggio ’mpizzo de
fareve sentire.
Aveva na magna femmena de Casoria, chiammata Ceccarella, no figlio
nommenato Peruonto, lo quale era lo cchiù scuro cuorpo, lo cchiù
granne sarchiopio, e lo cchiù ssollenne sarchiapone ch’avesse crejato
la natura. Pe la quale cosa la scura mamma nne steva co lo core cchiù
nnigro de na mappina, e ghiastemmava mille vote lo juorno chillo
denucchio, che spaparanzaje la porta a sto scellavattolo, che non
era buono pe no quaglio de cane: pocca poteva gridare la sfortunata,
aprire la canna, ca lo mantrone non se moveva da cacare pe ffarele no
mmarditto servizio; a ll’utemo dapò mille ’ntronate de cellevriello,
dapò mille ’nfroate de zuco, e ddapò mille dicote, e ddissete, e grida
oje, e strilla craje, l’arredusse a ghire a lo vosco pe na sarcena,
decennole: ora maje è ora de strafocare co no muorzo, curre pe ste
llegna, non te scordare pe bia, e biene subeto, ca volimmo cocenare
quatto torze strascinate pe strascinare sta vita. Partette lo mantrone
de Peruonto, e ppartette comme và chillo, che stà mmiezo a li Confrate:
partette, e ccammenaje comme se jesse pe ccoppa a ll’ova co lo passo
de la pica, e ccontanno le ppedate, abbiannose chiano chiano, adaso
adaso, e ppalillo palillo, facenno sgamma a la via de lo vosco pe ffare
la venuta de lo cuorno, e comme fu mmiezo a na certa campagna, pe ddove
correva no sciummo vervesianno, e mormorejanno de la poca descrezzione
de le pprete, che le ’mpedevano la strata, trovaje tre guagnune, che
s’avevano fatto strappontino de ll’erva, e ccapezzale de na preta
selece; li quale a la calantrella de lo Sole, che le ccarfettejava
a pperpennicolo, dormevano comme a scannate. Peruonto, che bidde
ste poverielle, ch’erano fatte na Fontana d’acqua mmiezo na carcara
de fuoco, avennone compassione co la medesima accetta, che portava,
tagliaje certe ffrasche de cercola, e le fece na bella ’nfrascata.
Fra chisto miezo scetatose chille giuvene, ch’erano figlie de na
Fata, e bedenno la cortesia, e ammorosanza de lo Peruonto, le dezero
na fatazione, che le venesse tutto chelle, che sapesse addemannare.
Peruonto avenno fatto sta cosa, pigliaje la strata verzo lo vosco,
dove fece no sarcenone accossì spotestato, che ’nce voleva no straolo a
strascinarelo, e bedenno, ch’era chiajeto scomputo a ppoterelo portare
’ncuollo, se le accravaccaje ’ncoppa, decenno; o bene mio, se sta
fascina mme portasse camminanno a ccavallo; ecco la fascina commenzaje
a ppigliare lo portante, comme a ccavallo de Besignano, e arrevato
’nnante a lo Palazzo de no Rrè fece rote, e ccrovette da stordire: le
Ddammecelle, che stevano a na fenestra, vedendo sta maraveglia, corzero
a chiammare Vastolla la figlia de lo Rrè, la quale affacciatese a la
fenestra, e ppuosto mente a li repolune de la sarcena, a li saute de
na fascina, sparaje a rridere; dove pe nnaturale malenconia non se
arrecordava maje, ch’avesse riso. Auzata la capo Peruonto, e bisto ca
lo coffiavano, disse: O Vastolla; và, che puozze deventare prena de
sto fusto; e accossì dditto, strenze na sbrigliata de scarpune a la
sarcena, e de galoppo sarcenisco arrivaje subeto a la casa co ttanta
peccerille appriesso, che le facevano l’allucco, lo illaio dereto,
che se la mamma non era lesta a sserrare subeto la porta, l’averriano
acciso a ccuorpe de cetrangolate, e de torza. Ma Vastolla dopo lo
’mpedemiento de l’ordenario, e dapò certe sfiole, e pipoliamiente
de core, s’addonaje, ch’aveva pigliato la pasta, nascose quanto fu
possibile sta prenezza, ma non potenno cchiù nasconnere la panza, c’era
’ntorzata quanto a no vero tummolo: lo Rrè se ne addonaje, e ffacenno
cose dell’autro Munno, chiammaje lo Consiglio, decenno: Già sapite
ca la luna de lo nore mio ha fatto le ccorne: già sapite, ca pe ffare
scrivere croneche, overo corneche de le bregogne meje, m’ha provisto
figliama de materia de calamare. Già sapite, ca pe ccarrecareme la
fronte, s’ha fatto carrecare lo ventre; perzò deciteme, consigliateme.
Io sarria de pensiero de farela figliare l’arma primma de partorire na
mala razza; io sarria d’omore de farele sentire primma le ddoglie de
la morte, che li dolure de lo partoro. Io sarria de crapriccio, che
primma sporchiasse da sto munno, che ffacesse sporchia, e ssemmenta.
Li Consigliere ch’avevano strutto cchiù uoglio, che bino, dissero:
Veramente mereta no gran castigo, e dde lo cuorno, che v’ha puosto
’nfronte se deverria fare la maneca de lo cortiello, che le levasse
la vita: Non però se l’accidimmo mò, ch’è pprena, se n’escerà per la
maglia rotta chillo temmerario, che pe ve mettere dinto na vattaglia
de desgusto, v’ave armato lo cuorno dritto, e lo manco; pe v’ammezzare
la politeca de’ Tiberio, v’ha puosto ’nnante no Cornelio Taceto: pe
rappresentareve no suonno vero d’infamia, v’ha fatto scire pe la porta
de cuorno. Aspettammo addonca, ch’esca a ppuorto, e ssacciammo quale fu
la radeca de sso vetuperio; e pò pensammo, e rresorvimmo co no grano de
sale, che cosa n’averrimmo da fare.
Ncasciaje a lo Rrè sto conziglio, vedenno ca parlavano assestato, e
a ssepara: e pperzò tenne la mano, e ddisse: aspettammo l’eseto de
lo negozio. Ma comme voze lo Cielo, jonze ll’ora de lo partoro, e
co quatto doglie legge legge a la primma sciosciata d’agliaro, a la
primma voce de la mammana, a la primma premmuta pe cuorpo, jettaie
’n sino a la commare duje mascolune comme a duje pumme d’oro. Lo Rrè
ch’era prieno isso puro de crepantiglia, chiammate li Conzigliere
pe consegliare, loro disse: Ecco è ffigliata figliama, ma è tiempo
d’asseconnare co na saglioccola. Nò, dissero chille Viecchie sapute
(e tutto era pe ddare tiempo a lo tiempo) aspettammo, che se facciano
granne li pacionielle pe ppotere venire ’ncognizione de la fesonomia
de lo Patre. Lo Rrè perchè non tirava vierzo senza la fauzarega de lo
consiglio pe no scrivere stuorto, se strenze ne le spalle, appe freuma,
aspettaje ’nfi a ttanto, che li figliule furono de sette anne, ne lo
quale tiempo stimmolate de nuovo li Conzigliere a ddare a lo trunco,
e a dove tene, uno de loro disse: pocca non avite potuto scauzare
vostra figlia, e ppigliare lengua, chi sia stato lo monetario fauzo
ch’a la mmagene vostra ave auterato la corona, mmo nne cacciarrimmo
la macchia: ordenate addonca, che s’apparecchia no gran banchetto,
dove aggia da venire ogne Ttetolato, e gentel’ommo de sta Cetate, e
stammo all’erta, e co l’uocchie sopra lo tagliero, dove li piccerille
’ncrinano cchiù vollentiere vottate da la natura, ca chillo senz’autro
sarrà lo Patre, e nnuje subito ne l’auzammo comme cacazza de Ciavola.
Piacquette a lo Rrè sto parere. Ordenaje lo banchetto; commetaje tutte
le pperzone de ciappa, e de cunto, e mmagnato che s’appe, le ffece
mettere ’nfilo, e passiare li peccerille: ma nne fecero chillo cunto,
che faceva lo corzo d’Alisantro de li coniglie, tanto, che lo Rrè
faceva fortuna, e sse mozzecava le llavra; e benchè no le mancassero
cauzature, puro, perchè l’era stretta sta scarpa de doglia, sbatteva
li piede ’nterra: ma li Consigliere le dissero, chiano vostra Majestà
faciteve a ccorrejete, ca craje facimmo n’autro banchetto, no cchiù de
gente de portata, ma de cchiù bascia mano, fuorze, perchè la femmena
s’attacca sempre a lo ppeo, trovarrimo fra cortellare, paternostrare,
e mmercante de piettene la semmenta de la collera vostra, dove no
l’avimmo asciata tra Cavaliere. Deze a lo vierzo sta ragione a lo Rrè,
e ccommannaje, che se facesse lo secunno banchetto, addove pe banno
jettato venettero tutte li chiaise, fiercole, guitte, guzze, ragazze,
spolletrune, ciantelle, scauzacane, verrille, spoglia ’mpise, e gente
de mantesino, e zuoccole, ch’erano a la Cetate: li quale sedute, comm’a
belle Cuonte a na tavola longa longa, commenzaro a ccannariare: Ora mo
Ceccarella, che ssentette sto banno, commenzaje a sporonare Peruonto,
che ghiesse isso perzì a sta festa, e ttanto fece, che s’abbiaje a
lo mazzecatorio, dove arrivato appena, chille belle ninnille se la
azzecoliareno attuorno, e le facettero vierre, e cassesie fora de
li fora. Lo Rrè, che bedde ste ccose, se scippaje tutta la varva,
vedenno ca la fava de sta copeta, lo nomme de sta beneficiata era
toccato a no scirpio brutto brutto fatto, che te veneva stommaco, e
’nsavuorrio a bederelo schitto; lo quale otra che aveva la capo de
veluto, l’uocchie de cefescola, lo naso de pappagallo, la vocca de
cernia, era scauzo, vrenzoluso, che ssenza leggere lo Scioravante,
potive pigliarete na vista de li secrete, e ddapò no cupo sospiro,
disse: Che se n’ha bisto sta scrofella de figliema a ’ncapricciarese de
st’uorco marino; che se n’ha bisto a ddaresella ’ntallune co sto pede
peluso? ah ’nfamma cecata fauza, che mmetamorfose so ccheste? deventare
vacca pe no puorco, azzò ch’io tornasse piecoro; Ma che s’aspetta?
che se penza? aggia lo castigo che mmereta; aggia la pena che sarrà
jodecata da vuje, e llevatemella da nante, ca no la pozzo padejare.
Fecero addonca conzierto li Consegliere, e concrusero, che tanto essa,
quanto lo malefattore, e li figlie fossero schiaffate dinto na votte,
e ghiettate a mmaro, azzò senza allordarese le mmano de lo sango
propio, facessero punto finale a la vita. Non fu cossì priesto data
la sentenzia, che venne la votte, dove ncaforchiarono tutte quatto, ma
’nnante, che ’ntompagnassero, certe dammecelle de Vastolla chiagnenno
a selluzzo, nce mesero dinto no varrile de passe, e ffico secche, azzò
se jesse mantenenno, pe quarche poco de tiempo; ma serrata la votta fu
portata, e ghiettata a mmaro, pe dove jeva natanno secunno la vottava
lo viento. Tra chisto miezo Vastolla chiagnenno, e facenno doje lave
de l’uocchie, disse a Pperonto: Che ddesgrazia granne è la nostra ad
avere pe sebetura de morte la connola de Bacco? Oh sapesse a lo mmanco
chi ha trasecato sto cuorpo pe schiaffareme dinto a sta carcere.
Oimè, ch’io mme trovo spinolata, senza sapere lo comme. Dimme, dimme,
o crodele, e che percanto faciste, e con quale verga, pe chiudereme
dinto li chirchie de sta votte? dimme, dimme, chi diascance te tentaje
a mmetteremme la cannella ’nvisibile pe n’avere autro spiracolo a
la vista che no negrecato mafaro? Peruonto, ch’aveva fatto no piezzo
aurecchia de mercante, all’utemo respose: Si vuoie che te lo ddico, tu
damme passe, e ffico. Vastolla pe cacciarele da cuorpo quarche ccosa,
le mese ’ncuorpo na vrancata de l’uno, e de l’autro; lo quale comm’appe
chiena la gorgia, le contaje puntualmente quanto le soccedette co li
tre Giuvene, po co la sarcena, utemamente co essa a la fenestra, che
pe ttrattarelo da panza chiena, le fece ’nchire la panza. La quale
cosa sentuta la povera Signorella pigliaje core e disse a Pperuonto:
Frate mio, e vorrimo sbottare la vita dinto sta votte? perchè non
faie che de sto vasciello se faccia na bella Nave, e ghire pe scappare
sto pericolo a buono puorto? e Pperuonto leprecaje. Tu damme passe, e
ffico, si vuoje che te lo ddico. E Vastolla subeto lesta, le ’nchiette
la canna, perchè apresse la canna; e comme pescatrice de Carnevale co
li passe, e ffico secche le pescava le pparole fresche da cuorpo; ed
ecco che decenno Peruonto chello, che desiderava Vastolla, la votte
tornaje Navilio, co ttutte li sarziamme necessarie a nnavecare, e co
tutte li marinare, che besognavano pe lo servizio de lo vasciello: e
lloco te vediste, chi tirare la scotta, chi arravogliare le ssarte, chi
mettere mano a lo temmone, chi fare vela, chi saglire a la gaggia, chi
gridare ad orza, chi appuggià, chi sonare na trommetta, chi dare fuoco
a li piezze, e chi fare na cosa, e chi n’autra: tanto che Vastolla era
dinto la Nave, e nnatava dinto no mare de docezza, essenno già l’ora
che la Luna voleva jocare co lo Sole a ghiste, e beniste, e lo luoco te
perdiste: disse Vastolla a Pperuonto: Bello Giovene mio, fa deventare
sta Nave no bello Palazzo, ca starrimmo cchiù ssecure. Saie, che se
sole dicere; lauda lo maro, e ttienete a la terra: e Pperuonto respose:
Si vuoje che te lo ddico, tu damme passe, e ffico, e essa subeto le
refose lo fatto, e Pperuonto pigliato pe ccanna ademmannaje lo piacere;
e ssubeto la Nave dette ’nterra, e ddeventaje no bellissimo Palazzo
apparato de tutto punto, e cossì chino de mobele, e sfuorgie, che non
c’era cchiù che desiderare; pe le quale cose Vastolla, ch’averria dato
la vita pe ttre calle, non l’averria ’mpattato co la primma Segnora de
sto munno, vedennose regalata, e sservuta comme na Regina; pe ssigillo
de tutte le bone fortune soje, pregaje Pperuonto ad ottenere grazia de
deventare bello, e ppolito, azzò s’avessero potuto ngaudiare ’nsiemme;
che se be dice lo Proverbio: Meglio è mmarito porciello, ch’ammico
’mparatore, tutta vota si isso avesse cagnato ’nfaccia, l’averria
tenuto per la cchiù gran fortuna de lo munno; e Pperuonto co lo
medesemo appontamiento respose: Damme passe, e ffico, se vuoje che te
lo ddico; e Vastolla subeto remmedejaje a la stitichezza de le pparole
de Peruonto co le ffico jedettelle, ch’a ppena parlato tornaje da
scellavattolo cardillo, da n’uorco Narciso, da no mascarone pipatiello;
la quale cosa veduto Vastolla, se ne jette ’nsecoloro pe l’allegrezza,
e strignennolo dinto le braccia, nne cacciaje zuco de contentezza. A
sto medesemo tiempo lo Rrè, che da chillo juorno, che le soccese sto
desastro, era stato sempre chino fi ’n canna de lassame stare, fu da li
Cortisciane suoje portato pe rrecreazione a ccaccia; dove cogliennole
notte, e bedenno lucere na locernella a na fenestra de chillo palazzo,
mannaje no servetore a bedere se lo volevano alloggiare; e le fu
respuosto, ca ’nce poteva non sulo rompere no bicchiero, ma spezzare
no cantaro: perzò lo Rrè nce venne, e sagliendo le grade, e scorrenno
le ccammare, no vedde perzona vevente, sarvo, che li duie figliule,
che le jevano ’ntuorno decenno, vavo, vavo, vavo. Lo Rrè stopafatto,
strasecolato, attoneto steva comme ’ncantato, e ssedennose pe stracco
vicino na tavola, lloco vedde ’nvisibelemente stennere mesale de
Sciannena, e benire piatte chine de vaga, e de riesto, tanto che
mmagnaje, e veppe veramente da Rrè, servuto da chille belle figliule,
non cessanno maje, mentre steva a ttavola na museca da calasciune, e
ttammorielle, che le jeze pe fi a l’ossa pezzelle. Magnato ch’appe,
comparse no lietto tutto scumma d’oro, dove fattose scauzare li
stivale, se jette a ccorcare, comme fece ancora tutta la corte soja,
dopo avere buono cannariato a cciento autre tavole pe ll’autre cammare
apparecchiate. Venuta la matina, e bolenno partire lo Rrè, se voze
portare co isso li duje peccerille, ma comparza Vastolla co lo marito,
e ghiettatose a li piede suoje, le cercaje perdonanza, contannole tutte
le ffortune soje. Lo Rrè che vedde guadagnate duje nepute ch’erano doje
gioje, e no jennero, ch’era no fato, abbraccianno ll’uno, e ll’autro,
se le pportaje de pesole a la Cetate, facenno fare feste granne, che
dduraro mute juorne pe sto buono guadagno, confessanno asfastio de le
gargie soie,
_Che se propone l’ommo, Dio despone._