Timudem man ¡oh imnas! ni ayat,
ti un-unnoy toy secnan ni rigat
imatangam ¡oh puso! quet imutectecannac
anusem á pali-ioen toy dacsangasat.
Dacsangasat cunac ata maipusay
toy naldaang unay á bangcay;
ngem ni laguip dinto met bumalacday
agnanayonto laeng nga sitatarubay.
Cas panagpacada daguitoy á innac balbalicsen
ta toy baguic maipanao cadaguita taeng,
taeng ni ragsac, liolioa á innac lac-amen
dinto met mapunas á innac panpanunuten.
Silaladingit toy pusoc á agpacada
adios laing; napusacsac á azucena
iti sayumusom ti barucongco ipenpennaca
tapno dinto maumag ti agdaplay á banglona
Siaddaacto laeng ti taeng ni alinaay
ta detoy panunut salensenán ni tarumpingay
turubayennacto ni napait á liday
quet isunto cañac ti mangay-ay-ay.
Dios ti cumoyog, oh napnuan sayacsac
nga esmanto daguiti agay-ayat;
Dios ti cumuyog, salimetmetmo mangalasag
ta tapno dayta sudim, tacnengmo ti di maracrac.