Produced by Laurent Vogel and the Online Distributed
Proofreading Team at https://www.pgdp.net (This file was
produced from images generously made available by the
Bibliothèque nationale de France (BnF/Gallica) at
http://gallica.bnf.fr)
Livre d'amours: ouquel est relatee
La grant amour: et façon par laquelle
Pamphille peut: jouyr de galathee
Et le moyen: qu'en fist la maquerelle
Le dieu d'amours qui par amour loial
Voulut aymer du monde la plus belle
Tant par amours que son palais royal
Prendre voulut et eslire avec elle
Par sa bonté infinie eternelle
Acroisse bruit au puissant roy de france
Charles huittiesme pour lequel en substance
De pamphille et galathee saige
Traicté d'amours j'ay les faitz a plaisance
Pour passer temps car sans quelque doubtance
Siege d'amours gist en noble couraige
Qui aime bien n'est jamais desloyal
Mais doulx bening et gracieux a celle
Qu'il veult aimer sans penser a nul mal
La vraye amour doit tousjours estre telle
Qui veult aymer dame ou damoiselle
De pamphille maintienne l'ordonnance
Et compasse ses faitz par attrempance
Sans se monstrer instabile et vollaige
Soit doulx parlant en termes d'ellegance
Si trouvera comme en toute naissance
Siege d'amours gist en noble couraige
Les haultz princes ont a pié et cheval
Servi amours et tenu leur querelle
Joustes faisant par tout amont aval
Tournes plaisans a la mode nouvelle
Mais pamphille par une maquerelle
L'assault gaigna: sans frapper a oultrance
Sans se tuer et sans rompre la lance
Galathee sumist en son servaige
Et si monstra que venus par puissance
Luy secourut et qu'en telle aliance
Siege d'amour gist en noble couraige
Prince puissant mon chief mon asseurance
Mon seul escu et ma seulle esperance
Prenez a gré ce trespetit ouvraige
Cest passe temps une resjouyssance
Et si voit on dedans que en ceste dance
Siege d'amours gist en noble couraige
Comme pamphille amoureux de galathee commence ses complaintes de tant
qu'il ayme et ne l'ose declairer et dit
[V]ulneror et clausum porto sub pectore tellum
Crescit et assidue plaga dolorque michi
D'ung glaive agu suis vulneré
Et porte dessoubz ma poitrine
Le glaive qui m'a vulneré
Duquel n'ose monstrer le signe
La playe croist et ne decline
Point la douleur en moy enclose
Tel est batu qui plourer ne ose
Et ferientis adhuc non audeo dicere nomen.
J'ay sus une mon cueur assis
Je ne sçay se g'y perviendray
Mais se une fois en grace suis
Je feray ce que je vouldray
C'est hault lieu mais g'y pretendray
Si voit on ce que je doy craindre
A trop embrasser pou estraindre
Je ne sçay s'elle m'ayme ou non
Mais je croy qu'elle m'aimera
Et si n'ose dire son nom
Par moy point on ne le sçaura
Je pense que elle accordera
A moy/ mais en tel differance
Moult remaint de ce que fol pense
Nec sunt aspectus/ plaga videre suos
Ma plaie croist en toutes pars
Et ne veult pas tant seulement
Laisser qu'on voye ses regars
Pour me donner guarissement
Mais encore finablement
Se je parvien a mon entente
Je n'y pers que la longue attente