Demande.
Un jonencel fut jadis qui n'avoit oncques sceu que c'estoit de pensser.
et on lui enseigna une damoiselle moult sage qui lui bailleroit assez a
penser. il se mist a chemin. et en sa voie encontra .xii. chevaliers a
trois fois. Desquelz les quatre premiers estoient vestus de blanc. Et
les quatre aprez estoient vestus de vermeil. Et les quatre derreniers
estoient vestus de verd. Le jonencel quant il fut parvenus a la dame. Il
la requist qu'elle lui donnast matere de penser. Et elle lui demanda
s'il n'avoit personne rencontré en sa voie. Il respondi qu'il avoit veu
quatre chevaliers vestus de blanc. puis autre quatre vestus de vermeil.
et au derrenier quatre autres vestus de verd. Ores dist la damoiselle/
ces quatre que premiers avez encontré vestus de blanc sont mes oncles de
par ma mere Et les quatre que avez rencontré vestus de vermeil sont mes
oncles de par mon pere. Et les quatre vestus de verd sont mes filz et de
tous les .xii. j'ay espousé le pere et si sont tous nez de loyal
mariage. Or pensez comment ce puet estre.
Response.
Le jonencel moult esmerveillié commença fort a penser sur ceste demande/
mais en fin retourna vers la damoiselle et la pria qu'ele lui voulsist
donner l'entendement de sa question/ la damoiselle courtoise lui dist en
ceste maniere. Ce chevalier ici present se maria a une damoiselle vesve
qui avoit une fille. Et de celle vesve sont issus ces quatre premiers
chevaliers vestus de blanc puis trespassa leur mere. Et tantost ce
chevalier se remaria a une dame vesve laquelle avoit un filz et d'icelle
vesve vindrent ces quatre chevaliers vestus de vermeil. Aprés ce il fist
le mariage de la fille de sa premiere femme et du filz de sa seconde
duquel mariage je suis venue. Et tantost aprés la femme de ce chevalier
icy et mon pere et ma mere trespasserent. Cestui chevalier me prist en
sa garde/ et tant me nourrist que moy venue en eage il me prist en
mariage et engendra en moy ces quatre chevaliers vestus de verd que
derrainement encontrastes/ et ainsi savez la maniere de la devinaille
Autre demande.
Jehan. pierre. et guilame ont une botte plaine de vin contenant
.xviii.C. los. Or sont d'acord que jehan en aura plus que pierre. et
pierre plus que guillame. jehan y fait une broche dont le pertuis est si
apoint que en tirant icelle seule le vin seroit hors en six heures
pierre y fait une broche et un pertuis par lequel tout le vin seroit
hors en .ix. heures se autre pertuis n'y avoit. et guillame y fait une
autre broche laquele se tiree estoit et que point d'autre n'y eust le
vin seroit hors en .xviii. heures Ce fait ilz apportent chascun un
vaissel dessoubs leurs broches et d'un accord cascun tire sa broche a
une fois. assavoir en quantes heures sera la botte vuide/ et combien
chascun aura de vin.
Response.
Tout le vin sera hors en .iii. heures et aura jehan par sa broche .ix.C.
los pierre par la sienne .vi.C. et guillame par sa broche .iii.C. et
ensi seront content.
Autre demande.
Trois escuiers ont d'un accord acheté .ix. chevaux dont le premier
cheval a cousté six frans. Le second .viii. frans. le tiers .x. frans.
le quart .xii. frans. le .v.e .xiiii. frans. le .vi.e .xvi. frans. le
.vii.e .xviii. frans. le .viii.e .xx. frans Et le .ix.e .xxii. frans. Or
sont les chevaux en l'estable pour partir et en doit avoir chascun des
escuiers trois. Le marchant est venu pour avoir son argent. Comment aura
chascun escuier trois chevaux si egalement partis que chascun en soit
content/ et que l'un en paye autant que l'autre. et combien chascun
paiera.
Reponse.
L'un des escuiers aura le premier cheval. le .v.e et le .ix.e Le second
escuier aura le tiers cheval. le .iiii.e et le .viii.e Et le tiers
escuier aura. le second cheval. le .vi.e et le .vii.e. Et payera chascun
escuier .xlii. frans justement.
Autre demande.
Un preudhomme s'est parti de son hostel pour aler oyr messe. et a pris
de l'argent en sa main pour donner pour dieu. En sa voye encontra un
povre homme qui lui demanda l'aumosne. Le preudomme ouvry sa main et
trouva qu'il y avoit plus la moitié d'argent que mis n'y avoit et voit
bien que son argent est doublé a moittié. Si donna au premier povre .vi.
deniers. puis passa oultre vers l'eglise et tantost il rencontra en sa
voie un autre povre auquel aprés qu'il lui eust demandé l'aumosne il lui
cuidant donner ouvri sa main et vey que son argent estoit doublé a
moitié comme devant. Lui donna .vi. deniers comme il avoit fait au
premier et garda son demourant d'argent. Le preudhomme passa oultre vers
l'eglise et tantost lui vint audevant le tiers povre qui comme les
autres lui demanda l'aumosne. et quant il ouvri sa main il trouva son
argent doublé semblablement comme les autres fois. si donna a ce povre
.vi. deniers et lors ne lui demoura plus d'argent en sa main. Or est
assavoir combien d'argent avoit le preudhomme quant il se parti de sa
maison.
Response.
Le preudhomme avoit .v. deniers et une mitte quant il vint au premier
povre et lors son argent doubla si eut .x. deniers et maille dont il lui
donna les .vi. deniers et ainsi ne lui demoura que quatre deniers et
maille. Et quant il doubla pour le second povre il eut .ix. deniers
auquel il en donna les .vi. ainsi ne lui en resterent que trois qui lui
doublerent pour le tiers povre auquel il les donna. et ainsi ne lui
demoura riens.
Aincoires une demande.
Un preudomme fut qui avoit .v. filz lequel en son vivant fist son
testament et ordonnance derreniere. A l'aisné de ses filz donna un
denier et la .vi.e partie de tout son avoir. au second filz donna deux
deniers et la .vi.e partie de tout son avoir. Au tiers filz il donna
trois deniers et la .vi.e partie du demourant. Au quart filz donna
quatre deniers et la .vi.e partie de son argent. Et au .v.e donna .v.
deniers et la .vi.e partie comme aux autres. Or est assavoir combien le
pere avoit vaillant. Car quant la parchon fut faitte chascun en eut
autant l'un que l'autre.
Response.
Le preudomme avoit justement vaillant .xxv. deniers et non plus. et
chascun de ses cinq filz eut .v. deniers a parchon/ comme il apperra par
ce compte. Le premier eut un denier. et la .vi.e partie de .xxiiii.
deniers qui sont .iiii. deniers. Le second eut deux deniers et la .vi.e
partie de .xviii. deniers qui sont trois. Et le tiers filz eut trois
deniers et la .vi.e partie de douze deniers qui sont deux deniers. Le
quart eut quatre deniers et la .vi.e partie de .vi. deniers qui est un.
Et ainsy reste justement au .v.e filz .v. deniers qui demeurent et non
plus.
Autre demande.
Trois freres sont qui ont une soeur a marier. Dist le moyen frere au
plus jone. Mon frere il nous fault marier nostre sereur. je te prie
donne lui aucune chose du tien. et je te promés que je lui donneray deux
fois autant comme tu lui donneras. Le jone dist que volentiers le
feroit. Lors dist l'aisné des freres. et je lui donneray deux fois
autant que vous deux lui donnerez. Et quant ilz lui eurent tout donné
ainsy comme dit est elle eut trois deniers en tout. Or est assavoir
combien chascun lui a donné.
Response.
Le plusjone lui donna le tiers d'un denier. le second deux tiers et le
tiers deux deniers/ qui sont a point trois deniers.
Autre demande.
J'ay esté au change pour changier un flourin en menue monnoie Et le
changeur dist qu'il n'a que deux manieres de monnoie dont mon flourin
vault .xxx. pieces de l'une des monnoies et de l'autre il n'en vault que
.xx. pieces et je lui ay dit que j'en veuil avoir de toutes les deux
manieres pour mondit flourin. laquele chose il m'a fait. Or est assavoir
quantes pieces il m'a baillié de la monnoie de .xxx. et quantes de la
monnoie de .xx.
Response.
Il vous a baillié .xxi. pieces de la monnoie de .xxx. et .vi. pieces de
la monnoie de .xx. et ainsy avez le vostre et devez estre content.
Une demande que fait le pere a son filz.
Beau filz se tu avoies avec ton eage aincoire deux eages comme tu as. et
la moitié d'un tel eage comme est le tien. avec le quart de ton eage.
quans ans cuideroies tu avoir.
Response.
Mon pere sachiez que je auroie cent ans justement et non plus. car j'ay
de age .xxvi. ans et .viii. mois. Et se vous le multipliez par la
maniere dicte vous en trouverez .Cent.
Autre demande.
Un arbalestrier a trait une vire si longue et d'un si fort arbalestre
que la moitié de la vire est oultre le bersail. et la tierce partie est
dedens le bersail. et aincoires est demouré d'icelle vire .iiii. poulces
et demi au lez devers le trait. Assavoir combien ladicte vire a de long.
Response.
La vire a de long .xxvii. poulces justemnent. dont les .xiii. et demi
ont passé le bersail. et les .ix. poulces sont dedens le bersail et
.iiii. poulces et demi qui sont apoint .xxvii.
Autre demande.
Il y a une place devant une eglise en un village laquele est tenue de
.iiii. seigneurs. Et quiconques se combat en icelle il fourfait .lx.
solz d'amende a partir aux .iiii. seigneurs. dont l'un d'iceulx a le
tiers. le second la quarte partie le tiers y a la quinte partie. et
l'autre la .vi.e partie. Or est avenu que un malfaiteur a fourfait
icelle amende et l'a payee au receveur commis a ce par lesdis seigneurs.
Le receveur vient a ses maistres pour les paier. et dist au premier
Tenez monseigneur vela .xx. solz pour vostre tiers. Puis dist au second.
Monseigneur vous devez avoir un quart qui sont .xv. solz tenez les vela.
Au tiers dist. Sire vous devez avoir un quint/ qui est .xii. solz. et au
quart dist tenez vela pour vostre .vi.e .x. solz Les seigneurs chascun
bien content de sa porsion se departent et toutesfois en demeure au
receveur trois solz.
Autre demande.
Nagaires estoient logiez gens d'armes en un village ou point de vin
n'avoit. si envoierent leur hoste a un autre village pres d'illec ou il
en y avoit pour en rapporter quatre los. Le bon homme avoit deux
bouteilles l'une de .v. los. et l'autre de trois los lesqueles il prist
et s'en ala. en son chemin rencontra un sien voisin qui venoit du vin a
tout une bouteille tenant .viii. los plaine de vin et plus n'avoit
demouré de vin en la taverne. pourquoy le bon homme pria tant icellui
son voisin qu'il lui ottroya la moitié de son vin. Or sont moult
empeschié comment ilz le porront justement mesurer sans avoir autre
mesure
Response.
Premierement ilz emplirent la bouteille de trois los. et d'icelle le
jetterent en celle de .v. puis de rechief emplirent celle de trois et
aincoires la jetterent en celle de .v. dont il en demoura un lot en
celle de trois. puis vuiderent celle de .v. en celle de .viii. et mirent
le lot de celle de trois qui demouree y estoit en celle de .v. et
remplirent celle de trois/ et ainsy en eut quatre los justement sans
autre mesure.