_En qué manera se gana ó se pierde el señorio de las cosas que son
raiz, que algunt home desampara._
Desamparando algunt home alguna su cosa que fuese raiz porque se non
pagase della, luego que de ella saliese corporalmiente con entencion
que non quisiese que fuese suya, dende adelante quien quier que
primeramente la entrase ganarie el señorio della. Mas si él non
saliese de la cosa, maguer dixiese que non querie que fuese suya dende
adelante, con todo eso en quanto él la toviese asi non la podrie otro
ninguno entrar, et si la entrase non ganarie el señorio della fasta que
corporalmiente saliese della et desamparase la tenencia. Otrosi decimos
que si algunt home desamparase alguna su cosa que non osase ir á ella
por miedo de enemigos ó de ladrones, que ninguno non la puede entrar,
et maguer la entrase non ganarie el señorio della; ca como quier que
este atal desamparase la tenencia corporalmiente, con todo eso retiene
en su voluntad el señorio de la cosa, et por ende non debe ninguno nin
puede entrarla.