_Cómo gana home el señorio de las cosas muebles que desamparan ó echan
de sí._
Despáganse los homes á las vegadas de algunas cosas que han, et
desampáranlas et échanlas de manera que non quieren que sean suyas. Et
por ende decimos que quando algunt home echare alguna cosa suya mueble
con entencion que non quiere que sea suya, que quien quier que la tome
primeramente et la lieve, que gana el señorio della et será suya dende
adelante, fueras ende si la cosa que echasen asi fuese siervo enfermo
ó ferido que echase ó desamparase su señor; ca este atal por tal
echamiento como este se torna libre luego que lo desampara el señor:
et maguer otro alguno lo levase, et pensase dél et lo guaresciese, con
todo eso non ganarie el señorio dél. Otrosi decimos que las cosas que
los homes echan en la mar con cuita de la tormenta, que non pierden el
señorio dellas, asi como diremos en la quinta Partida de este libro en
las leyes que fablan en esta razon.