_Qué gualardon deben haber los barruntes et los que van tomar lengua de
los enemigos._
Barruntes son llamados aquellos homes que envian para andar con los
enemigos et saber su fecho dellos, porque aperciban á aquellos que
los envian que se puedan guardar de manera que les sepan facer daño
et non lo resciban: et estos deben catar sabiduria et arte para saber
verdaderamente fecho de los enemigos porque á los suyos puedan dar
certedumbre dellos: ca esta es cosa que conviene mucho á los que
estan en guerra. Otros hi ha que van tomar lengua: et esto es quando
los homes quieren ir en hueste ó en cabalgada, et non saben fecho de
los enemigos ciertamente, et envian algunos homes que tomen home ó
muger el primero que fallaren porque puedan haber sabiduria dellos.
Et como quier que tambien los barruntes que deximos como estos es su
oficio de dar sabiduria á los suyos de los enemigos, con todo esto ha
departimiento entrellos; ca los barruntes la han de dar por sí, et los
otros por los que prisieren. Et porque esto non se puede facer sin
grant peligro, pusieron los antiguos que fuesen pagados de aquello que
con ellos hobiesen puesto ante que la particion ficiesen; et sin esto
todo lo que ganasen yendo á aquel fecho debe seer suyo quitamente;
ca derecho es que asi como quando esto non ficiesen lealmente deben
rescebir muerte por ello, otrosi es mucho guisada cosa que hayan
gualardon quando bien lo ficiesen.