_Qué cosa han de catar los caballeros quando cabalgaren._
Mantenerse deben los caballeros segunt dixieron los sabios antiguos en
manera que ellos fagan buena vida et den buen enxemplo á los otros:
et por ende posiéronles entonce maneras ciertas [813] de como viviesen
tambien en su cabalgar, como quando comiesen ó bebiesen, ó quando
hobiesen á dormir; et ordenáronlo desta guisa, que quando hobiesen
de cabalgar por villa que non cabalgasen sinon en caballos quien los
podiese haber: et esto fecieron porque van en ellos mas honrados que
en ninguna otra cabalgadura; et otrosi porque usasen el cabalgar que
es cosa que pertenesce mucho á los caballeros, et porque andan en los
caballos mas lozanos et mas alegres, et aféytanlos por ende mejor et
mas á su guisa. Et aun mandaron que quando hobiesen de cabalgar fuera
de alguna villa en tiempo de guerra que fuesen [814] en sus caballos
armados en manera que si acaesciese podiesen facer daño á sus enemigos
et guardarse de lo rescebir dellos. Otrosi establescieron que quando
cabalgasen non levasen otros en pos de sí: et esto fecieron porque non
tolliesen la vista al que fuese en la siella, et porque non semeiase
que lieva troxa; ca estas son cosas que peor parescen al caballero que
á otro home, porque son enatias et desapuestas. Et otrosi posieron
que quando cabalgasen por villa que troxiesen todavia [815] mantos,
fueras ende si feciese tal tiempo que gelo destorvase: et sobre todo
establescieron que el caballero quando cabalgase que levase todavia el
espada cinta, que es asi como hábito de caballeria.