_Que los caballeros deben seer sabidores para saber obrar de su
entendimiento._
Entendudos seyendo los caballeros asi como diximos en la ley ante
desta, como quier que valdrien por ello mas, con todo eso non les
ternie pro si non lo sopiesen meter en obra: ca maguer el entendimiento
les mostrase que debien haber poder para defenderse, si sabidoria non
hobiesen para saberlo facer, non les valdrie nada; ca la obra aduce al
home á acabamiento de lo que entiende, et es asi como espeio en que se
muestra su voluntad et el su poder quál es. Et por ende conviene que
los caballeros sean sabidores et ciertos para saber obrar de lo que
entendieren, ca en otra manera non podrien seer complidamiente buenos
defensores.