_Quál debe ser el posadero del rey, et qué es lo que pertenesce á su
oficio._
[291] Posadero es llamado aquel que da las posadas á la compaña del
rey, et él ha de llevar un pendon de su señal, et ir un dia ante con
él, porque los homes sepan aquel lugar do el rey ha de ir á posar. Et
este, sin otras bondades que debe haber en sí, debe ser entendido et de
buen seso, porque sepa conoscer los homes, et darles posada á cada uno
dellos segunt qual home fuere, et el lugar que toviere con el rey, et
debégelas dar de manera que non reciban daño nin grant agraviamiento
aquellos cuyas fueren. Et á él pertenesce departir las contiendas que
acaescieren entre los homes en razon de las posadas, porque él ha poder
de juzgar qual de aquellos entre quien fuere la contienda debe haber
la posada. Et seyendo el posadero atal, et faciendo su oficio bien,
débele el rey amar et facer bien et merced; et si errare en ello, debe
haber pena segunt el yerro que feciere.