Eglogue Pastorale, ou Sonnets heroiques,
Si par mainte Elegie on m'à veu resjouir,
Les aureilles de ceux qui m'ont voulu ouyr,
Je ne veux à present ce Labeur entreprendre
Pour d'un stile joyeux quelque liesse prendre.
Tramper je veux ma plume au lac d'Aigre Douleur,
Et qu'au lieu d'estre blanche, elle ait noire couleur
Signifiant le dueil que mon triste cueur porte
De voir soubs un Tombeau une personne morte,
Ceste personne, Helas, dont le corps est destruict,
Avoit assez remply la Gaule de son bruict,
Sans qu'on deust reciter par expresse Escriture
Les haults dons qu'il avoit, & graces de nature,
Mais le triste regret du Peuple pour sa Mort
Me contrainct de plorer un tant noble homme mort,
Et croy, amy lecteur, qu'en lisant l'ortographe
De son nom excellant mis sur son Epitaphe,
Avec moy espandras plus de souspirs et pleurs
Que Pomone n'avoit en son jardin de fleurs.
Las, c'est Jean Bouchetel, ce Royal Secretaire
Duquel les grands valeurs ma Muse ne peut taire,
Car les haultes vertus dont florissoit son nom
Doibvent éterniser son illustre renom.
Bourges qui fut le lieu de sa noble naissance,
Et qui de son Scavoir avoit la cognoissance,
Ayant sceu le trespas d'un homme tant perfaict,
Un si horrible cry et grand dueil en à faict,
Que toutes les forests et prochaines vallees
Se sont d'Arbres, de fleurs, et de fruict despoillees.
Et les prochains ruisseaux ont augmenté leurs cours,
Des pleurs de ses amys qui pleurent tous les jours
Le trespas de celluy, qui en haulte apparence
De grand Esprit, avoit servy deux Roys de France,
Le Secretaire estant de leurs commandemens,
En grand pris et honeur de tous entendemens.
Aussi tost que la Mort, furieuse Chimere,
Feit à ce Bouchetel sentir la poincte amere
De son Dard venimeux, & que le Peuple oyant
Si piteuse nouvelle, estoit tout larmoyant,
Et mesloit à ses pleurs une triste complaincte,
Des Pégasides Seurs la troupe docte & saincte
Du mont Pernasse ouyt les regrets & douleurs
Du Peuple Berruyer, qui fondoit tout en pleurs,
Et pource que ces Seurs avoyent tousjours prisé,
Ce noble Secretaire, et fort favorisé
A ses doctes Escrits, à sa plume doree,
Et à sa Poesie aux Gaules adoree,
Apres avoir ouy la desolation
Du Peuple regrettant telle perfection,
Elles laissent leur mont plaisant et delectable
Pour toutes assister au Tombeau lamentable
De ce corps deslié d'un Esprit precieux,
Qui desja place avoit au sainct repos des Cieux,
Qui est aux bons Espris le promis heritage.
Allons, mes Seurs, allons (dict Calliope sage)
Voir le triste cercueil du noble Bouchetel,
Qui pour vivre sans fin, laisse son corps mortel,
Allons ouyr les cris de ce Peuple fidele
Ou fut de nostre amy la Terre naturelle.
Allons pour consoler ses amys et parens,
Ses filles, et ses fils en honeur apparens.
Car vous scavez, mes Seurs, qu'un tel Esprit cupide
Fut à nous honorer, translatant d'Euripide
De Grec en son Francois les beaux tragiques vers
Qui au nom d'un grand Roy ont bruict par l'univers.
Vous scavez, je le scay, que sa plume excellante
Tousjours au bien public à esté vigilante,
Vous scavez quel honeur par sa noble nature
Il à tousjours porté à la litterature,
Et de quelle faveur il à usé vers ceux
Qui n'ont en Poesie onc esté paresseux.
Donc si nous luy avons faict honeur en sa vie,
N'ayons apres sa Mort moins favorable envie,
Que dy je Mort, mes Seurs, ceux la ne meurent pas
Qui ont los immortel à l'heure du trespas.
Soubdain que Calliope accomplie en Scavoir
Prononcea ces propos, elle feit émouvoir
Ses amiables Seurs, de laisser en arriere
Leur sainct Sejour, pour voir la ville Berruyere,
Ou le Peuple faisoit un dueil triste & amer
Pour cest homme excellant qu'on vouloit inhumer,
Adonc ces belles Seurs sainctes, & immortelles,
Pour tost y assister, se preparent des Esles,
Comme jadis alors que le faux Pirenee
Les esperoit forcer d'une amour effrenee.
Ainsi elles voloyent aussi legerement
Comme voloit jadis Mercure promptement
Lors que pour accomplir le vueil de Juppiter,
Le Berger à cent yeux il vint descapiter.
Donc ces belles neuf Seurs en Scavoir excellantes
S'en vont parmy les Cieux legerement volantes,
Jusqu'a ce qu'elles voyent de Berry la Contree
Ou de Bourges leur est la ville rencontree,
Ville de grand valeur, ou les loix et les arts
Florissantes on voyt, et ou l'un des Cesars
Feit faire (comme on dict) ceste puissante Tour
Qui de ses ennemys se défend alentour,
Ville qui est bornee aussi de maintes villes,
De chasteaux, & de bourgs, et de terres fertiles,
De rivieres d'estangs, et de coulans ruisseaux
Ou poissons delicats nagent dedans les eaux,
De vignobles aussi de Bacchus non indignes
Auquel tous sont debteurs les culteurs de noz vignes,
Et sur tout d'ysouldun la liqueur excellente
Des vins, est au pais doucement violente,
Vins pour faire banquets, et grand festivité,
Bien que ce soit le lieu de ma nativité.
Grand admiration receurent ces neuf Muses
De voir de ce pais les Richesses diffuses.
Si tost qu'en ceste ville ou lon faisoit le dueil,
Elle virent le Peuple espandant larmes d'oeil,
Une griefve douleur va saisir leur Poictrine
Pour le dueil qu'on faisoit du Pere de Doctrine,
Et du bon Mecenas de Poésie aussi,
Du noble Bouchetel, le Seigneur de Saci,
Et n'eust esté que c'est le naturel des Dieux
Des Déesses aussi, n'espandre l'armes d'yeux,
On eust veu tant plorer les filles de Mémoire,
Qu'on eust veu de leurs pleurs un lac grand, comme Loire,
Toutefois pour monstrer leurs ennuys et douleurs,
Elles feirent de grands souspirs au lieu de pleurs,
Et d'un habit de dueil elles se sont parees,
Pour à la sepulture estre mieux preparees.
Le Peuple désolé en conduisant le corps
Mesloit aux pleurs les cris, faisant tristes accords,
D'autre costé la Mort espouventable et fiere
Fort se glorifioit de voir en une Biere
Le corps par elle occis, pource qu'il est charnel,
Car son pouvoir n'ha rien sur l'Esprit éternel.
Le Peuple Berruyer voyant en l'Er la Mort
Tant se glorifier de ce noble corps mort,
Ses pleurs change en vengence, et son dueil en grand ire
Et tous ces mots piquans à la Mort il va dire.
Je m'esbahis comment, o laid Monstre, inhumain,
Monstre horrible, & cruel, repeu de sang humain,
Tu es tant effrené, et plein de violence,
De tousjours faire effort à la grand excellence.
O Chimere insensee, enragee Atropos,
Pourquoy troubles tu tant des humains le repos,
Te monstrant la plus grand de toutes les meurtrieres
De nous priver souvent des choses singulieres?
Il ne te suffist pas de mettre fin amere
Aux enfans nouveaux nez du ventre de leur mere,
Qui (s'ils eussent vescu) de sublime vertu
Eussent abondamment eu l'Esprit revestu,
Mais à ceux qui font fruict à une République
Tu fais sentir l'effort de ta mortelle Pique.
Tu le m'as faict scavoir, quand par toy assailli
Fut ce Jaques Thiboust, Seigneur de Quantilli,
Conjoinct par amitié à la personne morte
Qu'en ce triste Tombeau, pour l'inhumer on porte.
Et croy qu'a ce Thiboust tu vins oster la vie
Par l'aguillon poignant de malheureuse envie,
Pource qu'il estoit fort liberal aux douceurs
De l'Escrit agreable aux Pernassides Seurs.
De cela non contente O Chimere execrable
Tu rends pasture aux vers ce corps tant honorable
Du scavant Bouchetel, secretaire des Roys,
Dont reparer ce tort oncques tu ne pourroys.
Bourges avoit esté fertile et plantureuse
D'avoir produict ce fruict qui la rendoit heureuse,
Mais par ton grand outrage elle à perdu ce bien
Qui tant luy profitoit, et ne te sert de rien,
Sinon pour le monstrer Chimere furieuse,
D'espandre sang humain en tout temps curieuse,
Et pour monstrer en toy plus grande Tyrannie
Qu'aux Tigres affamez qui sont en Hyrcanie,
Tu m'as ravy l'honeur du gracieux Scavoir
Duquel l'homme meschant ne veult notice avoir.
Tu m'as osté la fleur des neuf Seurs Pégasides,
Et le vray ennemy des folles Pierides.
Tu m'as privé du fruict lequel avoit produict
Bourges, belle Cité, digne d'immortel bruict,
Ainsi Moutons paissans en l'herbageuse Plaine
Point ne portent pour eux dessus leur Doz la laine,
Semblablement pour eux petis oiseaux paissans
Ne bastissent leur nid, mais pour hommes passans.
Ainsi pour eux aussi les Beufs que le Joug serre,
Ne vont roulans l'Ereau sur la fertile Terre.
Ainsi pour leur proffit Abeilles amoureuses
Ne font de leur doux Miel les liqueurs savoureuses.
Donc, o cruelle Mort, considere l'outrage
Qu'a present tu me fais par tyrannique rage.
Considere le tort tant grand que tu m'as faict
De me priver ainsi d'un homme tant perfaict.
Si j'estoys l'Orateur dont l'Arpine se vente,
Ou le Grec Démosthene en parole eloquente,
Tu entendroys de moy des mots qui valent pis,
O Chimere passant le venin des Aspics.
Mais si ma langue n'est assez prompte & active
Pour me plaindre de toy de piquante invective,
Les bons autheurs Francoys qui mes cris entendront,
A ta grand cruauté par Escrit respondront,
Parquoy tu recevras tel vitupere et honte
Que tu ne serviras que de fable et de compte
Au Peuple simple et bas, qui de toy escrira
La grand iniquité, laquelle il publira.
Oste toy de mes yeux, O Alecto villaine,
Qui fais mourir les fleurs de ta puante alaine.
Absente toy d'icy tant les soirs que matins
O maudicte Atropos, aux cheveux serpentins.
Tu m'as assez grevé de m'oster au meur age
Ce secretaire exquis, tant noble personnage,
Et qui tant de faveur aux vertueux portoit,
Et les adversitez des pauvres supportoit,
Se monstrant mieux aymer des vertus l'exercice
Que les thresors acquis par mondaine avarice.
Assez m'as offensé, o Royne des Chimeres
De me faire sentir tant de douleurs ameres,
Me privant de celluy par mortel desarroy
Qui tant estoit utile à mon Gallique Roy,
Mais avec ton effort, de son ame immortelle
Tu ne triompheras, comme de la mortelle
Et transitoire chair de caduque action
Qui tombe en un moment à putrefaction,
Et dont j'appaiseray mon dueil, comme j'espere,
C'est que ce bon Seigneur en fortune prospere
A laissé beaux enfans de si nobles Espris,
Qu'ils ne mourront encor que tu les eusses pris,
Et par eux mon honeur apparent, on verra
Tant que des Bouchetelz le Tige durera,
Desquelz le doux regard et gracieuse forme
Aux divines vertus du Pere se conforme,
En démonstrant les dons de leur perfection
Aupres de l'oeil Royal, par admiration
Ou de leur vertu haulte et grace bien aymee
Immortelle sera la noble Renommee.
Le Peuple Berruyer tous ces regrets faisoit
Quand la cruelle Mort (qui adonc s'amusoit
A escouter les cris de ce Peuple fidele)
A faict sortir ces Dicts de sa bouche cruelle.
Je ne mesbahis point si avec triste habit
Qu'on porte par coustume au lamentable obit,
O Peuple humain par trop endormy en tenebres
Tu fais un si hault cry en tes Pompes funebres,
C'est faulte d'approuver l'ordonnance de Dieu,
Qui ceux qu'il ayme mieux, de ce terrestre lieu
Tire tousjours à soy, pour monstrer que ce Monde
Au pris de son Sejour, de vray plaisir n'abonde.
Le plaisir terrien passe comme fumee,
Ou comme seche Paille en cendres consumee,
Mais le plaisir d'enhault dure éternellement,
Que Dieu promect aux bons vivans fidelement.
En ce divin Sejour sont plaisirs delectables
Plus qu'on ne voyt au Ciel d'estoilles agreables,
De ces plaisirs divins il convient estimer
Le nombre estre plus grand, que des Sablons de Mer,
Et qu'il n'y à d'Espis dedans les jaunes Blez
Qui sont parmy les champs de Céres assemblez,
Et qu'on ne voyt de pluye et de neige arriver,
En la froyde saison du glacial Hyver.
Dy moy (Peuple troublé de dueil melancholique)
Dy tant que tu voudras que je te vexe & pique,
Que je porte nuisance en mettant à l'envers
Tant de corps, qui seront la nourriture aux vers.
Tant que voudras, dy moy meschante & inutile,
Monstre inhumain, armé de cruauté hostile,
Si est ce que sans moy l'Esprit plus precieux
Que n'est le corps mortel, ne s'en va voir les Cieux.
Les Cieux estoient fermez par une forfaicture
De cest homme premier, ouvrage de nature,
Mais ce sainct Redempteur l'ouverture en à faicte
Quand il fut mis en croix par une gent infaicte.
Or devant le peché de l'homme transgresseur
Je n'avoys aucun Dard qui peust estre agresseur
Pour en faire mourir & succomber les hommes
Au funebre tombeau, comme au temps ou nous sommes,
Dont ce divin Sauveur de creature humaine
(O peuple Berruyer) ne m'a dict inhumaine,
Alors que sa bonté et grace tant valut
De mourir en la croix, pour te donner salut,
Sa divine bonté jamais ne m'a tancee
Lors que de ses Esleus j'ay la fin avancee,
En faisant mourir d'eux le corps tant seulement,
Pour faire vivre l'Ame au Ciel durablement.
Il est vray que mon dard porte double poincture,
Scavoir douce et amere à mainte creature.
Ceux qui sont endurcis en fraudes et malices,
Et qui font tout leur Dieu de mondaines delices,
Trouvent amer mon dard, à leur Mort cognoissans
Qu'a Dieu ils ont esté trop desobeissans,
Mais ceux qui ont suyvi le chemin d'equité,
L'entretien de la paix, douceur, et charité,
Ne trouvent de mon dard la poincture que doulce,
Cognoissans que par moy leur ame au Ciel se poulse.
Doncques, O peuple humain, à tort de moy te plainds
Quand je fay succomber hommes de vertu pleins,
Puis que par leur vertu qui à tous se descouvre,
Le tout puissant Recteur son Paradis leur ouvre.
Puis que tel as cognu celluy dont ton oeil pleure,
Que ne t'asseures tu que son Esprit demeure
En ce divin Sejour qui est promis à ceux
Qui aux sainctes vertus n'ont esté paresseux?
Et si j'ay renversé le corps, qui n'est que cendre,
Tu n'en doibs contre moy en querele descendre.
Celluy qui est sans fin, et le commencement,
Ce Pere supernel, qui ayme doucement
Les culteurs de son nom, avoit l'heure ordonnee
A celluy que tu plainds, de sa fin terminee.
Pourtant cesse tes pleurs, tes complainctes et cris,
Ne me menace plus d'injurieux Escrits:
Mais loue le Seigneur, et sa saincte ordonnance,
Au veuil duquel ne fault user de repugnance.
Quand la maigre Atropos eut prononcé ces Dicts,
D'une voix veritable, et loing de contredicts
Qui peussent meriter, pour prouver le contraire,
Le peuple Berruyer commence à se distraire
De courroux enflamé, et son dueil appaisant,
Aux propos de la Mort n'est plus contredisant,
Et ainsi appaisé, monstrant meilleur visaige,
Suyt le corps au Tombeau du deffunct, qui tant sage
Et tant prudent estoit, quand son Esprit lié
Estoit au mortel corps, dont Dieu la deslié,
Et lors non sans regret fut mis en sepulture
Le corps, qui est subject aux vers et pourriture,
Et son esprit ayant des Cieux fruition,
Attend d'un plus beau corps la resurrection.
Lors que mis au Tombeau fut le corps miserable,
Des Pernassides Seurs la troupe venerable
Feit graver au Tombeau du trespassé le nom,
Avecques ses vertus de durable renom,
Calliope, qui est des neuf Seurs la premiere,
Sur le Marbrin Tombeau meit ces vers en lumiere:
L'epitaphe de Monseigneur Bouchetel, par la Muse Calliope.
Celluy qui du Laurier pernassien fut digne,
Et qui avoit l'amour de moy & de mes Seurs,
Ce noble Bouchetel, le Mecenas insigne
De tous ceux qui aymoient Poetiques douceurs,
La memoire de soy delaisse aux successeurs
Avecques son corps mis en ceste sepulture,
Mais O vous viateurs, soyez certains et seurs
Que son renon n'est pas subject à pourriture.
Melpomené apres ce quatrain composa,
Et dessus le Tombeau par ordre l'apposa.
L'epitaphe de mondict Seigneur Bouchetel par La Muse Melpomené.
Soubs un petit cercueil est la chair inhumee
D'un serviteur Royal, c'estoit Jean Bouchetel,
Mais de ses grands vertus ne meurt la Renommee
Qui à ses successeurs le rendent immortel.
Ce quatrain fut escript, adoncques Terpsicore
Decora le Tombeau de ces six vers encore.
L'epitaphe dudict Seigneur par la Muse Terpsicore.
Celluy qui sans cesser de noz honeurs cupide,
Espandoit nostre nom par ce grand univers,
Et qui a triomphé sur le Grec Euripide
Translatant en Francois ses beaux Tragiques vers,
Delaisse un corps mortel au funebre tombeau,
Pour au divin repos voir un Regne plus beau.
Clio lors ensuivant en poetique Metre
Ainsi de ce defunct les louanges va mettre.
Epitaphe dudict Seigneur par la Muse Clio.
Par les mains de Pallas la plume fut taillee
Pour en servir deux Roys de France heureusement,
Et par elle à celluy Bouchetel fut baillee
Qui par sa Mort au Ciel vit eternellement.
Lors que Clio eut faict ainsi son Epitaphe,
Thalie feit le sien, avec telle ortographe.
L'epitaphe dudict Seigneur par la Muse Thalie.
Celluy qui par sa plume et par son grand Scavoir
Feit service à deux Roys, dont la vie est mortelle,
Heureusement au Ciel le Roy des Roys va voir
Qui à tous ses esleus donne vie immortelle.
Desque Thalie eut mis à son Escrit la fin,
Erato meit ces vers dessus le Marbre fin.
L'epitaphe dudict Seigneur par la Muse Erato.
O Viateur, veux tu scavoir qui gist ici?
C'est le corps d'un qui eut tant de graces infuses,
C'est le bon Bouchetel, le Seigneur de Saci,
La fleur, le bruict, l'honeur des vertus et des Muses.
Lors que par Erato le Tombeau fut orné,
Son Epitaphe ainsi Euterpe a ordonné.
L'epitaphe dudict Seigneur par la Muse Euterpe.
Celluy qui tant jadis vertu a faict florir,
Laisse son corps mortel au Tombeau lamentable,
Helas, c'est Bouchetel, mais son honeur mourir
On ne verra jamais, car il est perdurable.
Euterpe avoit ja mis ces vers portans l'honeur
Du noble Bouchetel, de Saci le Seigneur,
Alors que Polymnie en son honeur aussi
Apposa au Tombeau ces quatre vers ici.
L'epitaphe dudict Seigneur, par la Muse Polymnie.
Bourges, tu as esté ville bien fort heureuse
D'avoir mis sur la Terre un homme si scavant,
Qui ne meurt par la Mort, la gloire plantureuse
De sa perfection, le rend aux Cieux Vivant.
Quand ces vers eut escrit la Muse Polymnie,
L'epitaphe dernier fut tel par uranie:
L'epitaphe dudict Seigneur par la Muse Euranie.
Si vous voulez (Lecteurs) avoir perfection
En ce Monde terrien, ou vanité abonde,
A folles voluptez n'ayez affection,
Mais tous cherchez au Ciel le thresor pur et monde,
Comme ce Bouchetel, quand il vivoit au Monde,
Qui par son bon Esprit acquit auctorité,
Dont à present tiré hors de la Terre immonde,
Il contemple à loisir les lieux d'Eternité.
Quand ces belles neuf Seurs (dont l'honeur point ne tombe
Dedans le lac d'oubly) sur la Marbrine Tombe
Eurent gravé ces vers, avec un ordre tel
Eternisant le nom du noble Bouchetel,
Elles s'en vont voler sur leur mont de Pernasse
Qui de sublimité les Nues outrepasse,
Ou sans fin leur viendra de ce défunct memoire,
Et de sa Progenie ou gist honeur et gloire.
Fin.
Les Epigrammes.
A Monseigneur Davanson, President du grand Conseil.
J'ay des neuf Seurs eu quelque fois faveur
(Noble Seigneur, prudent et honorable)
Qu'ayez trouvé en mes Escrits saveur
Qui sont sacrez à ce Roy venerable,
Mais le Scavoir qui vous rend admirable,
Meritoit bien stile plus doux coulant
Que n'est le mien, pour d'oeuvre perdurable
Magnifier vostre nom excellant.
Si doy je bien me monstrer vigilant
A honorer par humble obeissance
Vostre Scavoir des vertus distillant,
Dont noblement vous avez jouissance,
Combien que j'aye entiere cognoissance
Que vous ayez un fruict plus savoureux
De l'Olivier plein de resjouissance,
Duquel seroit Apollon amoureux.
Quand toutefois de ce fruict bien heureux
De l'Olivier, qui pres de vous fleuronne,
Vous aurez pris le plaisir plantureux,
En luy offrant du Laurier la Couronne,
Qui dignement son front sainct environne,
Je vous supply un peu baisser voz yeux
Sur les Escritz qu'humblement je vous donne,
Vous soubhétant toute faveur des Cieux.
A Monseigneur M. Jean Bertrand Lieutenant Criminel de Paris.
La Prophetique Escriture
Ordonne judicature
D'hommes puissans, non pollus,
Craignans Dieu, loing d'avarice,
Pour administrer Justice,
Comme estans de Dieu eslus.
Ceste grand Divinité
Qui est une en trinité,
Pour l'heur de la Republique
Juge à Paris vous debvoit,
Ou droict aller on vous voyt
Sans chercher la voye oblique.
Et avec vostre prudence
Joincte à la Jurisprudence
Dont voz sens sont penetrez,
Vostre grand perfection
Conjoinct la dilection
Des lettres, et des lettrez.
Voyla pourquoy ma Minerve
Un los Eternel reservé
Aux excellentes vertus,
Dont par un don admirable
De Dieu aux bons favorable
Vous avez les sens vestus.
Pour la grand felicité
De la plus noble Cité
Dont nous ayons cognoissance,
Ceux qui vivent sagement
Desirent fort longuement
Vous voir en convalescence.
De ma part, sachant combien
Merite d'honeur et bien
Vostre constance immobile,
Je pry ce divin Recteur
Qu'il vous soit distributeur
De l'age de la Sibylle.
A Monseigneur de Frelu General de Lyon.
Sachant combien ce Thresorier illustre
Du Bourg, cognoist vostre perfection
D'hommes rassis au rang avoir grand lustre,
Et cognoissant la grand dilection
De vos deux cueurs par ferme affection,
Ne doy je pas orner mon escriture
Des dons exquis par admiration
Qu'avez receus par graces de Nature?
Certes ouy, car si l'architecture
Des grands Palais Royaux est belle à voir,
De vostre Esprit (O noble Creature)
En plus grand pris fault la science avoir.
Royaux Palais peuvent fin recevoir,
Mais vostre Esprit est d'une vigueur telle,
Que de la Mort l'audacieux pouvoir
N'abolira vostre grace immortelle.
A Monseigneur Godefroy, Conseiller du Roy, au Chastellet de Paris.
Sonnet.
Si quelque fois la grand maturité
Des Loix & Droicts, ou vostre estat s'applique
Pour l'entretien d'une grand Republique,
Donne repos à vostre auctorité,
Je vous supply par la benignité
Qui tant vous rend humain et pacifique,
De voir un peu mon oeuvre Poetique,
C'est Zoroastre ou gist divinité.
En le lisant, s'il vous plaist en gré prendre
L'humilité, laquelle je doy rendre
A voz vertus, d'un cueur obeissant,
J'ay bon espoir que vous verrez autre oeuvre
Par cy apres, qui publie et descueuvre
Aux successeurs vostre nom florissant.
A Monseigneur Hector Maniquet, Secretaire de ma Dame la Duchesse de
sainct Paul.
Minerve un jour visitoit les fontaines
Que de ses piedz feit le cheval volant,
Ou les neuf Seurs, doctes, sainctes, haultaines,
Faisoient chapeaux de Laurier excellant.
Pallas leur dict, O Troupeau vigilant
Incessament à toute chose bonne,
Je vous supply que vostre main ordonne
A mon Hector le Chapeau de hault pris,
Cela fut faict, du Laurier la Couronne
Sur vostre front des lors son siege a pris.
A Monseigneur de Luce, Secretaire de Monseigneur le Prince de Ferrare.
Résusciter il faudroict Apelles
Pour paindre au vif vostre magnificence,
Ou l'excellant graveur Praxiteles
Pour à jamais graver vostre excellence
En Marbre fin, car la supresme Essence
Vous a donné telle perfection
(Trescher Seigneur) que la mettre en silence,
N'est au Scavoir porter dilection.
A Monseigneur Garnier Parisien, Receveur des Tailles.
Comme les grains sont gardez au Grenier
Pour des humains estre la nourriture,
En vous ainsi (noble Seigneur Garnier)
Sont conservez plusieurs dons de Nature.
Telle saveur portez à l'Escriture
En rejectant les thresors d'avarice,
Que ceux qui ont des lettres l'exercice,
Doibvent trop mieux graver qu'en Marbre fin
Les dons divins, qui sont en vous sans vice,
Et qui par Mort ne peuvent prendre fin.
A Monseigneur de Fontenay Secretaire du Roy de Navarre.
Bien sainctement nous a faict à scavoir
Celluy Caton qui l'Esprit endoctrine,
Qu'en nous de Mort une image on peut voir,
Si nostre Esprit demeure sans Doctrine.
Celluy qui seul aveugles illumine,
De hault Scavoir vous a tant exorné,
Que vous estiez du tout predestiné
A faict fruict d'escriture honorable
En la maison de ce Roy tant bien né
Des Navarroys, d'honeur incomparable.
A Monseigneur Lopin, Conseiller en la Court de Parlement.
Sonnet.
Comme au matin la rubiconde Aurore
Donne splendeur au Monde spacieux,
Comme au Printemps le Soleil gracieux,
De rayons d'Or cest univers decore,
La grand douceur qui les prudens honore
Vostre renom faict voler jusqu'aux Cieux,
Et au Senat vous rend plus precieux
Que l'Argent pur, ne que l'Or fin encore.
Tels Senateurs que vous, ou grace abonde,
Sont estimez une perle en ce Monde,
Loing d'avarice, et pres de charité,
Aussi celluy qui recompensera
Le bien et mal, vostre ame poulsera
Au sainct repos du lieu de Verité.
A Monseigneur Carles, Secretaire de Monseigneur le Prince de Condé.
Sonnet.
Celluy qui peut toutes choses donner,
Vous a pourveu d'une telle sagesse,
D'un tel esprit, d'une telle largesse,
De tant de dons qui me font m'estonner,
Que je ne puis par escrit ordonner
Si hault honeur, que meritez sans cesse,
Representant tout acte de Noblesse,
Qui faict par tout vostre nom résonner.
Si l'Orateur dont l'Arpine se vente
Vivoit encor, par sa bouche éloquente
Il ne pourroit réciter voz valeurs,
Parquoy bien plus on trouveroit estrange.
Si je pouvois paindre vostre louange
(Comme il convient) de bien vifves couleurs.
A Monseigneur, Francois Charpillet, Lyonnois.
Comme l'amoureuse Abeille
Du doux Miel qu'elle appareille
Nous donne un goust savoureux,
Et comme d'Atlas les Filles
En leurs beaux jardins fertiles
Recueillent l'Or plantureux,
Ainsi de vostre clemence
S'espand par tout la semence,
Et de vostre Esprit gentil,
Dont pour louer voz merites,
Il me faudroit des Carites
Avoir stile plus subtil.
Si est ce que les neuf Seurs
Qui ont tesmoignages seurs
De vostre tant noble zele,
Feront poetiques vers
Deubs à voz honeurs divers
Avec louange éternelle.
A monsieur M. Guillaume Oger, Procureur au Chastellet de Paris.
Doy je effacer de silence
De voz graces l'excellence,
O sage et prudent Oger,
Qui exerceant la pratique,
Loing de dol et fraude inique
Faictes les proces juger?
Vostre nature n'est telle
De chercher faulse cautelle,
Et toute déception,
Car selon jurisprudence
Vous monstrez vostre prudence
En vostre vocation.
Oultre vous aymez les Muses
Qui voz louanges diffuses,
Et ce qu'avez merité
Par mes vers annonceront,
Et vostre nom laisseront
Aux yeux de posterité.