_To my right wurchepfull husbond, John Paston, [be]yng in the Inner
Tempill, be this delivered in hast._
[Sidenote: 1451 / MARCH 30]
Right wurchepfull husbond, I recomaund me to you, prayng you to wete
that myn unkyll Phylyp Berney[230.2] was at Lynne this last weke, and he
was at inne at the baylyffes hows of Lynne, and Partrych[230.3] came in
to the same place whill myn unkyll was ther. And the seid Partrych was
wele aqueyntyd with the balyffe, and the balyffe told hym that he sent a
letter to the Lord Molyns, and that the Lord Molyns had sent hym a
nother letter, letyng hym wete that he purposyd hym to be at Lynne thes
weke. Than Partrych seid that he had word that the seid lord purposyd
hym to be ther at that tyme; but he seid summe men supposyd that he wuld
not come here; and the balyffe seid that he was right glad that he shuld
come in to this countre. On of myn unkyll men herd all this langage, and
told it myn unkill. The baly ner Patrych knewe not at that tyme what myn
unkyll was to us ward. Also I purposyd me to have sent to Stapylton,
as ye sent me word be James Gresham, and it is told me that he is to
London. Item, it is noysed abowte Gresham and all that contre that the
Lord Molyns shuld be there in hast. Item, Gonnore had right gret
langage, and he trostyd that the word [_world_] shall turne sumwhat
after ther entent. Othre tydynges have we non, but that Tudenham and
Heydon shuld have ageyn the rewle in this contre, assmych as ever thei
had or more. The Holy Trynyte have you in kepyng. Wretyn at Norwhich un
the Tuesday next before Mydlentesonday.[230.4]
Yowre,