_To my right wurchipfull husbond, John Paston, be this delyverid in
hast._
[Sidenote: 1451(?) / [MAR. 22]]
Right wurchipfull hosbond, I recomawnd me to yow, beseching yow that ye
be not displeasid with me, thow my symplenesse cawsed yow for to be
displeasid with me. Be my trowth, it is not my will nother to do ne sey
that shuld cawse yow for to be displeasid; and if I have do, I am sory
therof, and will amend itt. Wherefor I beseche yow to forgeve me, and
that ye bere none hevynesse in your hert ayens me, for your displeasans
shuld be to hevy to me to indure with.
I send yow the roll that ye sent for, in selyd, be the brynger her of;
it was fownd in your trussing cofor. As for hering, I have bowt an
horslode for iiij^s. vj^d. I can gett none ell [_eels_] yett; as for
bever [_i.e. drinkables_], ther is promysid me somme, but I myt not gete
it yett. I sent to Jone Petche to have an answer for the wyndowis, for
she myt not come to me. And she sent me word that she had spoke therof
to Thomas Ingham, and he seyd that he shuld speke with yow hymself, and
he shuld accord with yow wel jnow, and seyd to her it was not her part
to desyr of hym to stop the lyts; and also he seyd itt was not his parte
to do itt, be cawse the place is his but for yeris.
And as for all other eronds that ye have commandid for to be do, thei
shal be do als sone as thei may be do. The blissid Trynyte have yow in
his keping. Wretyn at Norwyche, on the Monday next after Seynt Edward.
Yowris,