_To my trusty and wel belovyd, the Vycary and Tenaunts of my Lordschepe
of Gressham._
[Sidenote: 1449 / MARCH 24]
Trusty and welbeloved frendys, I grete yowe well, and putte yowe all
owte of doute for all that ye have doon for me; and the money that ye
pay to my welbeloved servaunt, John Partrich, I will be your warant as
for your discharge, and save yowe harmeles ayenst all thoo that wold
greve yowe, to my power. And, as hertly as I can, I thanke yow of the
gud wyl ye have had, and have, toward me. And as to the tytyll of rigth
that I have to the Lordship of Gressam schal with in short tyme be
knoweyn, and be the lawe so determynyd, that ye schall all be glad that
hathe ought me youre gud wyll therin.
And All Myghty God kepe yow; and, be His grace, I schall be with yowe
son aftyr the Parlement es endyd.
Wrytten atte London, on Oure Lady evyn last past.