Brocours of love that deceiven,
No wonder is thogh thei receiven[269]
After the wrong that thei decerven;
For whom as evere that thei serven[270]
And do plesance for a whyle,
Yit ate laste here oghne guile
[Sidenote: Hic ponit exemplum contra istos maritos qui
vltra id quod proprias habent vxores ad noue voluptatis
incrementum alias mulieres superflue lucrari non verentur.
Et narrat qualiter Iuno vindictam suam in Eccho decreuit,
pro eo quod ipsa Eccho[272] in huiusmodi mulierum lucris
adquirendis de consilio mariti sui Iouis mediatrix
extiterat.]
Upon here oghne hed descendeth,[271]
Which god of his vengance sendeth, 4580
As be ensample of time go
A man mai finde it hath be so.
It fell somtime, as it was sene,
The hihe goddesse and the queene
Juno tho hadde in compainie
A Maiden full of tricherie;
[Sidenote: =P. ii. 281=]
For sche was evere in on acord[273]
With Jupiter, that was hire lord,
To gete him othre loves newe,
Thurgh such brocage and was untrewe 4590
Al otherwise than him nedeth.
Bot sche, which of no schame dredeth,
With queinte wordes and with slyhe
Blente in such wise hir lady yhe,
As sche to whom that Juno triste,[274]
So that therof sche nothing wiste.
Bot so prive mai be nothing,
That it ne comth to knowleching;
Thing don upon the derke nyht
Is after knowe on daies liht: 4600
So it befell, that ate laste
Al that this slyhe maiden caste
Was overcast and overthrowe.
For as the sothe mot be knowe,
To Juno was don understonde
In what manere hir housebonde
With fals brocage hath take usure
Of love mor than his mesure,
Whan he tok othre than his wif,
Wherof this mayden was gultif, 4610
Which hadde ben of his assent.
And thus was al the game schent;[275]
Sche soffreth him, as sche mot nede,
Bot the brocour of his misdede,
Sche which hir conseil yaf therto,
On hire is the vengance do:
[Sidenote: =P. ii. 282=]
For Juno with hire wordes hote,
This Maiden, which Eccho was hote,
Reproveth and seith in this wise:
‘O traiteresse, of which servise 4620
Hast thou thin oghne ladi served!
Thou hast gret peine wel deserved,
That thou canst maken it so queinte,
Thi slyhe wordes forto peinte
Towardes me, that am thi queene,
Wherof thou madest me to wene
That myn housbonde trewe were,
Whan that he loveth elleswhere,
Al be it so him nedeth noght.
Bot upon thee it schal be boght, 4630
Which art prive to tho doinges,
And me fulofte of thi lesinges
Deceived hast: nou is the day
That I thi while aquite may;[276]
And for thou hast to me conceled
That my lord hath with othre deled,
I schal thee sette in such a kende,
That evere unto the worldes ende
Al that thou hierest thou schalt telle,
And clappe it out as doth a belle.’ 4640
And with that word sche was forschape,
Ther may no vois hire mouth ascape,[277]
What man that in the wodes crieth,[278]
Withoute faile Eccho replieth,
And what word that him list to sein,
The same word sche seith ayein.
[Sidenote: =P. ii. 283=]
Thus sche, which whilom hadde leve
To duelle in chambre, mot beleve
In wodes and on helles bothe,
For such brocage as wyves lothe, 4650
Which doth here lordes hertes change[279]
And love in other place strange.[280]
[Sidenote: Confessor.]
Forthi, if evere it so befalle,
That thou, mi Sone, amonges alle
Be wedded man, hold that thou hast,
For thanne al other love is wast.
O wif schal wel to thee suffise,
And thanne, if thou for covoitise
Of love woldest axe more,
Thou scholdest don ayein the lore 4660
Of alle hem that trewe be.
[Sidenote: Amans.]
Mi fader, as in this degre
My conscience is noght accused;
For I no such brocage have used,
Wherof that lust of love is wonne.
Forthi spek forth, as ye begonne,
Of Avarice upon mi schrifte.
[Sidenote: Confessor.]
Mi Sone, I schal the branches schifte
Be ordre so as thei ben set,
On whom no good is wel beset. 4670
[Sidenote: [PARSIMONY.]]
vi. _Pro verbis verba, munus pro munere reddi_
_Convenit, vt pondus equa statera gerat._
_Propterea cupido non dat sua dona Cupido,_
_Nam qui nulla serit, gramina nulla metet._
Blinde Avarice of his lignage[281]
For conseil and for cousinage,
[Sidenote: =P. ii. 284=]
To be withholde ayein largesse,
[Sidenote: Hic tractat super illa specie Auaricie que
Parcimonia dicitur, cuius natura tenax aliqualem sue
substancie porcionem aut deo aut hominibus participare
nullatenus consentit.]
Hath on, whos name is seid Skarsnesse,
The which is kepere of his hous,
And is so thurghout averous,
That he no good let out of honde;
Thogh god himself it wolde fonde,
Of yifte scholde he nothing have;
And if a man it wolde crave,[282] 4680
He moste thanne faile nede,
Wher god himselve mai noght spede.[283]
And thus Skarsnesse in every place
Be reson mai no thonk porchace,
And natheles in his degree
Above alle othre most prive
With Avarice stant he this.
For he governeth that ther is
In ech astat of his office
After the reule of thilke vice; 4690
He takth, he kepth, he halt, he bint,
That lihtere is to fle the flint
Than gete of him in hard or neisshe
Only the value of a reysshe
Of good in helpinge of an other,
Noght thogh it were his oghne brother.
For in the cas of yifte and lone
Stant every man for him al one,
Him thenkth of his unkindeschipe
That him nedeth no felaschipe: 4700
Be so the bagge and he acorden,[284]
Him reccheth noght what men recorden
[Sidenote: =P. ii. 285=]
Of him, or it be evel or good.
For al his trust is on his good,
So that al one he falleth ofte,
Whan he best weneth stonde alofte,
Als wel in love as other wise;
For love is evere of som reprise
To him that wole his love holde.
Forthi, mi Sone, as thou art holde, 4710
Touchende of this tell me thi schrifte:
Hast thou be scars or large of yifte
Unto thi love, whom thou servest?
For after that thou wel deservest
Of yifte, thou miht be the bet;
For that good holde I wel beset,
For why thou miht the betre fare;[285]
Thanne is no wisdom forto spare.
For thus men sein, in every nede
He was wys that ferst made mede; 4720
For where as mede mai noght spede,
I not what helpeth other dede:
Fulofte he faileth of his game
That wol with ydel hand reclame
His hauk, as many a nyce doth.
Forthi, mi Sone, tell me soth
And sei the trouthe, if thou hast be
Unto thy love or skars or fre.
[Sidenote: Confessio Amantis.]
Mi fader, it hath stonde thus,
That if the tresor of Cresus 4730
And al the gold Octovien,
Forth with the richesse Yndien[286]
[Sidenote: =P. ii. 286=]
Of Perles and of riche stones,
Were al togedre myn at ones,
I sette it at nomore acompte
Than wolde a bare straw amonte,
To yive it hire al in a day,
Be so that to that suete may[287]
I myhte like or more or lesse.[288]
And thus be cause of my scarsnesse 4740
Ye mai wel understonde and lieve
That I schal noght the worse achieve[289]
The pourpos which is in my thoght.
Bot yit I yaf hir nevere noght,
Ne therto dorste a profre make;
For wel I wot sche wol noght take,
And yive wol sche noght also,
She is eschu of bothe tuo.
And this I trowe be the skile
Towardes me, for sche ne wile 4750
That I have eny cause of hope,
Noght also mochel as a drope.
Bot toward othre, as I mai se,
Sche takth and yifth in such degre,
That as be weie of frendlihiede
Sche can so kepe hir wommanhiede,
That every man spekth of hir wel.
Bot sche wole take of me no del,
And yit sche wot wel that I wolde
Yive and do bothe what I scholde 4760
To plesen hire in al my myht:
Be reson this wot every wyht,
[Sidenote: =P. ii. 287=]
For that mai be no weie asterte,
Ther sche is maister of the herte,
Sche mot be maister of the good.
For god wot wel that al my mod
And al min herte and al mi thoght
And al mi good, whil I have oght,
Als freliche as god hath it yive,
It schal ben hires, while I live,[290] 4770
Riht as hir list hirself commande.
So that it nedeth no demande,
To axe of me if I be scars
To love, for as to tho pars
I wole ansuere and seie no.
[Sidenote: Confessor.]
Mi Sone, that is riht wel do.
For often times of scarsnesse
It hath be sen, that for the lesse
Is lost the more, as thou schalt hiere
A tale lich to this matiere. 4780
[Sidenote: [TALE OF BABIO AND CROCEUS.]]
Skarsnesse and love acorden nevere,
For every thing is wel the levere,
Whan that a man hath boght it diere:
[Sidenote: Hic loquitur contra istos, qui Auaricia stricti
largitatis beneficium in amoris causa confundunt. Et ponit
exemplum, qualiter Croceus largus et hillaris Babionem[292]
auarum et tenacem de amore Viole, que pulcherrima fuit,
donis largissimis circumuenit.]
And forto speke in this matiere,
For sparinge of a litel cost
Fulofte time a man hath lost
The large cote for the hod.
What man that scars is of his good[291]
And wol noght yive, he schal noght take:
With yifte a man mai undertake 4790
The hihe god to plese and queme,
With yifte a man the world mai deme;[293]
[Sidenote: =P. ii. 288=]
For every creature bore,
If thou him yive, is glad therfore,
And every gladschipe, as I finde,
Is confort unto loves kinde
And causeth ofte a man to spede.
So was he wys that ferst yaf mede,
For mede kepeth love in house;
Bot wher the men ben coveitouse 4800
And sparen forto yive a part,
Thei knowe noght Cupides art:
For his fortune and his aprise
Desdeigneth alle coveitise
And hateth alle nygardie.
And forto loke of this partie,
A soth ensample, hou it is so,
I finde write of Babio;[294]
Which hadde a love at his menage,
Ther was non fairere of hire age, 4810
And hihte Viola be name;
Which full of youthe and ful of game
Was of hirself, and large and fre,
Bot such an other chinche as he[295]
Men wisten noght in al the lond,
And hadde affaited to his hond
His servant, the which Spodius[296]
Was hote. And in this wise thus[297]
The worldes good of sufficance
Was had, bot likinge and plesance, 4820
Of that belongeth to richesse
Of love, stod in gret destresse;
[Sidenote: =P. ii. 289=]
So that this yonge lusty wyht
Of thing which fell to loves riht
Was evele served overal,
That sche was wo bego withal,
Til that Cupide and Venus eke
A medicine for the seke
Ordeigne wolden in this cas.
So as fortune thanne was, 4830
Of love upon the destine
It fell, riht as it scholde be,
A freissh, a fre, a frendly man
That noght of Avarice can,
Which Croceus be name hihte,
Toward this swete caste his sihte,
And ther sche was cam in presence.
Sche sih him large of his despence,
And amorous and glad of chiere,
So that hir liketh wel to hiere 4840
The goodly wordes whiche he seide;
And therupon of love he preide,
Of love was al that he mente,
To love and for sche scholde assente,
He yaf hire yiftes evere among.
Bot for men sein that mede is strong,
It was wel seene at thilke tyde;
For as it scholde of ryht betyde,
This Viola largesce hath take
And the nygard sche hath forsake: 4850
Of Babio sche wol no more,[298]
For he was grucchende everemore,
[Sidenote: =P. ii. 290=]
Ther was with him non other fare
Bot forto prinche and forto spare,
Of worldes muk to gete encress.
So goth the wrecche loveles,[299]
Bejaped for his Skarcete,
And he that large was and fre
And sette his herte to despende,
This Croceus, the bowe bende, 4860
Which Venus tok him forto holde,
And schotte als ofte as evere he wolde.[300]
Lo, thus departeth love his lawe,
That what man wol noght be felawe
To yive and spende, as I thee telle,
He is noght worthi forto duelle
In loves court to be relieved.
Forthi, my Sone, if I be lieved,[301]
Thou schalt be large of thi despence.
[Sidenote: Amans.]
Mi fader, in mi conscience 4870
If ther be eny thing amis,
I wol amende it after this,[302]
Toward mi love namely.
[Sidenote: Confessor.]
Mi Sone, wel and redely
Thou seist, so that wel paid withal
I am, and forthere if I schal
Unto thi schrifte specefie[303]
Of Avarices progenie
What vice suieth after this,
Thou schalt have wonder hou it is, 4880
Among the folk in eny regne
That such a vice myhte regne,
[Sidenote: =P. ii. 291=]
Which is comun at alle assaies,
As men mai finde nou adaies.
[Sidenote: [INGRATITUDE.]]
vii. _Cuncta creatura, deus et qui cuncta creauit,_
_Dampnant ingrati dicta que facta viri._[304]
_Non dolor alonge stat, quo sibi talis amicam_[305]
_Traxit, et in fine deserit esse suam._
The vice lik unto the fend,
Which nevere yit was mannes frend,
And cleped is Unkindeschipe,
[Sidenote: Hic loquitur super illa aborta specie Auaricie,
que Ingratitudo, dicta est, cuius condicionem non
solum creator, set eciam cuncte creature abhominabilem
detestantur.]
Of covine and of felaschipe
With Avarice he is withholde.
Him thenkth he scholde noght ben holde 4890
Unto the moder which him bar;
Of him mai nevere man be war,
He wol noght knowe the merite,
For that he wolde it noght aquite;
Which in this world is mochel used,
And fewe ben therof excused.
To telle of him is endeles,
Bot this I seie natheles,
Wher as this vice comth to londe,
Ther takth noman his thonk on honde; 4900
Thogh he with alle his myhtes serve,
He schal of him no thonk deserve.
He takth what eny man wol yive,
Bot whil he hath o day to live,
He wol nothing rewarde ayein;
He gruccheth forto yive o grein,
Wher he hath take a berne full.
That makth a kinde herte dull,
[Sidenote: =P. ii. 292=]
To sette his trust in such frendschipe,
Ther as he fint no kindeschipe; 4910
And forto speke wordes pleine,
Thus hiere I many a man compleigne,
That nou on daies thou schalt finde
At nede fewe frendes kinde;
What thou hast don for hem tofore,
It is foryete, as it were lore.
The bokes speken of this vice,
And telle hou god of his justice,
Be weie of kinde and ek nature
And every lifissh creature,[306] 4920
The lawe also, who that it kan,[307]
Thei dampnen an unkinde man.
It is al on to seie unkinde
As thing which don is ayein kinde,
For it with kinde nevere stod
A man to yelden evel for good.
For who that wolde taken hede,
A beste is glad of a good dede,
And loveth thilke creature
After the lawe of his nature 4930
Which doth him ese. And forto se
Of this matiere Auctorite,
Fulofte time it hath befalle;
Wherof a tale amonges alle,
Which is of olde ensamplerie,[308]
I thenke forto specefie.
[Sidenote: [TALE OF ADRIAN AND BARDUS.]]
To speke of an unkinde man,
I finde hou whilom Adrian,
[Sidenote: =P. ii. 293=]
Of Rome which a gret lord was,
[Sidenote: Hic dicit qualiter bestie in suis beneficiis
hominem ingratum naturaliter precellunt. Et ponit
exemplum de Adriano Rome Cenatore, qui in quadam Foresta
venacionibus insistens, dum predam persequeretur,
in Cisternam profundam nescia familia corruit: vbi
superueniens quidam pauper nomine Bardus, immissa cordula,
putans hominem extraxisse, primo Simeam extraxit, secundo
Serpentem, tercio Adrianum, qui pauperem despiciens aliquid
ei pro benefacto reddere recusabat. Set tam Serpens
quam Simea gratuita beneuolencia ipsum[311] singulis donis
sufficienter remunerarent.]
Upon a day as he per cas 4940
To wode in his huntinge wente,
It hapneth at a soudein wente,[309]
After his chace as he poursuieth,
Thurgh happ, the which noman eschuieth,[310]
He fell unwar into a pet,
Wher that it mihte noght be let.
The pet was dep and he fell lowe,
That of his men non myhte knowe
Wher he becam, for non was nyh,
Which of his fall the meschief syh. 4950
And thus al one ther he lay
Clepende and criende al the day
For socour and deliverance,
Til ayein Eve it fell per chance,
A while er it began to nyhte,
A povere man, which Bardus hihte,
Cam forth walkende with his asse,
And hadde gadred him a tasse
Of grene stickes and of dreie
To selle, who that wolde hem beie, 4960
As he which hadde no liflode,
Bot whanne he myhte such a lode
To toune with his Asse carie.
And as it fell him forto tarie
That ilke time nyh the pet,
And hath the trusse faste knet,
He herde a vois, which cride dimme,
And he his Ere to the brimme
[Sidenote: =P. ii. 294=]
Hath leid, and herde it was a man,
Which seide, ‘Ha, help hier Adrian, 4970
And I wol yiven half mi good.’
The povere man this understod,
As he that wolde gladly winne,
And to this lord which was withinne
He spak and seide, ‘If I thee save,
What sikernesse schal I have
Of covenant, that afterward
Thou wolt me yive such reward
As thou behihtest nou tofore?’
That other hath his othes swore 4980
Be hevene and be the goddes alle,[312]
If that it myhte so befalle
That he out of the pet him broghte,
Of all the goodes whiche he oghte[313]
He schal have evene halvendel.
This Bardus seide he wolde wel;
And with this word his Asse anon
He let untrusse, and therupon
Doun goth the corde into the pet,[314]
To which he hath at ende knet 4990
A staf, wherby, he seide, he wolde
That Adrian him scholde holde.
Bot it was tho per chance falle,
Into that pet was also falle[315]
An Ape, which at thilke throwe,
Whan that the corde cam doun lowe,
Al sodeinli therto he skipte
And it in bothe hise armes clipte.
[Sidenote: =P. ii. 295=]
And Bardus with his Asse anon
Him hath updrawe, and he is gon. 5000
But whan he sih it was an Ape,
He wende al hadde ben a jape
Of faierie, and sore him dradde:[316]
And Adrian eftsone gradde
For help, and cride and preide faste,
And he eftsone his corde caste;
Bot whan it cam unto the grounde,
A gret Serpent it hath bewounde,
The which Bardus anon up drouh.
And thanne him thoghte wel ynouh, 5010
It was fantosme, bot yit he herde[317]
The vois, and he therto ansuerde,
‘What wiht art thou in goddes name?’
‘I am,’ quod Adrian, ‘the same,
Whos good thou schalt have evene half.’
Quod Bardus, ‘Thanne a goddes half
The thridde time assaie I schal’:
And caste his corde forth withal
Into the pet, and whan it cam
To him, this lord of Rome it nam, 5020
And therupon him hath adresced,[318]
And with his hand fulofte blessed,
And thanne he bad to Bardus hale.
And he, which understod his tale,
Betwen him and his Asse al softe[319]
Hath drawe and set him up alofte
Withouten harm al esely.
He seith noght ones ‘grant merci,’
[Sidenote: =P. ii. 296=]
Bot strauhte him forth to the cite,
And let this povere Bardus be. 5030
And natheles this simple man
His covenant, so as he can,
Hath axed; and that other seide,
If so be that he him umbreide[320]
Of oght that hath be speke or do,[321]
It schal ben venged on him so,
That him were betre to be ded.
And he can tho non other red,
But on his asse ayein he caste
His trusse, and hieth homward faste: 5040
And whan that he cam hom to bedde,
He tolde his wif hou that he spedde.
Bot finaly to speke oght more
Unto this lord he dradde him sore,
So that a word ne dorste he sein:[322]
And thus upon the morwe ayein,
In the manere as I recorde,
Forth with his Asse and with his corde
To gadre wode, as he dede er,
He goth; and whan that he cam ner 5050
Unto the place where he wolde,[323]
He hath his Ape anon beholde,
Which hadde gadred al aboute
Of stickes hiere and there a route,[324]
And leide hem redy to his hond,
Wherof he made his trosse and bond;
Fro dai to dai and in this wise
This Ape profreth his servise,
[Sidenote: =P. ii. 297=]
So that he hadde of wode ynouh.
Upon a time and as he drouh 5060
Toward the wode, he sih besyde
The grete gastli Serpent glyde,
Til that sche cam in his presence,
And in hir kinde a reverence[325]
Sche hath him do, and forth withal
A Ston mor briht than a cristall
Out of hir mouth tofore his weie
Sche let doun falle, and wente aweie,
For that he schal noght ben adrad.
Tho was this povere Bardus glad, 5070
Thonkende god, and to the Ston[326]
He goth and takth it up anon,
And hath gret wonder in his wit
Hou that the beste him hath aquit,
Wher that the mannes Sone hath failed,
For whom he hadde most travailed.
Bot al he putte in goddes hond,
And torneth hom, and what he fond
Unto his wif he hath it schewed;
And thei, that weren bothe lewed, 5080
Acorden that he scholde it selle.
And he no lengere wolde duelle,
Bot forth anon upon the tale
The Ston he profreth to the sale;
And riht as he himself it sette,
The jueler anon forth fette
The gold and made his paiement,
Therof was no delaiement.
[Sidenote: =P. ii. 298=]
Thus whan this Ston was boght and sold,
Homward with joie manyfold 5090
This Bardus goth; and whan he cam
Hom to his hous and that he nam
His gold out of his Purs, withinne
He fond his Ston also therinne,
Wherof for joie his herte pleide,
Unto his wif and thus he seide,
‘Lo, hier my gold, lo, hier mi Ston!’
His wif hath wonder therupon,
And axeth him hou that mai be.
‘Nou be mi trouthe I not,’ quod he, 5100
‘Bot I dar swere upon a bok,
That to my Marchant I it tok,[327]
And he it hadde whan I wente:
So knowe I noght to what entente
It is nou hier, bot it be grace.[328]
Forthi tomorwe in other place
I wole it fonde forto selle,
And if it wol noght with him duelle,
Bot crepe into mi purs ayein,
Than dar I saufly swere and sein, 5110
It is the vertu of the Ston.’[329]
The morwe cam, and he is gon
To seche aboute in other stede
His Ston to selle, and he so dede,[330]
And lefte it with his chapman there.
Bot whan that he cam elleswhere,
In presence of his wif at hom,
Out of his Purs and that he nom
[Sidenote: =P. ii. 299=]
His gold, he fond his Ston withal:
And thus it fell him overal, 5120
Where he it solde in sondri place,
Such was the fortune and the grace.
Bot so wel may nothing ben hidd,
That it nys ate laste kidd:
This fame goth aboute Rome[331]
So ferforth, that the wordes come
To themperour Justinian;
And he let sende for the man,[332]
And axede him hou that it was.
And Bardus tolde him al the cas,[333] 5130
Hou that the worm and ek the beste,[334]
Althogh thei maden no beheste,
His travail hadden wel aquit;
Bot he which hadde a mannes wit,[335]
And made his covenant be mouthe
And swor therto al that he couthe
To parte and yiven half his good,
Hath nou foryete hou that it stod,
As he which wol no trouthe holde.
This Emperour al that he tolde 5140
Hath herd, and thilke unkindenesse
He seide he wolde himself redresse.
And thus in court of juggement
This Adrian was thanne assent,
And the querele in audience[336]
Declared was in the presence
Of themperour and many mo;
Wherof was mochel speche tho
[Sidenote: =P. ii. 300=]
And gret wondringe among the press.
Bot ate laste natheles 5150
For the partie which hath pleigned
The lawe hath diemed and ordeigned
Be hem that were avised wel,
That he schal have the halvendel
Thurghout of Adrianes good.
And thus of thilke unkinde blod
Stant the memoire into this day,[337]
Wherof that every wysman may[338]
Ensamplen him, and take in mynde[339]
[Sidenote: [INGRATITUDE.]]
What schame it is to ben unkinde; 5160
Ayein the which reson debateth,
And every creature it hateth.
[Sidenote: Confessor.]
Forthi, mi Sone, in thin office
I rede fle that ilke vice.
For riht as the Cronique seith
Of Adrian, hou he his feith
Foryat for worldes covoitise,
Fulofte in such a maner wise
Of lovers nou a man mai se
Full manye that unkinde be: 5170
For wel behote and evele laste
That is here lif; for ate laste,
Whan that thei have here wille do,
Here love is after sone ago.
What seist thou, Sone, to this cas?
[Sidenote: Amans.]
Mi fader, I wol seie Helas,
That evere such a man was bore,
Which whan he hath his trouthe suore
[Sidenote: =P. ii. 301=]
And hath of love what he wolde,
That he at eny time scholde[340] 5180
Evere after in his herte finde
To falsen and to ben unkinde.
Bot, fader, as touchende of me,
I mai noght stonde in that degre;
For I tok nevere of love why,
That I ne mai wel go therby
And do my profit elles where,
For eny sped I finde there.
I dar wel thenken al aboute,
Bot I ne dar noght speke it oute; 5190
And if I dorste, I wolde pleigne,
That sche for whom I soffre peine
And love hir evere aliche hote,
That nouther yive ne behote
In rewardinge of mi servise
It list hire in no maner wise.
I wol noght say that sche is kinde,
And forto sai sche is unkinde,
That dar I noght; bot god above,[341]
Which demeth every herte of love, 5200
He wot that on myn oghne side
Schal non unkindeschipe abide:
If it schal with mi ladi duelle,
Therof dar I nomore telle.[342]
Nou, goode fader, as it is,
Tell me what thenketh you of this.
[Sidenote: Confessor.]
Mi Sone, of that unkindeschipe,
The which toward thi ladischipe
[Sidenote: =P. ii. 302=]
Thou pleignest, for sche wol thee noght,
Thou art to blamen of that thoght.[343] 5210
For it mai be that thi desir,
Thogh it brenne evere as doth the fyr,
Per cas to hire honour missit,
Or elles time com noght yit,
Which standt upon thi destine:[344]
Forthi, mi Sone, I rede thee,
Thenk wel, what evere the befalle;
For noman hath his lustes alle.
Bot as thou toldest me before
That thou to love art noght forswore, 5220
And hast don non unkindenesse,
Thou miht therof thi grace blesse:
And lef noght that continuance;
For ther mai be no such grevance
To love, as is unkindeschipe.[345]
Wherof to kepe thi worschipe,
So as these olde bokes tale,
I schal thee telle a redi tale:
Nou herkne and be wel war therby,
For I wol telle it openly. 5230