1668 [A] Ande þer þay dronken, & dalten, & demed eft nwe,
To norne on þe same note, on nwe3ere3 euen;
[B] Bot þe kny3t craued leue, to kayre on þe morn,
For hit wat3 ne3 at þe terme, þat he to[1] schulde.
1672 Þe lorde hym letted of þat, to lenge hym resteyed, [Fol. 113b.]
[C] & sayde, "as I am trwe segge, I siker my trawþe,
[D] Þou schal cheue to þe grene chapel, þy charres to make,
Leude, on nw3ere3 ly3t, longe bifore pryme:
1676 For-þy þow lye in þy loft, & lach þyn ese,
& I schal hunt in þis holt, & halde þe towche3,
Chaunge wyth þe cheuisaunce, bi þat I charre hider;
For I haf fraysted þe twys, & faythful I fynde þe,
1680 Now þrid tyme þrowe best þenk on þe morne,
Make we mery quyl we may, & mynne vpon Ioye,
For þe lur may mon lach, when so mon lyke3."
Þis wat3 grayþely graunted, & Gawayn is lenged,
1684 [E] Bliþe bro3t wat3 hym drynk, & þay to bedde 3eden,
with li3t;
[F] Sir G: lis & slepes,
Ful stille & softe al ni3t;
1688 [G] Þe lorde þat his crafte3 kepes,
Ful erly he wat3 di3t.
[Sidenote A: There they drank and discoursed.]
[Sidenote B: Gawayne begs leave to depart on the morrow.]
[Sidenote C: His host swears to him,]
[Sidenote D: that he shall come to the Green Chapel on New Year's morn long
before prime.]
[Sidenote E: Our knight consents to remain for another night.]
[Sidenote F: Full still and softly he sleeps all night.]
[Sidenote G: Early in the morning the lord is up.]
[Footnote 1: te (?).]