LE Mardi cinquiéme jour dudit mois d'Octobre nous fimes voiles, &
appareillames avec nôtre dit gallion & barques pour retourner à la
province de Canada, au port de Sainte-Croix où étoient demeurez noditz
navires: & le septiéme jour nous vimmes poser le travers d'une riviere,
qui vient devers le Nort sortant audit fleuve, à l'entour de laquelle y
a quatre petites iles, & pleines d'arbres. Nous nommames icelle riviere,
_La riviere de Fouez (je croy qu'il veut dire Foix)_. Et pource que
l'une d'icelles iles s'avance audit fleuve, & la voit-on de loin, ledit
Capitaine fit planter une belle Croix sur la pointe d'icelle, & commanda
apporter les barques, pour aller avec marée dedans icelle riviere, pour
voir le parfond & nature d'icelle. Et nagerent celui jour à-mont ledit
fleuve. Mais parce qu'elle fut trouvée de nulle experience, ni profonde,
retournerent, & appareillames pour aller à-val.
Le Lundy unziéme jour d'Octobre nous arrivames au hable de Sainte-Croix
où étoient noz navires, & trouvames que les Maitres & marinier qui
étoient demeurés avoient fait un Fort devant lédits navires tout clos de
grosse pieces de bois plantées debout joignant les unes aux autres, &
tout à l'entour garni d'artillerie, & bien en ordre pour se defendre
contre tout le païs. Et tout incontinent que le Seigneur du païs fut
averti de nôtre venuë, vint le lendemain accompagné de _Taiguragni &
Domagaya_, & plusieurs autres pour voir ledit Capitaine, & lui firent
une merveilleuse féte, feignans avoir grand joye de sa venuë, lequel
pareillement leur fit assez bon recueil, toutefois qu'ilz ne l'avoient
pas desservi. Le Seigneur _Donnacona_ pria le Capitaine d'aller le
lendemain voir à _Canada_. Ce que lui promit ledit Capitaine. Et le
lendemain treziéme dudit mois le dit Capitaine accompagné des
Gentils-hommes & de cinquante compagnons bien en en ordre allerent voir
ledit _Donnacona_ & son peuple, qui est distant du lieu où étoient noz
navires de demie lieuë, & se nomme leur demeurance _Stadaconé_. Et nous
arrivés audit lieu, vindrent les habitans au devant de nous loin de
leurs maisons d'un jet de pierre, ou mieux; & là se rangerent & assirent
à leur mode & façon de faire, les hommes d'une part & les femmes de
l'autre debout, chantans & dansans sans cesse. Et apres qu'ilz
s'entrefurent saluez & fait chere les uns aux autres, le Capitaine donna
és hommes des couteaux & autre chose de peu de valeur, & fit passer
toutes les femmes & filles pardevant lui, & leur donna à chacune une
bague d'étain, dequoy ilz remercierent ledit Capitaine qui fut par ledit
_Donnacona & Taiguragni_ mené voir leurs maisons, léquelles étoient bien
étotées de vivres selon leur sorte pour passer leur hiver. Et fut par
ledit _Donnacona_ montré audit Capitaine les peaux de cinq tétes
d'hommes étenduës fur des bois, comme peaux de parchemin: & nous dit que
c'étoit des _Toudamans_ de devers le Su, qui leur menoient
continuellement la guerre. Outre nous fut dit qu'il y a deux ans passez
que lédits _Toudamans_ les vindrent assaillir jusques dedans ledit
fleuve à une ile qui est le travers du _Saguenay_, où ils étoient à
passer la nuit tendans aller à _Hongnedo_ leur mener guerre avec environ
deux cens personnes tant hommes, femmes qu'enfans, léquels furent
surpris en dormant dedans un Fort qu'ils avoient fait: où mirent léditz
_Todamans_ le feu tout à l'entour, & comme Ilz sortoient les tuerent
tous reservez cinq, qui échapperent. De laquelle détrousse se plaignent
encore fort, nous montrans qu'ils en auroient vengeance. Apres léquelles
choses veuës nous retirames en noz navires.
_Voyage de Champlein depuis le Port de Sainte-Croix jusques au Saut de
la grande riviere, où sont remarquées les rivieres, iles, & autres
choses qu'il a découvertes audit voyage: & particulierement la riviere,
le peuple, & le pays des_ Iroquois.