Wolfgang von Honneck Comentur des deutschen Hauses zu Freiburg,
Hans Albrecht von Anwyl, Bürgermeister daselbst, Hans Wilhelm von
Liechtenfels und Erhart von Falkenstein erklären, im Namen gemeiner
Herren und Gesellen der löblichen Gesellschaft zum Ritter, daß
beleidigende Aeußerungen des Abtes Melchior zu St. Trudpert[102] gegen
den Freiherren Anthoni zu Stauffen, nach den von dem Abte gegebenen
Erklärungen, keinem Betheiligten an Ehre, Herkommen, Stand und Leumund
nachtheilig sein sollen.
1550, December 22.
Zu wyssend vnd khundt sy menigklichem mit disem brieff, nach dem
sych spaͤnn[103] vnd irrung zugetragen zwischen dem wolgeborenen
| herren, herren Anthonien freyherren zu Stouffen an einem vnd dem
erwürdigen vnd geistlichen herren, herren Melchior | abte des gotzhußes
zu sant Trutprecht am anderen teil von wegen etlicher wortt, die
sich vff den acht vnd zweinzigen (sic!) tag | des Monats Marcii
nechst verschinen,[104] als man etliche spaͤnnige hoͤltzer
besichtiget, von dem genantten hern abte wider den gemelten herren
von Stouffen geredt haben solle, welche wortt der gedacht herr von
Stouffen fuͤr schmelich vffgenommen, den herren abbt rechtlich
darum zu suchen willens gewest. Vnd aber derenhalben fuͤr vnß
herren vnd gesellen der loblichen geselschafft zum Ritter, vermoͤg
der ordnung, vff huͤt dato khomen, daruff man sy zu beiden teillen
notturfftig[105] gehoͤrt. Demnach aber der vorgenant her abbt die
selbige wortt nit dermassen, das sein wyll vnd gemiett inne[106]
den herrn von Stouffen an seinen eeren, herkomen vnd guͤten
leimbdten[107] zu verletzen ye willens gewest, auch noch sein wyll
vnd gemiet nit sye, sonder, was er geredt, habe er als ein altter,
bedagtter man vß vnbedachtem beweglichen gemiett gethonn, verantwurt
hett, vnd woͤlle ime, herren von Stouffen, alle eer, lieb vnd
diennst, wie bißher bewysenn, daruff den die parthien vff vnnser
fruͤntlich bitt vnd ansuͤchen dise sachen vnnß heim gestellt
haben, dwill[108] wir dann in des herren abbts verantwurttung, das sein
wyll vnd gemiett den hern von Stouffen darmit an seiner eeren, herkomen
vnd gutten leimbdten zu verletzen nit gewest, genugsam gehoͤrtt, so
haben wir durch vnseren güetlichen spruch ertheiltt, das dise wortt
keinem teil an seinen eeren, herkomen, standt vnd guͤten leimbdten
nachteilig sein sollen, auch hiemit deren halben gericht, vertragen
vnd vereinbartt sein, also das kein theill den anderen deren halben
wytter suͤchen[109], weder inner noch vsserthalb rechtens beschweren
woͤlle. Das sy vnnß zu beiden teilenn by guͤtem glauben, eren vnd
würde zugesagt vnd versprochen haben mit verzyhung[110] aller gnaden
vnd freyheitten. Deß zu vrkhundt so haben der erwürdig, die edlen und
vesten, herr Wolffgang von Honneck, Comenthur alhie zu Fryburg im
tutschen huß, Hannß Albrecht von Anwyll, dieser Zeit Burgermeister
der statt Fryburg, Hannß Wilhalm von Liechtenfels vnd Erhartt von
Falckenstein im namen vnd von wegen gemeiner herren vnd gesellen der
loblichen gesellschaft zum Ritter ire eigne insigell zu vnd an disen
brieff thonn hencken, der geben ist vff den zwein und zweinczigistenn
tag des monats Decembris im jar als man zalt nach Christi vnsers
lieben herren vnd erloͤsers geburtt tusendt fuͤnffhundert vnd
fuͤnffzig.
Perg.-Orig. mit 4 Siegeln, von denen indeß nur noch zwei (v.
Lichtenfels und v. Falkenstein) gut erhalten.
Karlsruhe. Großh. General-Landes-Archiv: Urkundensection St. Trudpert,
Convolut 36.
/Karlsruhe./ /v. Weech./