[81: an uns gelangt, uns berichtet worden ist.]
[82: Wassertrüdingen an der Wörnitz.]
[83: jetzt Auhausen, 1/2 Stunde südlich von Wassertrüdingen, ebenfalls
an der Wörnitz gelegen, ein Augustinerkloster, in welchem 1608 die
Union gestiftet wurde.]
[84: Durch diese Flankenbewegung suchte Casimir die Bauern von
Heidenheim abzuschneiden.]
Das ayd vnd Regiment der aydgnosen der Sweiczeren wan sy in das veldt
oder in dem krieg cziehen etc.
Zwm ersten sol ain hawptman sweren des gmaynen volgks nucz vnd ere
zw füderen vnd iren schaden zw wenden vnd das volgk nindert[85] zu
verfüeren noch kain czug für sich selbs für zw nemen an[86] der rät
wissen und willen vnd dar inn das pest zu thuen getrewlich vnd an geuär.
Item ain vändrich oder ain vändltrager sol sweren mit dem banner oder
vändl mit trewe vnd warhait vmb ze geen vnd an ains hauptmans wissen
vnd willen nindert hyn ze cziechen vnd das banner oder vändl recht ze
haben vnd auch pey dem banner oder vändl ze sterben oder gneßen[87] vnd
dar ynn sein pests ze thuen getrwlich vnd an geuär so verr[88] sein
leib vnd leben gelangen mag.
Item ain vndter vändrich oder vntter vändltrager swert: mit dem banner
oder vändl mit trew vnd warhait vm ze gyen so vere sein leib vnd leben
gelangen mag vnd an ains hawptmanß vnd ains vändrichs wissen vnd willen
nindert mit dem vändl ze cziechen vnd dar ynn sein pests zu thuen
getrülich vnd an geuär.
Item dye dy zw dem banner oder vändl gegeben seindt swerent da pey ze
pleiben vnd des acht ze haben ob ain vändrich krangk wurdt oder nichts
möcht oder vmb keme das sy dann zw dem banner oder vändl greiffen vnd
das auffrecht heben vnd ie ainer dem anderen das pieten da pey ze
sterben vnd ze genesen getrewlich vnd an geuär.
Item der Schüczen hawptman swert auch des gmaynen volgks nucz vnd ere
ze füderen vnd schaden ze wenden vnd darynn sein pests ze thuen vnd dy
schüczen nit ze verfüeren vnd mit ynne kayn pesunderen czug ze thuen
noch für zenemmen an ains hawptmans wissen vnd willen desgleichen
sollen dy anderen hawptleut auch halten vnd sweren waß itlichen[89]
peuolchen würdt darynn sein pests ze thuen vnd kainer mit seinen
waner[90] oder vändl auß dem here ziechen oder lauffen an erlaubniß des
obristen hawptmanß getrülich vnd an geuär.
Item ain Schüczen vändrich oder bannertrager swert gleich alß der recht
vändrich vnd so uil meer das er dem schüczen hawptman mit dem zaichen
gehorsam sein soll vnd soll auch an sein willen vnd wisßen mit dem
vändl nindert hyn ziechen.
Item dye dy vor vnd hynder den baner oder vändl geordnet werden dy
swerendt vor oder hynder dem baner oder vändl alß ietlicher] geordnet
ist zw pleyben vnd das helfen peschirmen vnd pehüten so verr ir leib
vnd leben gelangen mag.
Item dye schüczen sweren nindert hyn ze lauffen an irs hawptmans
willen vnd wissen.
Item dye wachtmeister dy sweren das sy: so man vntter den veinten
ist dye wacht steet[91] wol wellen peseczen vnd dar pey ligen vnd
luegen[92] das dye wol peseczt vnd versechen seind vnd dar ynn ir pests
thuen getrewlich vnd an geuär.
Dar nach got dem almächtigen vnd seiner werden muter maidt[93] maria
ze lob vnd ere seczen vnd ordnen wir das nyemant in kayn kirchen
sträflichen lauffen oder gien sol dy zw perawben Vnd mit sunderhait waß
zw der kirchen gehört vnd kirchenguet ist von der kirchen nit ze tragen
oder von danen verändern.[94] Auch dy wirdige priesterschaft frawen vnd
kinder nit ze smächen noch sträfflich handt an sy nit legen Sy auch nit
ze endteren[95] noch nichs arg zwe fügen. Vnd wer das vbersicht dem sol
man straffen an leib vnd an guet.
Item es sol auch nyemant fliechen vnd kayn flucht machen vnd wer
das vbersicht dem sol der nägst der pey ynn ist, so verr er mag von
leben zwn todt pringen vnd dar vmb sol nyemant weder mit gericht
noch suest[96] noch mit pueß noch peswärnüß gestrafft werden noch
kayn gericht verschuldt haben. Vnd ob ain sölicher flüchtiger in dem
ertrunne den sol man richten ob er gefangen würde: gleich alß ain
manayder schelman vnd pöswicht.
Item wenn vnß got das glück gebe das wir ain streit pehielten so sol
nyemant den anderen außziechen oder plünderen piß das der streit gar
ze ergangen ist vnd wier den sig oder dy v̈berwindung gancz gebunnen
haben vnd das feldt pehebt[97] vnd dar nach sol man mit rat dye Lewt
auß ziechen vnd waß dann erobert wirt das sol man zesammen thuen vnd
sol das gleich yedermann nach manßzal mit taylen wann von sölichen
auß ziechen vnd plünderen wo das in gefecht geschicht: widerferdt den
Leuten grosser schade vnd schandt.
Item ain ytlicher sol in seiner ordnung alß ym ze ziechen pefolchen
wirt pleyben vnd dye nit prechen noch von danen an vrlaub lauffen
sunder vor vnd hinden den baner oder vändl wie dann dy ordnung auß
weist pleiben.
Item wenn auch ain raub gewunnen oder genommen wirdt essende speiß es
sey vich oder suest anders das sol nymant an vrlaub seins hawptmans
vnd der rätt auß dem velt füeren da mit ain gmayne dester paß gespeist
werde vnd das auch vmb ayn gleichen pillichen pfenning geben ain
gemayne da mit nit ze v̈berschäczen.
Es sol auch nyemandt prennen an ayns hawptmans oder der rätt vrlaubs
piß das das volgk für oder durch zücht da mit dye nachthuet oder speyß
nit gehyndert werde.
Item es sol auch nyemandt aynicherlay spil spilen wie das genent
oder gehayßen ist gancz nichs außgenomen noch hynden geseczt an ains
hawptmans willen vnd vrlaub wann[98] von spilen vil vnfreundschafft vnd
aufruer erstet vnd sol auch nyemandt kayn pößen swuer thuen.
Es sol auch yederman in veldt in der veindt landt sein harrnisch vnd
sein wer pey inn tragen er gee ze kirchen oder ze rat tag vnd nacht.
Es sol auch nymant auß dem veld oder suest von baner oder vändl ziechen
an ains hawptmans wissen vnd erlauben weder aushyn weder inhyn wercz
vnd welcher das v̈berdrit hat sein sold dem er des zuegs verdient hat
verloren.
Item ob es auch zu ainem gefecht oder streit kommen wurd so sol
nyemandt ain geschray noch rueffen machen sünder got vnd sein wirdige
mueter mariam an rueffen vnd dye vor augen haben vnd da mit mändlich
vnd ritterlich vechten alß vnser vorvaderen gethan haben.
Item wenn auch dy gesellen wider einander stössig wurden ainer oder
meer da sol yederman schaiden vnd sich nit parteyen ainen tail für den
ander ze helfen oder peystyen: dye stösß trölich zerlegen vnd frid auff
nemmen vnd sol der frid vmb alle sachen geben werden vnd sol nyemant
den anderen frid versagen sunder dem fur wordt vnd werch geben vnd wer
den frid pricht mit fluechen oder schelten den sollen dy hawptleut pey
iren ayd an seinen eren oder an seinen leib vnd guet straffen wer aber
den pricht mit werchen den sol man ab slagen sein hawpt. Thet aber
ainer den anderen vber den frid leiblöß[99] der ist ein mördrer vnd man
sol im auf ain rad seczen.
Pey dem ayd sol nyemant ainer den anderen kayn todslag, der ausserthalb
den zug gescheen wär, rechen in der czeit alß wir in feld sein und wer
das vbersäch zw des leibs vnd gut sol man richten nach recht.
Item vor allen dingen pieten wir das nyemant für sich selbs kain
auffbruch noch auflauff mach ob bald dy veind gegenbürtig[100] wären
dann mit vrlaub der hawptleut vnd mit ordnung alß das vnsere vorderen
auch gepraucht vnd heer pracht haben.
Es sol auch nyemant kayn mül brechen noch der mül gschürr hyn weg
tragen an ayns hawptmans wissen vnd willen.
Item da pey sol yederman sweren vnsere veind an leib vnd guet ze
schedigen so verre unser aller leib vnd guet gelangen mag vnd ainem
hawptman vnd seinen poten gehorsam ze sein noch kain zug noch antrag
ze thuen an ains hawptmanns vnd der rät wissen vnd willen vnd dar pey
vnseren frid nit ze peschedigen weder an leib noch an guet vnd pey den
ayd an ain gefecht oder streit nyemant ze vachen sunder so vere man mag
vnser veindt ze tödten.
Dyse abschrifft hab ich genomen auß der zedel, die man pey ain hawptman
der Sweiczeren hat funden in dem nägsten schlag der da geschehen ist in
der vergangen vasten der Jar zal: (14)99, pey Costnicz vnd hat sy herre
hannß Trugksaß pracht gen walsee vnd ist er dar nach pald worden der
öbrist hawptmann vber das heer das da ligt ze Costnicz.
Item es sagt alle welt in Swaben lob vnd dangk den etschleuten vnd
ärczt knappen vmb ir ritterlich vechten vnd tat dy sy than haben piß
hye her wider dy Sweiczer pesunder wir di Chör[101] vnd pey veldkirchen
vnd hat der gancz Schwäbisch pundt ain großen wolgefallen und troest
zw den etschleuten alß ich dann das warlich vernomen hab nit alayn von
here hannßen Trugkßsaß sunder auch von manigen anderen pideren leuten
dy in dem krieg sein gewesen vnd noch sein. Got geb vnß gnad sig vnd
glügk wider all vnser veindt amen amen amen.
Wolkenstein’sches Archiv im germanischen Museum.
/Nürnberg./ /Hans Bösch./