Wir vͦlrich grâfe zuͦ wirtemberg vnd wir Eberhard ouch grâfe
zuͦ wirtemberg sin Sune Bekennen offennlich für vns vnd vnser
erben vnd tund kunt mit disem briefe daz wir vnsern lieben getruwen
Niclaußen von wyle in vnser Cantzly vffgenomen vnd bestellet haben vnd
yetz vffnemen vnd bestellen in crafft diß brieffs vns darinne zuͦ
dienen vnd die helffen zuͦuersehen wie er des ye von vns wirt
beschaid vnd besunder vnser Insigele zuͦ uerwaren vnd núntzit[1]
damit zuͦ uersigeln das vns zu schaden lang[2] one vnser wissen
vnd haissen oder vnsers hoffmaisters vnd râtes[3] denen das ye
befolhen ist ouch vns trúw vnd hold zuͦ sin vnsern schaden zuͦ
warnnen[4] vnd zuͦ wennden vnd vnsern from̅en zuͦ schaffen
vnd zuͦ fürdern vnd darby vns getrúwlich zuͦ râten nach siner
besten verstentniß vnd haimlich râte zuͦ uerswigen biß in sinen
tode vnd das alles ze tuͦnd sin leptage die wyle[5] er das vermag
getrúwlich vnd vngeuarlich[6] vnd das sust[7] nit zuͦ lassen durch
aincher[8] sachen willen. Dargegen vnd für sölichs wir vnd vnser erben
Im vnd Cristinan siner eelichen hußfrowen Inen baiden vnd nach Ir ains
abgange dem andern besunder biß in sinen tode jerlichs geben söllen
vnd wöllen zuͦ herbstzite ain fuͦder guͦts wins vnd vff sant
Martins tage zwölff schöffel guͦts rockens vnd zwelff schöffel
guͦts dinckels vnd darzuͦ zwelff pfund heller tugentlich[9] one
all vßzuge vnd verhinderung sich darwider zuͦ gebruchen vnd one
Iren costen vnd schaden, zuͦ dem ouch Im sin leptage der drittaile
des gelts vnd geniesses in der gemelten Cantzly fallende gefolgen
vnd geben werden sol vnd er han den tische in der cantzly mit essen
vnd trincken vngeuarlich. Wir vnd vnsere erben söllen vnd wöllen
ouch schaffen vnd bestellen mit oberstem[10] fliß daz das ampt des
Com̅issariats eelicher sachen in allen vnsern lannden vnd gebieten
vff Ine werde bewenndet vnd die vnsern in sölichen sachen zuͦ Im vnd
nit zuͦ andern kerent vnd fliessent vnd dan Im daruon der drittaile
des lones so deßhalb geben wirdet gedych[11] vnd werde vnd die andern
taile in die cantzlye fallend vngeuarlich. vnd söllen vnd wöllen ouch
wir vnd vnser erben In vnd sin hußfrowen obgenant fryg aller stiuren
schatzungen vfflegungen vnd beswerungen belyben lassen es were dan ob
sie ettwas gelegens guͦtes in vnser herrschafft erkoufften oder
sust zuͦ iren hannden brechten daruon sölten sie tuͦn als ander
die vnsern von solichem tuͦnd vngeuarlich. Vff das ouch der benant
vnser lieber getrúwer Niclaus von wyle sölichs wie obstat getrúwlich
vnd ongeuerde zuͦ halten lyplich zuͦ got vnd sinen hailigen
gesworen hat deßglichen wir fúr vns vnd vnser erben Im sölichs wie von
vns obstet getrúwlich zuͦ halten ouch geredt vnd versprochen haben
by vnsern guͤten trúwen one geuerde vnd darumb vnser aigen Insigele
getan hencken an disen briefe, darzuͦ ouch vnsere lieben getrúwen
wolff von Tachenhusen vnd ludwig von grâfneck hoffmaistere vff vnser
begerunge ir aigen Insigele ouch gehenckt haben an disen briefe der
geben ist an Samstag nechst nach sant lucyen tag des jars do man zalt
nach crists geburt Tusent vierhundert vnd im Nün vnd Sechtzigesten
Jare. (_16_. _December 1469_.)
Abschrift aus einem württembergischen Dienerbuch von 1460-1479 aus dem
k. Haus- und Staatsarchiv zu Stuttgart mit der Nummer G. 33.