Produced by Laurent Vogel (This file was produced from
images generously made available by the Bibliothèque
nationale de France (BnF/Gallica) at http://gallica.bnf.fr)
Cy commence le traittié intitulé les euvangiles des quenoilles faittes a
l'onneur et exaucement des dames.
Maintes gens sont au jour d'huy qui alleguent et auctorisent leurs
parolles et raisons par les euvangilles des quenouilles qui gaires ne
scevent de quele importance et auctorité elles sont ne qui en furent les
sages doctoresses et premieres inventerresses. Et aincoires qui pis est
les alleguent plus par derrision et en mocquerie qu'ilz ne font par
affection qu'ilz ayent a la grande substance qu'elles contiennent. Et ce
font ilz tousjours en l'amoindrissement et reboutement des dames dont
c'est pechié et grant honte pour ceulx qui ainsy le font.
Car ilz ygnorent la grande noblesse des dames/ et les grans biens qui
d'elles procedent. Car pour ce que la premiere femme fut faitte et cree
en lieu hault et noble plain de net et pur air pour ce sont toutes
femmes naturelement nobles/ nettes/ douces/ courtoises/ et plaines
d'esperit legier et inventif et si tressoubtil: que a bien pou d'ayde
elles scevent pluiseurs choses avenir. Car les passeez et presentes
scevent de leur propre nature selon les conjectures et dispositions des
temps des personnes des auguremens des oyseaulx et des bestes et brief
de toutes autres creatures comme il apperra ou procés de ce livre.
Or est ainsi doncques que pour obvier a teles injures et teles
mocqueries mettre a neant/ et par contraire exauchier les dames et leurs
euvangiles verifier: je qui de pieça et mesmes des mon enfance ay esté
leur humble clerc et serviteur/ et dont des biens que d'elles ay receus
assez ne me sauroie loer/ je a la requeste d'aucunes mes treschieres/ ay
comme cy aprés porrez veoir mis par escript et en ordre ce petit
traittié qui contient en soy le texte des euvangiles des quenouilles
ensemble pluiseurs gloses et postiles y adjousteez et esclarciez par
aucunes sages dames desqueles les noms seront cy ensiuvant mis et
escrips.
Les noms des dames qui firent le texte des euvangiles des quenoilles.
Pour entammer doncques ceste euvre il est tout notoire a tous bons et
vrais catholicques que pour mettre et redigier par escript a la memoire
perpetuele des crestiens les saintes et vraies parolles/ ensambles les
vertueuses euvres et fais de nostre benoit sauveur et redempteur jhesus
crist/ et de ses sains apostres/ furent esleus quatre preudhommes
d'entr'eulx plains de verité et vertus pour faire cestui sainct mistere
qui se nomment euvangiles par les escriptures lesqueles la vraye et
sainte foy catholique est tenue/ enluminee et corroboree/ et sera
jusques en la fin des siecles.
A semblable doncques pour verifier et mettre en en avant les parolles et
auctoritez des femmes de jadis/ affin aussi de les nom perdre ne
telement evanouyr que la memoire ne puisse estre fresche et recente
entre celles du temps present et de cellui ont esté trouveez six
matrones sages et prudentes pour reciter et lire lesdittes euvangiles
des quenouilles en la maniere que cy aprés sera declairié.
Et pour ce que en tout tesmoingnage de verité il convient trois femmes
pour deux hommes: pour faire et acomplir doncques le nombre desdiz
quatre euvangelistes il a convenu que six femmes aient esté empeschiez
de faire cestui euvre pour plusgrande approbacion de verité. desqueles
les noms se ensuivent.
La premiere fut nommee dame ysengrine du glay.
La seconde estoit appellee dame transeline du croq.
La tierce eut nom dame abonde du four.
La quatre fut appellee dame sebile des marez.
La quinte eut nom dame gomberde la faee.
Et la sixiesme eut nom dame berthe de corne.
Ces six dames furent si tressaiges en leur temps que se ce eust esté
pour conjurer un bleu dyable ou pour le loyer dessus un coussin: si
estoient elles assez expertes et habilles.
Qui fut la premiere femme qui mist avant ces euvangiles. Et comment le
composeur de ce livre fut constraint de faire cest euvre.
Selon ce que je treuve es anciens registres ces euvangiles furent
commenceez des les premiers et second eages du monde ou temps que
regnoit le fort et puissant roy zoroastes qui fut le premier qui trouva
l'art de nygromancie/ de laquele art il monstra et enseigna partie a la
royne sa femme nommee hermofrodita. et laquele depuis fist de beaux
principes pour le commencement de ces euvangiles. mais elles ne furent
de son temps acheveez. ains d'eage en eage/ et de siecle en siecle elles
ont esté multiplieez/ et par legiers espris infusez es corages des
prudentes femmes chascunes en son temps selon les auguremens et signes
qu'elles povoient concevoir et veoir tant en la terre comme en l'air.
Et depuis ce temps n'a esté aincoires aucun/ voire que j'aye sceu ne qui
soit venu a ma congnoissance qui ait volu prendre la paine de les mettre
par escript ou en registre/ au moins le tout/ ne par ordre/ mais ce tant
pou que fait en a esté/ ce a esté confusiblement et par pieces puis cy
puis la sans tenir aucun ordre. et aincoires ce que fait en a esté/ ç'a
esté plus par derrision et mocquerie que autrement et toutesfois elles
ne deffaillent pas de grant mistere. Et pour vous donner a cognoistre
comment je suis venu en ceste temeraire et presumptueuse hardiesse et
outrecuidance que de vouloir escripre et mettre par ordre cest euvre: il
est verité que un soir aprés souper/ pour cause d'esbat et de
passetemps/ es longues nuis entre le noel et la chandeleur derrain
passé/ je me transportay en l'ostel d'une assez ancienne damoisselle
assez prez ma voisine ou j'avoye acoustumé d'aler souvent deviser/ car
pluiseurs des voisines d'environ venoient illec filer et deviser de
pluiseurs menus et joieux propos dont je prenoie grant soulas et
plaisir. mais pour ceste fois estoient illec les six dames assambleez
qui moult fort estoient empeschiez de diverses raisons/ et souvent de la
grant haste qu'elles avoient de dire leurs propos: elles anticipoient
l'une l'autre et parloient toutes ensemble.
Moy aucunement honteux de ceste ma soudaine avenue entr'elles/ me voulz
retraire arriere et pris congié d'elles en moy deportant d'illec. Mais
soudainement je fus d'elles rappellez et de fait arrestez par la robe
par l'une d'elles dont moitié force moitié requeste je retournay et
m'assiz entr'elles et leur priay moult humblement qu'elles me
pardonnaissent de ce que si francement et si baudement me estoie embatus
entre elles.
L'une prist la parolle pour toutes les autres. et me dist que vrayement
je leur estoie le tresbien venus et le mieulx que homme qu'elles
sceussent en ce monde. et qu'il leur sembloit que dieu m'avoit illec
amené pour estre en leur ayde attendu le fait en quoy elles estoient
pour ceste heure occuppeez et empeschiez/ et que mieulx leur drescheroie
leur euvre et concept veu que autreffois en autres matieres avoie
escript des dames fort a leur honneur. et aincoires de present me
prioient que le pareil voulsisse faire a cestui leur tresgrant besoing/
et elles en temps oportun par elles ou par leurs successeurs me feroient
tele remuneracion que jusques a souffire/ me priant en oultre que
voulsisse entreprendre de mettre par escript un petit volume qui pour
son nom prenderoit. les euvangiles des quenoilles en memoire et
souvenance perpetuele d'elles/ et a l'adreschement de toutes celles qui
vendroient.
Moy aucunement honteux de la loenge qu'elles me donnoient me cuiday
excuser. mais tantost je fus sy anticipez de parolles/ et de diverses
raisons enveloppez: que tout confus me convint entreprendre ceste
charge. En laquele s'il y a a redire ou aucune faulte/ ou mauvais
entendement: je vous supplie le me pardonner/ et laditte faulte imputer
a celles qui par si tresgrant haste le me disoient: que loisir ne temps
n'avoie aucuneffois les bien entendre/ ne ma main qui par vieillesse est
devenue pesante/ et mes yeulx obnubilez ne les povoient si hastivement
comprendre ne servir si tost qu'elles eussent bien volu.
Ceste charge doncques par moy ainsi prise les dames me remercierent
grandement/ et prindrent jour entr'elles et heure de retourner le
lendemain aprés souper. Et me chargierent que avec moy aporttaisse
largement papier et enchre et plumes car elles vouloient determiner de
haultes besoingnes.
L'ordonnance de cestui livre mise en termes par dame ysengrine.
L'endemain a heure assignee je furny de mes agoubilles me trouvay ou
lieu assigné ouquel estoient desja assambleez les six dames qui aprés
moy attendoient. Et elles de ma venue joyeuses comme par samblance elles
demonstroient/ aprés qu'elles me eurent preparé mon lieu pour a mon aise
oyr et escripre leurs oppinions et doctrines: l'une d'elles et la plus
ancienne nommee/ dame ysengrine du glay: commença a parler aprés licence
obtenue des autres ses compaignes les parolles qui s'ensuivent.
Mes treschieres voisines et compaignes en ceste vocacion vous voyez/ et
aussy il est tout notoire comment les hommes du temps present ne cessent
de escripre et faire libelles diffamatoires et livres contagieux
poingnans l'onneur de nostre sexe. Et touteffois attendu que eux et nous
sommes fais tous d'un ouvrier descendans l'un de l'autre. Et encoires
puis que dire le me convient sommes venues et descendues de plus hault
et plusnoble lieu qu'ilz ne sont/ et faittes de matiere plus nette et
plus clarifiee que eux: il m'est avis a correction de vous toutes que
bon seroit que a l'ayde de cestui nostre secretaire et amy nous feissons
un petit traittié des chappitres que volons tenir/ et mettre par ordre/
lesquelz depieça de noz grandes et anciennes meres ont esté trouveez
affin de les non mettre en oubliance et qu'il puisse venir entre les
mains de celles qui aincoires sont a a venir. Lequel traittié contendra
les chappitres des euvangiles des quenoilles/ ensemble les gloses que
aucunes sages et prudentes matrones y ont adjousté et aincoires feront
en multipliant le texte.
Et pour entrer en la matiere et mettre ordre en nostre commencement vous
savez qu'ilz sont six jours ouvriers en la sepmaine et nous sommes six
qui avons empris ceste besoingne/ et qui avons veu et oy recorder par
noz anciennes pluiseurs choses des viel et nouvel testament/ et
pluiseurs vraies et bonnes auctoritez. Si m'est avis en conclusion qu'il
seroit bon que a lundy prochain venant nous assamblissons en l'ostel de
maroie ployarde ou l'en a acoustumé de tenir la serie/ environ sept
heures du vespre/ et illec se c'est vostre avis l'une de nous commencera
sa lecture/ et ses chappitres recitera en la presence de toutes celles
qui illec seront assambleez pour les tenir et mettre en perpetuele
memoire.
Les assistentes tantost et sans autre deliberacion dirent toutes a une
voix que dame ysengrine avoit tresbien dit. Et de fait lui prierent
qu'elle voulsist entreprendre ceste charge de lire la premiere pour ce
lundy a l'eure assignee/ et elles sans aucune faulte y seroient et sy
prieroient aucunes de leurs voisines vielles et jones pour mieulx
auctorisier leur chappitre. Ceste charge prist moult volentiers dame
ysengrine et dist qu'elle en feroit son mieulx. En ce disant elle se
tourna vers moy et moult amoureusement me requist que son secretaire
voulsisse estre/ et pareillement de toutes les autres. et qu'elles me
feroient guerredonner par aucunes d'elles des plusjones et a mon chois/
duquel guerredon je les remercie/ et dont desja je me tiens pour
content.
L'ordonance de la premiere journee. et de la descripcion de dame
ysengrine du glay et qui elle fut.
Le lundy au soir environ entre sept et huit heures aprés souper
s'assemblerent lesdites dix dames/ ensembles toutes les voisines qui
accoustumé avoient d'y venir et pluiseurs autres qui y furent inviteez
qui aincoires n'y avoient esté pour oyr le mistere que illec faire se
devoit/ dame ysengrine du glay y vint acompaignie de pluiseurs de sa
congnoissance qui toutes apporterent leurs quenoilles/ lin/ fuiseaux/
estandars/ happles/ et toutes agoubilles servans a leur art. Et brief ce
sembloit a veoir un droit marchié ou l'en ne vendoit que parolles et
raisons a divers propos de pou d'effect/ et de petite valeur.
Le siege de dame ysengrine estoit preparé a un costé un pou plushault
des autres/ et le mien decosté elle devant moy un rondeau ou estoit
assise une lampe d'oile pour enluminer sur mon euvre/ et toutes les
assistentes avoient tourné leurs visages ou regart de dame ysengrine
Laquele aprés licence obtenue commença a parler en ceste maniere. Mais
avant que je commence escripre ses chappitres je vous veuil reciter
l'estat/ et la genealogie d'elle.
Dame ysengrine estoit eagie de .lxv. ans ou environ/ belle femme avoit
esté en son temps mais elle estoit devenue fort ridee. les yeulx avoit
enfonssez et la bouce grande et large/ cinq maris avoit eu/ sans les
acointes de costé. Elle se mesloit en sa viellesse de recevoir les
enfans nouvellement nez. mais en sa jonesse elle recevoit les grans
enfans. moult experte fut en pluiseurs ars. Son mari estoit asses jone
duquel elle estoit fort jalouse/ et dont elle faisoit souvent grandes
complaintes a ses voisines. Touteffois licence comme dit est obtenue/
elle commença son euvangille et prist son thume sur son mari en hongnant
et dist.
Cy commencent les chappitres de l'euvangile dame ysengrine du glay pour
le lundy.
Mes bonnes compaignes et voisines/ il n'est aucune de vous qui ne sace
que je prins mon mari josselin plus pour par sa beaulté que pour sa
richesse/ car povre compaignon estoit. Et vela je ne le vey ne hier ne
au jour d'huy/ dont j'ay grant doleur au cuer. Et certes il a grant
marchié des biens que mes maris ses predecesseurs ont parcidevant a
grande paine et doleur assemblez. je croi que ce sera ma mort.
Et a ce propos et pour le premier chappitre/ je dy pour aussy vray comme
euvangile que l'omme qui despent indeuement les biens qui lui viennent
de par sa femme et sans son gré et congié: il en rendera conte devant
dieu comme de chose emblee.
Glose. Sur ce chappitre dist une ancienne matrone nommee griele femme de
jehan joquesus. Certes cellui mari qui fait contre ce chappitre/ est mis
aprés sa mort ou purgatoire des mauvais maris en un baing plain de
soulphre ardant. s'il n'a faitte sa penitance en ce monde par les
hospitaux.
Le second chappitre.
Il n'est riens plus certain que le mari qui va au contraire de ce que sa
femme lui conseille et veut faire/ et qui la contredist de chose qu'elle
dye: il est faulx et desloyal parjur.
Glose. Certes dist gombaude du fossé j'en ay veu pluiseurs miracles de
ceulx qui ont transgessé ce chappitre. et mesmes mon parastre se rompy
la jambe pour ce qu'il n'avoit volu croire le conseil de ma mere.
Le tiers chappitre.
Homme qui sa femme bat pour quelconque cause que ce soit n'aura jamais
pour priere qu'il face faire grace de la vierge marie/ se premierement
il n'a obtenu pardon de sa femme.
Glose. Maroie ployarde dist sur ce chappitre que cellui qui bat sa femme
fait autel pechié comme s'il se voloit soy mesmes desesperer. Car selon
ce j'ay oy dire a no curé/ ce n'est que un corps d'homme et de femme
acouplez par mariage.
Le quart chappitre.
Homme qui fait aucune chose sans qu'il le donne a congnoistre a sa femme
je vous dy comme euvangile qu'il est en conscience pire que larron qui
bien l'oseroit dire.
Glose. Les anciennes matrones ont maintenu pour verité que les enfans
qui viennent de tel mariage jamais en ce monde ne devendront riches/ et
si seront volentiers menteurs.
Le cinquiesme chappitre.
Mes amies je vous di pour verité qu'il n'est doleur ne angoisse pareille
a celle que femme porte quant son mari va autre part porter et donner sa
substance. et especialement quant les biens viennent de par elle.
Glose. Pour certain dist une vielle qui estoit nommee flourette la
noire. Cellui qui rompt son mariage par adultere est moins a prisier que
un juyf ou sarasin. car il est parjur.
Le .vi.e chappitre.
Fille qui veult savoir le nom de son mari a venir/ doit tendre devant
son huis le premier fil qu'elle filera cellui jour/ et de tout le
premier homme qui par illec passera savoir son nom. sache pour certain
que tel nom aura son mari.
Glose. A ce mot se leva l'une des assistentes nommee geffrine femme de
jehan le bleu et dist que ceste chose avoit esprouvee et que ainsi lui
en estoit avenu/ dont elle maudissoit l'eure d'avoir encontré un tel
homme qui toute couleur et beauté avoit perdue/ et si estoit si
tresmauvais mesnagier que autre chose ne povoit faire que dormir.
Le .vii.e chappitre.
Quant femme porte enfant et on veult savoir s'elle porte filz ou fille
on doit mettre en dormant sur sa teste du sel si soement que point ne le
sache/ et aprés en devisant a elle sachiez quel nom elle nommera s'elle
nomme homme ce sera un fils/ et s'elle nomme femme ce sera une fille.
Glose. Ceste mesmes chose m'avint quant je portoie ma fille lise
tempremeure/ dist griele du solier/ et le me fist/ et aprist ma tante
qui estoit fort ancienne et moult renommee en pluiseurs ars.
Le .viii.e chappitre.
On ne doit point donner a jones filles a mengier de la teste d'un lievre
affin qu'elles marieez et par especial enchaintes n'y pensent/ car pour
certain leurs enfans en pourroient avoir leurs levres fenduez.
Glose. Dist tantost Margot des bledz. tout ainsi en avint il nagaires a
l'une de mes cousines. car pource qu'elle avoit mengié de la teste d'un
lievre sa fille dont elle estoit enchainte en apporta sur terre quatre
levres.
Le .ix.e chappitre.
On ne doit point aussi laissier mengier aux jones filles a marier de
teste de mouton/ de crest de coq ne d'anguille affin qu'elles ne cheent
du mal sainct loup par derriere.
Glose. Certainement dist belotte la cornue/ c'est un tresgrant dangier/
car pour ce que ma mere en mengea j'en ay eu trois taches qui comme je
croy jamais ne me fauldront. L'une si est que souvent me laisse cheoir
par derriere/ La seconde que je hurte volentiers. et la tierce qu'il me
croist ou plus secret lieu de mon corps une chose a maniere de la creste
d'un coq dont j'ai grant vergoingne.
Le .x.e chappitre.
Je vous jure comme euvangile que quant une jone fille mengue
acoustumeement lait bouilly en la paelle/ ou en un pot de terre: qu'il
pleut volentiers et par coustume le jour de ses nopces. Et si a
volentiers mari merancolieux et hoingnart/ et aussi ne fault elle pas
d'estre souvent crottee et mal paree.
Glose. Dist dame abonde/ a cest texte ne fault aucune exposicion/ car la
regle en est toute commune/ et jamais n'y a faulte/ comme il apparut a
mes nopces ou pluiseurs de vous furent.
Le .xi.e chappitre.
Pour certain et pour aussi vray que euvangile quant un homme couche avec
sa femme ou s'amie ayans les piez ors et puans/ et il avient qu'il
engendre un filz: il aura puante et mauvaise alaine Et se c'est une
fille elle l'aura puante par derriere.
Glose. Maroie ployarde dist sur ce chappitre que de sa cousine germaine
en avint ainsi. Car par tout ou elle aloit elle rendoit une odeur si
puante de son derriere: que les assistens en estouppoient leurs nez mais
ne savoient qui cellui estoit qui estoit en cause.
Le .xii.e chappitre.
Pour aussi vray que euvangile je vous dy que quant un jone homme pucel
espouse une fille pucele le premier enfant qu'ilz ont est par coustume
fol.
Glose. Berte l'estroite sur ce chappitre dist que ainsi estoit nagaires
avenu a l'une de ses filles qu'elle avoit mariee au porchier de son
hostel/ car il convint que pour la premiere nuit elle leur enseignast
comment ilz devoient faire. dont il est avenu que leur premier filz est
fol et pour innocent.
Le .xiii.e chappitre.
Mes voisines et compaignes je vous dy pour euvangile que quant l'enfant
est nouvellement né et avant qu'il suche la mamelle/ se on lui donne a
mengier d'une pomme cuitte/ jamais aprés toute sa vie il n'en sera si
luffres ne gourmant a table en boire/ et en mengier. Et si en sera plus
courtois en fais et en parolle entre les dames.
Glose. Maroie morele dist sur ce texte que quant un enfant est né qui
lui porteroit le petit boyau jusques au chief: il en auroit longue vie/
douce alaine/ bonne voix/ et gracieuse loquense.
Le .xiiii.e chappitre.
Je vous asseure pour aussy vray qu'euvangile que pour faire avoir aux
enfans cheveux crespés. tantost aprés qu'ilz sont desobez/ il convient
laver leur chief de vin blanc. et en leur baing soit mise la rachine de
blanche vigne.
Glose. Dame hermofrode sur ce pas dist en corroborant le texte que qui
feroit/ sechier par deux enfans jones et beaulx l'aubette du petit
enfant sur la pointe d'une espee tranchant/ et clere que l'enfant sera
toute sa vie beaux et hardis/ et bien venus entre les nobles.
Le .xv.e chappitre.
Or entendez bien vous toutes qui cy estes presentes/ je vous avertis que
jamais on ne doit tirer espee nue ne autre long trenchant devant femme
grosse que premier que riens s'en face ne lui va doucement touchier du
plat/ sur son chief/ affin qu'ele demeure asseuree. et que son fruit en
soit toute sa vie plushardy.
Glose. Peronne bevette dist que pour ce que on ne fist point ainsi a sa
mere quant elle le portoit/ elle a esté et aincoires est si paoureuse
qu'elle n'oseroit couchier seule sans avoir compaignie d'hommes.
Le .xvi.e chappitre.
Je vous di pour aussi vray que euvangile que jones filles ne doivent
jamais mengier cerises a la derraine avec leurs amoureux car souvent
avient que cellui a qui vient la derreniere: demeure le derrenier de
tous a marier.
Glose. Dame sebile des mares dist sur ce pas que les filles ne doivent
point mengier a cachelouche leur potage avec leurs amoureux. car par
coustume il avient souvent que leurs maris ont acointe apart et non pas
les femmes.
Le .xvii.e chappitre.
Aincoires vous dy que dieu et raison deffendent le parler ou le
ramentevoir devant aucune femme mariee en eage de porter enfans ou qui
est enchainte de quelconque chose pour mengier qui pour le present et au
besoing ne se pourroit trouver affin que le fruict qu'elle porte n'en
apporte enseigne sur son corps.
Glose. Dame abonde du four dist que par ruer ou visage de la femme qui
porte enfant/ aucunes cerises frezes ou vin vermeil l'enfant en
apportera sur soy aucune enseigne.
Le .xviii.e chappitre.
Sachiez que homme qui se double en mariage est inhabile de parvenir a
aucune dignité. Et se sa femme lui faisoit le pareil cas/ sans faulte il
seroit cause de l'ung et de l'autre mal. et elle deveroit estre jugié
quitte et sans pugnicion.
Glose. Dame ysoree la courte dist sur ce pas que la femme qui veult que
son mari point ne se desvoye avec autres femmes si face par trois lundis
chanter messe de saincte avoie. et je vous dy pour certain que les dames
de paris en entretiennent/ ainsi leurs maris.
Le .xix.e chappitre.
Quant on baptise aucun enfant soit filz soit fille. se la fille a deux
parrins elle aura deux barons ou plus. et aussi se le filz a deux
marrines et il vit eage d'homme il aura deux femmes ou pluiseurs.
Glose. Certainement dist ampelune hucquette. je doy bien mauldire l'eure
que vvillequin mon mari en eut oncques tant. car il en a trois accointes
sans celles que point ne sçay.
Le .xx.e chappitre.
Quant on voit ces petis enfans courir parmi les rues a chevaulx de bois/
a tout lances/ et desguisez par maniere de gens de guerre. c'est tout
vray signe de prochainement avoir guerre et dissencion ou pays.
Glose. Perrine hulottote dist sur ce pas que quant les petis enfans
portent bannieres/ et confanons en chantant par les rues/ c'est tout
signe de mortalité.
Le .xxi.e chappitre.
Se femme veult certainement savoir se son mari se double/ si avise se
une plaine lune se passe sans elle approchier/ certes s'elle y a
souspecion se n'est pas sans cause.
Glose. Ceste euvangile est bien vraye dist maroie ployarde car il y a
plus de trois lunoisons que jan ployart mon baron ne fist ne cou ne
quoy/ et si suis aincoires femme assez pour l'endurer.
Le .xxii.e chappitre.
On ne doit point donner aux femmes grosses a mengier de nulles testes de
poissons affin que par leur ymaginacion leur fruit n'apporte sur terre
la bouche plus relevee/ et plus ague qu'il n'est de coustume.
Glose. Perrette faytos sage femme/ dist qu'elle avoit receut pluiseurs
enfans qui avoient leur debout plus long oultre mesure que les autres.
Le .xxiii.e chappitre.
Se d'aventure un homme bat sa femme enchainte/ ou la pile du pié lors
qu'elle enfantera moult grant traveil en aura. et bien souvent les en
convient morir.
Glose. Dame hermofrode dist que en ce n'a aucun remede fors qu'il
convient avoir le soler dont le mari la pila/ et qu'ele boive a mesmes
et se ainsi le fait sachiez qu'elle enfantera legierement.
Le .xxiiii.e chappitre.
S'il avient que aucun ou aucune engambe par dessus un petit enfant/
sachiez que jamais plus ne croistera/ se cellui ou celle mesmes ne
rengambe au contraire et retourne par dessus.
Glose. Certes dist sebile de ceste chose viennent les nains et les
petites femmes.
Le .xxv.e chappitre.
Sachiez pour vray comme euvangile que se la chausse d'une femme ou fille
se desloie emmy la rue et qu'elle le perde: c'est signe et n'y a jamais
faulte que son mari ou amy ne se desvoie.
Glose. A ce mot laissa le filler une nommee Transsie d'amours jone de
.lxvii. ans/ et dist qu'il n'estoit chose plus vraye que ceste
euvangile. car des mercredy derrain passé je ne vey mon amy joliet. pour
ce que en ce mesmes jour je perdy mon gartier en la rue.
Le .xxvi.e et derrain chappitre.
Et pour conclusion mes amies et voisines et pour mettre fin a mes
chappitres je vous dy que quant a une femme vient le mal des mammelles
il ne lui fault autre chose si non que son mari lui face de son
instrument naturel trois cercles environ le mal/ et sans aucune doubte
elle en garira.
Glose. Saintine tempremeure dist que on doit entendre ces trois cercles
estre fais au debout du ventre un pou soubz la chainture.
* * * * *
Toutes les assistentes commencerent moult fort a rire de ceste joyeuse
conclusion/ et moult fort loerent la sage dame ysengrine qui si
hautement avoit continuee son euvangile et departi par .xxvi. articles
qui tous estoient de grant sens et de grande importance. et promirent
qu'elles metteroient paine de tant les repeter qu'elles les sauroient
par cuer pour les publier et communicquier a celles qui point n'avoient
esté a ceste lecture.
Moult me fut bel quant dame ysengrine mist fin a son parler car papier/
et chandeille me failloient/ avec sommeil qui fort m'avoit accueilli/
car pres de minuit estoit. Si voulz prendre d'elles congié/ mais elles
me prierent que avant que partisse je veisse eslire celle qui a
l'endemain deveroit lire son euvangile. Si se mirent toutes ensemble a
conseil et d'un commun accort esleurent Transeline du croq une ancienne
damoiselle/ laquelle prist volentiers la cherge de ce faire. et me
requist tresinstamment en la presence d'elles toutes que a ce besoing la
voulsisse servir. je lui promis que envis que volentiers: mais d'une
chose la requis/ c'est qu'elle venist un pou plus tempre que ce lundy
n'avoient fait affin de eviter le traveil de la nuit et le veillier qui
les yeulx traveille.
S'ensieut la continuacion des euvangiles faittes et leuttes par dame
transeline du croq pour le mardy en l'ostel et a heure acoustumez.
Quant vint le mardi environ cinq heures du vespre commencerent venir et
assembler femmes tant vielles comme jones de toutes pars/ car desja
elles avoient publié ce que le lundy avoit esté fait/ et ce que le mardy
faire se devoit par dame transeline du croq femme bien renommee/ car
elle estoit gentil femme eagie de environ soixante ans longue et maigre
estoit. en ses jones jours avoit demouré avec une dame qui savoit partie
de l'art de geomancie et rendoit raisons de pluiseurs choses avenir.
avec laquelle elle aprist moult d'augurie dont depuis elle fut moult
renommee et honnouree. Mais pour ce qu'elle avoit un jour mengié souppe
avec venus faitte au chauderon d'amours: oncques depuis ne cessa de
exercer son service avec les subgez d'icele. Et en sa vieillesse
s'estoit retraitté et alliee avec le curé de la ville qui de nuit et de
jour oyoit sa confesse/ pourquoy toutes celles de son voisinage
l'avoient en grant reverence.
Dame transeline doncques venue entr'elles salua toute la compaignie. Et
aprés qu'elle m'eut demandé se ma plume estoit preste d'escripre:
commença a parler en ceste maniere.
Le premier chappitre.
Or ça dist elle mes bonnes voisines et amies en continuant nostre propos
du soir precedent. je vous prie que silence soit faitte et je vous dy
pour aussi vray comme euvangile que quant une femme veult estre de son
mari ou de son amy bien amee: si lui face mengier herbe de chat/ et il
sera d'elle si tresamoureulx qu'il n'aura aucun repos se d'emprez elle
n'est.
Glose. Ceste chose est veritable dist burge fauvele/ car tout ainsi en
fis a mon mari/ et lui en feis une salade/ mais ceste amour ne dura que
six sepmaines pourquoy je cuide qu'il le fault renouveller souvent.
Le second chappitre.
Et si vous dy que qui pourroit finer d'un vray mandegloire et le
couchast en blans draps/ et lui presentast a mengier et a boire deux
fois le jour/ combien qu'il ne mengue ne boive: cellui qui ce feroit
devendroit/ en pou d'espace moult riche. et ne sauroit comment.
Glose. Certes dist jehane vvasteliere on dist/ mais c'est en tapinage/
que alexus du cornet est ainsi devenus riche.
Le tiers chappitre.
Je vous dy pour euvangile que quant aucun se met au chemin et un lievre
lui vient audevant c'est un tresmauvais signe. Et pour tous dangiers
eviter il doit par trois fois soy retourner dont il vient et puis aler
son chemin/ et alors sera il hors du peril.
Glose. A ceste parolle se leva maroie la faee et dist tout hault/ que
cestui chappitre estoit moult veritable. Car son parrastre avoit rompu
la jambe au cheoir de son cheval aprés qu'il avoit rencontré un lievre.
Mais qui rencontre un loup/ un cerf/ ou un ours c'est tresbon signe.
Le .iiii.e chappitre.
Oncques homme sage ne monta sur asne pour l'onneur de nostre seigneur
qui dessus monta. mais tresbien sur cheval. car qui chiet de l'asne il
dist crieve: et qui chiet de cheval il dit lieve.
Glose. Sur cest article se peut faire un argument. car quant joseph mena
la vierge marie en egypte elle monta sur un asne/ et toutesfois elle
n'en eut nul grief. Respondy dame sebile du fossé que aincoires n'avoit
jhesucrist point monté sur l'asne comme il fist depuis. replica une
ancienne nommee perrette du trou punais/ que si avoit et que nostre dame
l'emporta avec elle monté sur l'asne. Pour cest argument sourdy grande
noise entre toutes les assistentes/ et telement que les unes
soustenoient le texte de ceste euvangile/ et les autres soustenoient la
glose/ et si grant clameur sourdy entre elles que on ne savoit a la
quelle entendre. Touteffois dame ysegrine comme presidente pour ceste
nuitie leur imposa silence affin qu'elle peust paisiblement parfaire sa
lecture. laquele chose elle obtint a tresgrande paine.
Le .v.e chappitre.
Mes voisines pour muer propos et abaissier vos debaz je vous dy pour
euvangile que se une femme laisse son trepié ou son greil sur le feu
sans y mettre ou baston ou tison ardant/ sachiez qu'elle en envieillist
fort et en a ride le visage.
Glose. Dist l'une des filleresses nommee piate au long nez que qui s'en
va couchier sans remuer le siege sur quoy on s'est deschaussié/ il est
en dangier d'estre ceste nuit chevauchié de la quauquemare.
Le .vi.e chappitre.
Qui laisse de nuit une selle ou un trepié les piez dessus/ autant et
aussi longuement/ est l'ennemi a cheval dessus la maison.
Glose. Certes dist ysoree la temprieve que sa grant mere disoit que
autant de gannes dyables sont assiz dessus chascun pied s'ainsi demoure/
comme il en y a.
Le .vii.e chappitre.
Je vous asseure et dy pour euvangile que quant agaches ou pyes
gargonnent dessus une maison que c'est signe de tresmauvaises nouvelles.
Mais se moussons y gargonnent/ ou y font leurs nyds c'est signe de bon
air/ et de bonne fortune.
Glose. Gertrud des blez dist que quant une cygoingne fait son nyd dessus
une cheminee/ c'est signe que le seigneur de l'ostel sera riche et
vivera longuement.
Le .viii.e chappitre.
Quant les oreilles escopissent ou demenguent a aucun/ sachiez pour
verité/ et comme euvangile que se c'est la droite oreille ce seront
bonnes nouvelles. et se c'est la senestre elles seront mauvaises.
Glose. Ysabel de la creste rouge dist sur ce propos que quant le nez
escopist c'est signe de boire vin vermeil.
Le .ix.e chappitre.
Quant poix ou poiree boueillent ou pot qui est mis jus du feu/ sachiez
pour vray que en cestui hostel n'y a nulles sorcieres.
Glose. Perrette tost vestue dist que la chose que les cauquemares
craingnent le plus: c'est un pot qui boult jus du feu.
Le .x.e chappitre.
Or entendez vous toutes bien ce chappitre. Car je vous dy que qui doubte
la cauquemare qu'elle ne viengne de nuit a son lit/ il convient mettre
une sellette de bois de chesne devant un bon feu et se elle venue se
siet dessus: jamais de la ne se porra lever qu'il ne soit cler jour/ et
est chose esprouvee.
Glose. Jenneton tost preste dit qu'elle oublia une fois a ceste chose
faire/ mais elle aprés qu'elle fut cauquie tasta que ce povoit estre si
trouva que c'estoit une chose velue de assez doux poil.
Le .xi.e chappitre.
Qui laisse le samedy a parfiler le lin qui est en sa queloingne/ le fil
qui en est filé le lundy ensuivant jamais bien ne fera/ et si on en fait
toile jamais elle ne blanchira.
Glose. Dist marion le bleue pour ce que les femmes d'alemaigne ont ceste
coustume que de laissier le lin a la queloingne le samedi: jamais leurs
toilles ne sont blanches. Et cest verité il appert aux chemises que les
hommes en apportent pardeça.
Le .xii.e chappitre.
Qui se abstient de torchier son derriere d'herbe/ de feuilles ou d'autre
verdure qui ait creu sur terre il n'aura ja mal en l'eschine ne es
rains.
Glose. Pyatine le verde dist a ce propos que cellui qui ce fait il
n'aura jamais les trenchisons en la teste. mais en ce lieu il aura
souvent sa chemise doree.
Le .xiii.e chappitre.
Cellui qui ne jette ou seuffre jetter ou feu les os aprés qu'il en a
mengié la char: jamais n'aura mal es dens pour l'onneur de sainct
laurens.
Glose. Mais noir trou afferme ce chappitre estre vray/ mais elle dit que
en ce lieu les chiens s'en combatent volentiers.
Le .xiiii.e chappitre.
Cellui qui point d'argent n'a en sa bourse/ se doit abstenir de regarder
la nouvelle lune ou autrement il n'en aura gaires tout au long d'icelle.
Glose. Robinette noire trache dist sur ce chapitre que cellui qui
perchoit le croissant a plaine bourse: il le doit saluer et encliner
devotement et pour certain il multipliera toudis celle lonoison.
Le .xv. chappitre.
Cellui ou celle qui treuve le treffle a quatre fueilles s'il le garde en
reverence sachiez pour aussi vray que euvangile qu'il sera eureux et
riche toute sa vie.
Glose. Sur cest article dist dame sebile rouge en taille que se un homme
passe a pieds nuds sur le treffle a quatre fueilles/ il ne puet
eschapper d'avoir les fievres blanches. Et se c'est une femme elle sera
vvihotte.
Le .xvi.e chappitre.
Quant un homme treuve sur sa robe une yraigne c'est signe d'estre ce
jour moult eureux. et pareillement qui treuve le fer d'un cheval ou
partie d'icellui: il aura bonne fortune.
Glose. Lors se leva francine molles tettes/ et dist que quant on treuve
au matin devant desjuner argent a terre c'est tresmauvais eur/ s'il n'y
a de l'or parmy.
Le .xvii.e chappitre.
Quiconques frotte un porion la veille de sainct jehan de la fueille
d'ung sehus/ et puis la boute parfont en terre/ a mesure que celle
fueille pourrira: le porion sechera.
Glose. Ysabel de la doutre dist/ que ceste avoit autreffois fait: mais
de frotter le porion du lait d'une fueille de pissenlit/ il en seche
plus tost. Car elle l'avoit esprouvé.
Le .xviii.e chappitre.
Quant un homme treuve en son pourpris un vaisseau d'eeps atachiés en un
arbre s'il ne l'estrine d'une piece d'argent c'est mauvais signe.
Glose. Baudinon gorgette dist que cellui qui approprie a soy les eeps
sans les estriner comme dit est ou texte: elles ne feront que picquier
cellui/ et jamais ne l'aimeront ne lui feront prouffit.
Le .xix.e chappitre.
Cellui qui le jour sainct vincent loye les arbres de son gardin de
loyens de fuerre de fromment: il aura cestui an plenté de fruis.
Glose. Emmeline le crottee dist a ce propos que qui behourde le jour des
brandons ses arbres/ sache pour vray qu'ilz n'auront en tout cest an ne
honnines ne vermines.
Le .xx.e chappitre.
Cellui qui estrine sa dame par amours le jour de l'an de couteaux
sachiez que leur amour refroidera.
Glose. Dist a cest article collette du cren. je vous asseure que cellui
qui estrine sa dame d'espinceaux a grosses testes que l'amour en devient
plus ardant et plus durable.
le .xxi.e chappitre.
Cellui qui franchement puet chevauchier l'ours .ix. pas d'un tenant/ il
est affranchy de .ix. paires de maladis.
Glose. Dist une vielle matrone qui derriere les autres estoit. je cuide
bien qu'il soit vray de la garison desdites .ix. maladies. mais non pas
de celles dont on chiet a la renverse.
Le .xxii.e chappitre.
Quant vous veez un chat assis sur une fenestre au soleil qui lesche son
derriere/ et la patte qu'il lieve ne porte audessus de l'oreille il ne
vous convient doubter que celle journee il ne pleuve.
Glose. Lors se leva dame mehault caillotte/ et dist que point n'y a
faulte/ car aincoires est sa buee ou cuvier qu'elle n'ose laver pour ce
que son chat ne cesse de lechier son derriere.
Le .xxiii.e chappitre.
Qui se siet au feu et escript es cendres de son doy ou d'ung baston ou
qui se joue du feu/ c'est signe qu'il a pissié ou qu'il pissera au lit.
Glose. Peronne l'enfumee dist en affermant ce texte que cellui qui
regarde sa femme couvrir le feu devant lui sans soy lever: sachiez que
celle nuit il ne cessera de ronquier et de dormir. Et se c'est une fille
a marier/ elle ne sera de l'annee mariee.
Le .xxiiii.e chappitre.
Quant on craint que son chien ne soit mors de chien enragié/ faittes le
mengier et boire parmy un trepié et il sera ce jour asseuré de la rage.
Glose. A ce propos dist Guillemette la boisteuse que qui veult son chat
ou sa geline tenir a l'ostel sans les perdre si prengne ou le chat ou la
geline et la tourne par trois fois entour la crameillie/ et puis leur
frote leurs pattes contre le mur de la cheminee. et sans nulle faulte
jamais de cest hostel ne se departiront.
La conclusion de ceste journee.
Pour ceste euvangile commencerent toutes les assistentes moult fort a
rire/ et de fait en laissierent le filer et desvuidier/ et moult fort
loerent dame transeline du croq de la deduction de son euvangile/
ensamble celles doctoresse et sages femmes qui l'avoient glosé/ et si
honnourablement deduit/ et postilé que mieulx on ne les porroit exposer.
Je me levay de mon siege a demy lassé et desja semons du messagier du
dieu dormant pour aller le berchier en son repos. Mais avant mon
departement. je voulz veoir faire l'election de celle qui l'endemain
devoit presider. Les femmes donques ayans laissié le rire dirent que
temps estoit d'eslire la dame qui l'endemain presideroit. Si eslurent
d'un commun accort dame abonde du four/ qui l'accepta benignement et
promist d'en faire son povoir.
Aprés ceste election ainsi de dame abonde du four: je me departis le
plus coyement que je peus/ car elles se prindrent si fort a quaqueter
ensemble qu'elles n'eurent regart a mon departement.
S'ensieut la continuacion des euvangiles des queloingnes faittes le
mercredy soir par dame abonde du four.
Le merdredy soir a heure acoustumee convindrent et s'assemblerent toutes
les femmes qui avoient acoustumé d'y estre/ ensemble pluiseurs autres
qui paravant n'y avoient esté par la induction de leurs voisines. Et
elles ainsi assembleez survint dame abonde du four qui pour ceste nuit
devoit et estoit ordonnee pour lire son euvangile/ comme elle fist. Mais
avant que je procede aux chappittres d'icelle: je vueil descripre de son
estat la maniere. Il est vray qu'en ses jones jours elle fut marchande
de luxure a detail/ et depuis en tint bouticle en gros a bruges entre
les marchans. belle femme avoit esté en sa jonesse: mais le vin et les
bons morseaux qu'elle avoit pris et souvent l'avoient faitte si grasse
que apou avoit sa rondeur sa longueur. Et abrief dire elle avoit une
partie des sept ars en sa memoire/ car elle avoit estudié a paris par
l'espace de sept ans ou colliege de glatigny. dont elle avoit rapporté
mainte parfonde science. Elle doncques venue se ala seoir ou siege a ce
determiné et aprés scilence faitte des assistentes commença pour son
thume et premier chappitre en ceste maniere.
Le premier chappitre.
Pour le premier chappitre de mon euvangile/ je vous asseure que pour
pissier entre deux maisons/ ou contre le soleil: on en gaigne le mal des
yeulx qu'on apelle le leurieul.
Glose. Aucuns l'appellent la rougerole dist beatrix flabaude/ mais je
croy mieulx que ceste maladie viengne de trop boire a la fontaine
d'amours.
Le .xx.e chappitre.
Pour eschever de non venir palasineux de la teste ou des rains il se
fault abstenir de mengier de teste ne de char de chat ou de ours.
Glose. Dist tantost berte au court talon je cuide et si croy que pour le
palasin des rains/ il se fault garder de couchier a l'envers voire les
femmes/ et les hommes au contraire.
Le .iii.e chappitre.
Qui se met a pissier contre un monstier ou en une atre/ c'est grant
merveille se avant sa mort il ne chiet en apopelisie. car du moins il
sera graveleux.
Glose. Certainement dist jacquemine galoise qui long temps avoit servi
le curé/ je vous asseure que cellui qui ainsi pisse ou fait sa
neccessité contre l'eglise ou en l'attre l'eaue benoite qu'il rechoit le
dimence ne le puet aidier contre le tonnoire pour celle sepmaine.
Le .iiii.e chappitre.
Se une femme perchoit un loup qui le suive/ elle doit tantost trayner sa
chainture par terre aprés elle en disant. Garde toy loup que la mere
dieu ne te fiere/ et tantost tout confus s'en retournera.
Glose. Jane la sauvage dist que se aucun voit le loup devant que le loup
le voye il n'aura povoir de lui meffaire. Et pareillement la personne au
loup.
Le .v.e chappitre.
Quant le seigneur ou la dame d'un hostel est malade et un corbauld vient
crier dessus la cheminee ou la maison ou le pacient gist: c'est grant
signe qu'il mora de ceste maladie.
Glose. Mehault tost preste dist a ce propos que quant une agache y vient
gargonner/ c'est bon signe et que le pacient garira.
Le .vi.e chappitre.
Quant le vent d'escorchevel vente les femmes sages et bonnes mesnagieres
doivent taillier le debout de l'oreille dextre de leur jone veau et
jetter celle piece a l'encontre du vent affin que leur veau croisse et
amende comme il fera.
Glose. Certes dist maroie joe brulee/ je croy que qui prometteroit a
sainct barthelmieu sa dextre corne qu'il souffiroit.
Le .vii.e chappitre.
Mes bonnes voisines/ je vous vueil en ce chappitre dire l'un des
plusgrans secrez que j'aye oncques apris en savoie/ c'est pour aussi
vray comme euvangile que quant aucune tempeste levera en l'air vous
devez tantost faire du feu de quatre bastons de chesne en croix au
dessus du vent/ et lui faire une croix dessus/ et tantost la tempeste se
tournera de costé et ne touchera a voz biens.
Glose. Baudine camuse dist bien que ou pays de savoie a pluiseurs sages
femmes/ car pour faire bel ou lait temps elles en sont maistresses.
Le .viii.e chappitre.
Quant les anettes sentent la tempeste esmouvoir en l'air et qu'elles
volent/ et crient sur l'eaue en bas c'est signe qu'il plouvera sans
tempeste. mais quant elles se taisent: elles redoubtent fort le
tonnoire.
Glose. A ce propos dist Mabelie joliette que quant les cynes ou les oies
se baignent et debatent en l'eaue/ il n'y aura aucune faulte qu'il ne
pleuve cellui jour.
Le .ix.e chappitre.
Quant on oit chiens uller on doit estoupper ses oreilles. car ilz
apportent mauvaises nouvelles. Et par contraire on doit oyr le cheval
crier et haynir.
Glose. Magnon broquette dit en approuvant cest article. que quant on oit
les loups uller on se doit mettre en bon estat/ car c'est signe de grant
pestilence avenir par guerre ou par famine.
Le .x.e chappitre.
Quant vous veez les loups venir querre leur proie pres des villes ou
dedens les villages sachiez que c'est grande apparence de chier temps.
Glose. Jehane baguette dist sur ce texte que quant cerfz/ bisches/ ou
dains viennent paistre pres des villages et des maisons c'est bon signe
et habondance de tous biens.
Le .xi.e chappitre.
Je vous dy pour euvangile que nul qui veult gaignier au jeu de dez ne se
doit jamais asseoir pour jouer son dos devers la lune ou qu'elle soit
lors/ ains lui doit tourner le visage ou se ce non jamais il n'en levera
sans perte.
Glose. Michelette houchue dist a ce promos que qui veult gaignier aux
dez par jour il convient faire le contraire car il fault tourner le dos
au soleil.
Le .xii.e chappitre.
Je vous dy mes voisines que quant on met blans draps en un lit l'angele
de dieu s'i repose jusques a ce que on y fait/ ou pet/ ou vesse.
Glose. Marion ort trau dist a ce propos que tantost que l'angele s'est
departis du lit le dyable puant y entre dont souvent en sourt grande
noise entre homme et femme.
Le .xiii.e chappitre.
Cellui qui rechoit de l'eaue benoite le dimence a la grant messe le
diable mauvais en toute ceste sepmaine/ ne puet cellui ou celle tempter
ne approchier a sept piez prez.
Glose. Berte le lourde dist que qui ne rechoit de l'eaue benoite le
dimence/ le dyable lui puet et jour et nuit asseoir invisiblement sur
l'espaule. Et qui ne la rechoit de la main du prestre/ sachiez qu'elle
n'a ne force ne vertu.
Le .xiiii.e chappitre.
Cellui qui souvent benist le soleil la lune et les estoilles ses biens
lui multiplieront au double.
Glose. Jossine tost preste dist que qui a son couchier salueront
l'estoille pouchiniere/ il ne seroit possible de perdre aucun de ses
pouchins/ et se multiplieroient doublement.
Le .xv.e chappitre.
Cellui qui au matin a son lever fait le signe de la croix/ et laver ses
mains ains qu'il passe hors de son huys le diable pour ce jour n'aura
povoir de le grever. Et s'il ne le fait quelque labeur qu'il face tout
ce jour ne lui pourra multiplier.
Glose. A ce propos dist geffrine tost preste que qui ne fait dire le
benedicite a son disner/ le dyable invisiblement siet a celle table et y
boit et mengue.
Le .xvi.e chappitre.
Quant aucune femme porte des chappons a la bonne ville pour les vendre
ou autres choses/ s'elle d'aventure chausse au matin son pied droit
premier/ elle aura bon eur de bien vendre.
Glose. Ceste chose m'est souvent avenue dist tempre meure. Et oultre ce
ay esté maintefois estrinee de tel marchant qu'il en penseroit a mari
s'il le savoit.
Le .xvii.e chappitre.
Quant une femme entre au matin en son estable pour moudre ses vaches/
s'elle ne dist vous sauve dieux/ et sainte bride volentiers les vaches
du pied de derriere regibent et souvent brisent le pot ou respandent le
lait.
Glose. A ce propos se leva une vielle qui n'avoit mais que un dent/ et
dist en audience que quant les veaulx ne veulent boire ne au doy ne
autrement/ que le toreau qui engendra ce veau n'eut point d'amour a la
mere.
Le .xviii.e chappitre.
Se une cense a plenté de brebis qui aient pluiseurs aigneaux/ et aprés
la disme payee on en presente chascun an un au loup/ certes il en
prendera un nonobstant garde qu'on y commette.
Glose. Emmelotte du glay dist a ce propos que qui ne presente un aignel
au loup en l'onneur de l'aignel de dieu: il sache certainement qu'il en
y aura de foireux en l'annee.
Le .xix.e chappitre.
Qui cueille ou eslit la poree le samedy aprés nonne pour le dimence
cuire et mengier/ il en vient de legier a celles qui ce font le mal
qu'on dist le joyel nostre dame.
Glose. Jehanne court talon dist que ainsi l'en avint en sa jonesse/ mais
un jone medecin l'en garist assez doucement en pou de temps.
Le .xx.e chappitre.
Quant un homme est prest pour monter a cheval/ il ne doit prendre de la
main de sa femme son espee ne autre piece de harnas/ car a son besoing
il ne s'en porroit deffendre.
Glose. Dist une des assistentes nommee angeline verde vaine que ainsi en
avint il a son premier mari. Car en chevauchant de nuit il vey a la
clarté de la lune un espovantaire de costé sa voye/ mais il ne sceut
onques tirer son espee que lui avoie baillié de haste qu'il eut de s'en
fouyr.
Le .xxi.e chappitre.
Cellui qui pisse contre le soleil il devient en sa plaine vie graveleux/
et si engendre souvent la pierre.