Flores monoici. Masc. Calyx quinquepartitus, imbricatus. Petala 5,
imbricata. Discus annularis quinquelobus, lobis cum petalis
alternantibus. Stamina indefinita; filamentis basi breviter
monadelphis, antherarum loculis appositis, adnatis, extrorsis. Fem.
Calyx corolla et discus maris. Ovarium triloculare, loculis
uniovulatis. Stigmata 3, bifida, cruribus intortis. Capsula epicarpio
carnoso demum secedente, tricocca, coccis medio bivalvibus. - Folia
opposita, stipulata, integerrima, glaberrima; flores terminales.
OBSERVATIO. Genus Jatrophae proximum, a qua facile distinguitur
staminibus indefinitis, antheris extrorsis, capsulae epicarpio
carnoso secedente et foliis oppositis. - Dixi in memoriam Josephi
Balogh, _Med. Dr. Transylvani_, qui catalogum stirpium Daciae
mediterraneae primus contexuit, _Lugd. Batav._ 1779. editum; deinde
Guianam Belgorum Botanices causa peragravit. (_Cfr. Haberle Hist. rei
herbariae Hungar. et Transylv. p._ 18.)