查考鉴史，天师嘅祖公，係张道陵，习练老君教，炼丹画符，建醮酬神，驱邪捉鬼，当时极少人信。到唐明皇当时，有只张虚靖，用妖术骗明皇，有本事使人长命，明皇被佢迷惑，封佢做天师。但係明皇不过七十零岁就死，样边见得佢长命呢？到宋朝当时，有只张强耀，巧言诱惑，皇上徽宗就赐佢世袭，因咁样历代称做张天师。後代该等君王，唔查考其假处，依旧准佢，徒然食国家嘅俸禄，冇的益处畀国家与子民。若係讲其符头十分灵，徽宗败亡嘅日，佢冇本事画符来救，係咁样就係背恩。兼且又冇法来赶鬼，不过听倒其假名声，唔曾看倒佢行出实事来。天师嘅名，因佢学习星学，料理历数，前代用佢，有功受禄。自明到今，满下用西洋历数，张天係空存职位，佢出等符法行世，也係迷惑子民。天师唔倚靠上帝，样边晓赶鬼呢？