查考《纲鉴》，老君生在周尾，春秋当时，其职分做史官，姓李，名耳。因佢年老，当时人称其名老子。早时孔夫子在周敬王当时，周流天下，时常与老聃往来，跟问其礼仪。在後有等好事嘅人，做本老君嘅小传，閗多讲佢生在殷朝武丁嘅时，怀胎八十二年，破其肚胈，右片□□骨，正生出世来，头颅毛与须，满下也白，故所以称佢係老子，又称佢元始上帝。到唐朝高宗王当时，又加号玄元皇帝。又到真宗当时，复加号太上老君。可惜今下人，唔晓查察，明知佢生在天地之间，翻下转称佢元始天尊，设倒老君庙来敬拜佢。独韩文公知佢係假，话该等係邪说，比老子做坐井观天，见识细小，道理唔正，想烧开其书，用先王嘅道来教佢。爱查考古文侪，就可以明白啰。