Hieraux vespere mi iris al la hejmo de mia kuzo, kiu estis invitinta
min al malgranda festo cxe li. Cxar mi deziris alveni kiel eble plej
frue, mi foriris de mia logxejo kiel eble plej baldaux, malgraux la
negxa vetero. Mi estis surmetinta paron da dikaj gantoj, kaj mi portis
dikajn sxuojn. Mi ankaux havis mian ombrelon, kvankam pro la vento mi ne
povis uzi tiun. Tuj kiam mi supreniris la sxtuparon cxe la hejmo de la
kuzo, li auxdis min, kaj venis por malfermi la pordon kaj akcepti min.
"Bonan vesperon, kia estas via sano?" li diris. Mi respondis "Mi sanas
bonege, dankon," kaj eniris la domon kun li. Ni supren iris per granda
sxtuparo al cxambro kie mi lasis la cxapelon, gantojn kaj ombrelon, tiam
ni malsupren venis kaj eniris la salonon. Mi salutis la onklinon, kiu
afable parolis al mi, kaj ankaux la du kuzinojn. Unu kuzino estis jxus
priskribonta interesan libron, kiun sxi antaux ne longe tralegis, kiam
la aliaj gastoj komencis alveni. Sinjoro B---- cxeestis, kaj Doktoro
C----, kun sia filino Frauxlino Mario, kaj multe da aliaj sinjoroj
kaj sinjorinoj. La gastoj sidis aux staris en malgrandaj grupoj, kaj
interparolis kun videbla plezuro. Unu rakontis pri vojagxo, kaj tiam
oni komencis priparoli la prezojn de aferoj en aliaj landoj. Mi atente
auxskultis kelkajn minutojn, kaj tiam foriris al alia grupo, kie oni
gaje babilis pri estontaj ("future") promenoj kaj festoj. Post unu aux
du horoj, la servistinoj alportis al ni bonan malgrandan mangxon, kune
kun tasoj da bonega kafo. Fine, je malfrua horo ni gxentile dankis la
familion de mia kuzo, kaj diris adiaux. Tiam ni foriris hejmen, kun
sentoj da granda plezuro pro la agrabla festo.