Hodiaux matene mi iris kun la patrino al la plej granda butiko en nia
vilagxo. Tie sxi acxetis tiom da legomoj kaj fruktoj ke ni tute ne povis
porti ilin. Tial juna knabo venis kun ni, kaj portis kelke da ili por
ni. La patrino ne acxetis tiel multe je vendredo, sed hodiaux estas
sabato, kaj sxi volis acxeti legomojn por dimancxo, cxar dimancxe oni
ne povas iri en la butikojn. Tial sabate oni kutime acxetas suficxe
por la mangxoj de sabato kaj dimancxo. Meze de la butiko staras multe
da bareloj. En cxi tiuj oni trovas grandan nombron da fresxaj puraj
legomoj. La patrino acxetis tiel multe da asparago kaj novaj pizoj, kaj
tiel grandan sakon da terpomoj, ke la tablo restis preskaux nuda. Mi
vidis brasikon tie, sed tiun legomon mi malsxatas, kvankam oni diras
ke gxi estas tre bona legomo. Antaux ol foriri de la butiko la patrino
acxetis kelke da ovoj, kaj rigardis la fruktojn en bareloj apud la
pordo. Ili sxajnis tiel bonaj ke sxi acxetis kelkajn maturajn pomojn
kaj skatolon da fragoj. Dum oni donis al sxi la fruktojn, mi acxetis
kelkajn funtojn da sukero. Tiam ni estis pretaj por foriri el la butiko.
Sur la vojo ni auxdis tiel grandan bruon ke mi lasis la patrinon kaj
kuris trans la straton. Mi trovis tie infanon,la filon de nia najbaro.
Li faris la bruon, cxar li falis de la arbo antaux sia domo, kaj tre
lauxte ploris. Li diris al mi ke li havas multajn kontuzojn sur la kapo.
Cxar mi bone konas la infanon, mi demandis "Cxu vi volas grandan rugxan
pomon? Mi havas tian pomon por vi." Li tuj kaptis la pomon, kaj mi
foriris. Tiam la patrino kaj mi iris al la domo.