il (le roi d’Angleterre) s’em parti de Wissan et s’en vint devant
le forte ville de Callaix et l’assega de tous poins, et dist qu’il
ne s’en partiroit, par yvier ne par esté, si l’aroit à se vollenté,
com forte qu’elle fust, se li roys Phelippes ne se venoit de rechief
combattre à lui, et l’en levast par force. Et pour tant que la ditte
ville de Callais estoit si forte et qu’il avoit dedens grant fuisson
de bonnes gens d’armes, tels que monseigneur Jehan de Vianne, qui
cappittaine en estoit, messire Ernoul d’Audrehen, monseigneur Jehan
de Surie, monseigneur Pepin de Were, monseigneur Henry dou Bos et
pluisseurs autres, il ne vot oncques conssentir que ses gens d’armes
l’assaillissent, car il y pewissent plus perdre que gaegnier; ains
fist tantost faire son hostel, grande salle, cambres et chou qu’il y
appertenoit de plances et de mairiiens, et bien couvrir d’estrain pour
demourer y tout celui yvier et l’estet enssic, ou plus, se mestier
faisoit, et fist faire grans fossés tout autour de son host, par quoy
on ne les pewist enbrissier ne destourber.
Cascuns des autres seigneurs et li chevalier et chacuns autres, seloncq
son estat, fist faire se loge au mieux qu’il peult, li ungs de bois,
li autres de genestres, li autre d’estrain, tant que en assés petis
de tamps il fissent là endroit une bonne forte ville et grande; et
y trouvoit on à vendre tout ce qu’il besongnoit pour vivre à grant
marchiet. Et si y avoit boucerie, mercerie, hallez de draps et de
touttes mercandises, ossi bien comme à Arras ou à Amiens, car il
avoient les Flammens de leur accord: dont tous li biens leur venoit.
Si leur en venoit il ossi partie d’Engleterre, par le mer qui n’est
mies là grande à passer; encorres leur en venist plus grant fuison, se
ne fuissent Geneuois et autres maronniers qui gisoient sus le mer et
alloient souvent waucrant par le mer avant et arrière, pour destourber
les allans et les venans à l’ost des Englès, et en appelloit on
l’un Marant et l’autre Mestriel. Et avoient souvent grant compaignie
d’autres maronniers qui faisoient grans anois et grans destourbiers as
Englès, et souvent gaegnoient des vaissiaux chargiés de pourveanches,
dont il desplaisoit mout au roy englès et à chiaux de l’ost, et à le
fois estoient rencontré, si perdoient. Et souvent avoit paletis et
escarmuches contre le ville, là où li pluisseur volloient moustrer
leur appertise, de chiaux de hors contre chiaux de dedens; si y avoit
souvent des mors et des navrés, d’une part et d’autre.
Et souvent chevauchoient li marescal aval le pays d’entours Calais à
grant fuisson de gens d’armes et d’archiers pour aventurer, un jour
deviers Saint Omer, l’autre deviers Tieruanne, puis deviers Bouloingne,
pour quère grosses bestes et menues pour avitaillier leur host, et
essilloient tout le pays d’entours yaux. Ossi il y avoit dedens
Saint Omer bonne garnison de gens d’armes, car là se deffendoient et
faisoient frontière contre les ennemis, ossi en le Montoire, en Guines,
en Oye, en Merk, en Likes, en Fiennes, en Bouloingne, en Tieruanne,
en Aire, en Bietune, en Saint Venant, en Hames, en Arde et en tous
les fors là environ. Et y avenoit souvent tout plain d’aventures et
d’encontres aventureulx, dont li ung perdoient et li autre gaegnoient,
enssi que telles aventures aviennent en si faittes guerres et en telx
sièges. Si m’en passerai tant c’à ores assés brefment, car je y pensse
bien à recouvrer, ains que li sièges soit conclus; mès je voeil parler
d’une grant courtoisie que li roys englès fist as povres gens de
Calais, le siège pendant.
Quant chil de le ville de Callais virent que li Englès ne se
partiroient mies de ce siège et que lors pourveanches de vivres
amenrissoient durement, il eurent consseil qu’il envoieroient hors
les povres gens dont il ne se pooient aidier. Si en envoiièrent hors
bien six cens povres hommes mal pourveus, et les fissent passer tout
parmy l’ost des Englès. Si tost que li roys Edouwars le sceut, il les
fist tous arrester et venir devant lui, et leur fist tous dounner à
boire et à mengier plentiveusement en se grande salle de bois qu’il
avoit là fait faire, et fist à chacun dounner troix viés estrellins
pour Dieu; et avoecq chou, il les fist conduire sauvement hors de son
host: laquelle cose on retint à grant aumounne et à grant noblèce. Or
me tairay un petit à parler dou siège de Calais et retouray au siège
de Aguillon, là où je le laissay quant je coummençay à parler dou dit
roy qui ariva en Normendie, et vous diray coumment li departemens s’en
fist. Fºs 95 vº et 96.
--_Ms. de Rome_: Qant li rois d’Engleterre et toutes ses gens furent là
venus, il se boutèrent et amanagièrent en une grande place wide, qui
sciet au dehors de Calais, et conmenchièrent là à faire et à carpenter
maisons et logis petit à petit. Et estoient les Englois signeur dou
havene et envoioient lor navie, qant il lor plaisoit, en Engleterre,
dont vivres et pourveances lor venoient par mer. Et aussi li coureur
englois courirent toute la conté de Boulongne et le conté de Ghines, et
le pais jusques à Saint Omer et Aire et Tieruane, ne il ne trouvoient
qui lor alast au devant. Si fu envoiiés mesires Jehans de Viane, uns
chevaliers de Campagne et de Bourgongne, à estre chapitainne de Calais,
et s’i bouta de nuit à toute sa carge par le sabelon, et cevauça de
Wisan jusques à là. Si le requellièrent tout li honme de la ville, et
en furent moult resjoï de sa venue; et s’i porta li dis chevaliers
vaillanment et sagement. Par la voie de la marine fu la ville de Calais
plus de demi an confortée et rafresqie de vivres; et s’i vinrent bouter
par ce cemin meismes, mesires Arnouls d’Andrehem, mesires Jehans de
Surie, mesires Bauduins de Bellebourne, mesires Joffrois de la Mote,
mesire Pepins de Were, mesires Gerars de Werières, qui adonc estoit
jones esquiers, et pluisseurs aultres chevaliers et esquiers, qui tout
i furent très honnourablement.
Qant li rois d’Engleterre fu venus premierement devant la ville de
Calais, ensi que chils qui moult le desiroit à conquerir, il le asega
par grant manière et par bonne ordenance. Et fist bastir et ordonner
entre la ville et la rivière et le pont de Nulais hostels et maisons,
ouvrer et carpenter de grans mairiiens et couvrir les dittes maisons,
qui estoient asisses et ordonnées par rues, bien et faiticement, de
ros, d’estrain et de genestres et de ce dont on puet recouvrer là ou
pais, ensi que il vosist là demorer diis ou douse ans; car li intension
de li estoit telle que de là il ne s’en partiroit, si l’aueroit conquis
par force ou par tretié. Et avoit en ceste nove ville dou roi, toutes
coses necessaires, apertenans à un hoost et plus encores, et place
ordonnée pour tenir marchiet le merquedi et le samedi. Et là estoient
halles de draps et de merchiers et aussi estas de bouciers et de
boulengiers. Et de toutes coses on i pooit recouvrer aussi largement
comme à Bruges ou à Londres, et tavernes de tous vins de Grenate, de
Grec, de Malevisie, de Rivière, de vins de Gascongne, de Poito, de
France et de Rin, bons cabarès et bien pourveus de chars, de volilles,
de poissons. Et lor venoient de Flandres les marceandises toutes
prestes de Hollandes, de Zellandes et d’Alemagne, et tout par mer. Et
en i avoit là pluisseurs ouvriers juponniers, parmentiers, corduaniers,
peletiers, cabareteur, fourniers et tavreniers, qui i gissoient assés
mieuls à lor plaisance et pourfit que donc que il fuissent chiés leur.
Et furent bien courouciet qant li sièges se desfist et que Calais fu
conquise, car il perdirent le flour de lor wagnage.
Qant mesires Jehans de Viane fu venus en Calais, et il ot veu et
consideré le siège et conment les Englois estoient amasé, ensi que pour
demorer vint ou trente ans là devant au siège, et il ot fait viseter
la poisance des vivres qui estoient en la ville, il en fist un jour
widier et partir plus de vint sept cens honmes, fenmes et enfans, pour
alegerir la ville. Qant chils peuples issi hors premierement de Calais,
tous en blans qamises, et portaient confanons de moustiers en signe de
humelité, auquns Englois quidièrent, qant il les veirent issir, que il
les venissent courir sus. Si se assamblèrent à l’encontre de euls les
archiers, et les fissent requler jusques ens ès fossés de la ville.
Là i ot entre ces Englois, auquns preudonmes piteus, qui congneurent
tantos que ce n’estoient pas gens pour faire nul contraire. Si fissent
cesser les aultres de euls courir sus, et lor demandèrent où il
aloient. Il respondirent que on les avoit bouté hors de Calais, pour
tant que il cargoient trop la ville et le foulloient de vivres et en
aloient ailleurs à l’aventure querir lor mieuls, ensi que povres gens
qui avoient tout perdu sans nul recouvrier.
Ces nouvelles vinrent au roi d’Engleterre et as signeurs que chils
povres peuples de Calais estoit là ensi à merchi. Li rois, meus en
pité, les fist entrer en l’oost, et conmanda que tout et toutes
fuissent bien disné; il le furent. Avoecques tout ce, au departir et
issir de l’hoost, il fist à casqun, grant et petit, donner et delivrer
un estrelin d’Engleterre. Et depuis ces povres gens se departirent
et s’espardirent, pour avoir lor vivre et lor cavance. Par ces gens
orent la congnisance li rois d’Engleterre et ses consauls, que li
vivres afoiblissoient grandement en la ville de Calais: si n’en furent
pas courouchiet. Or retournons au duch de Normendie et au siège qui
se tenoit devant Agillon. Fºs 124 vº et 125. P. 1, l. 1 et 2: uns
gentilz et vaillans chevaliers de Campagne as armes.--_Mss. A 1 à 6_:
un gentil chevalier de Champaigne vaillant aux armes. Fº 152.--_Mss. A
7 à 10_: un gentil et vaillant chevalier de Champaigne aux armes. Fº
136.--_Mss. A 11 à 14_: ung chevalier de Champaigne vaillant aux armes.
Fºs 144 vº et 145.--_Mss. A 15 à 17_: un gentil et vaillant chevalier
de Champaingne aux armes. Fº 151 vº.--_Mss. A 20 à 22_: ung vaillant
et hardy chevalier. Fº 217 vº.--_Mss. A 23 à 29_: ung chevalier de
Champaigne. Fº 169 vº.--_Mss. A 30 à 33_: ung chevalier de Bourgoigne.
Fº 190 vº.--_Ms. B 3_: ung vaillant gentilhomme chevalier du pais de
Champaigne. Fº 135 vº.
P. 1, l. 5 et 6: d’Audrehen.--_Mss. A 11 à 14_: d’Autrehen. Fº 145.
P. 1, l. 7: de le Motte.--_Mss. A 30 à 33_: de la Mente. Fº 190 vº.
P. 1, l. 8: Were.--_Mss. A 1 à 19_: Werie. Fº 152.--_Mss. A 20 à 22, 30
à 33_: Verre. Fº 169 vº.
P. 1, l. 16: Nulais.--_Mss. A 1 à 6, 11 à 19_, B 3: Milais. Fº
152.--_Mss. A 20 à 22_: Mullais. Fº 218.--_Mss. A 23 à 29_: Calays. Fº
169 vº.--_Mss. A 30 à 33_: Calaiz. Fº 190 vº.
P. 2, l. 3 et 4: d’estrain et de genestres.--_Ms. B 6_: d’estrain ou de
bauque. Fº 343.
P. 2, l. 4 et 5: dix ans ou douze.--_Ms. B 6_: quarante ans. Fº 343.
P. 2, l. 12 et 13: necessités.--_Le ms. B 6 ajoute_: tavernes de toutes
manières de vins osy bien que che fust à Londres. Fº 343.
P. 2, l. 19: Tierenois.--_Mss. A 1 à 6, 18 à 22_: Therouennois. Fº
152.--_Mss. A 7 à 10_: Therenois. Fº 136 vº.--_Mss. A 11 à 14_:
Theuoroilenois. Fº 145.--_Mss. A 23 à 29_: Ternois. Fº 169 vº.--_Mss.
A_ 30 à 33: Tirenoiz. Fº 190 vº.--_Ms. B 3_: Tiernois. Fº 135 vº.
P. 3, l. 1: menues gens.--_Ms. B 6_: qui tout se vivoient de la mer. Fº
344.
P. 3, l. 11: deux estrelins.--_Ms. B 6_: six estrelins. Fº 344.
§ =289=. P. 3, l. 16: Li dus.--_Ms. d’Amiens_: Tout ce tamps de le
moiienné d’avril jusques à le moiienné de septembre, demora li dus de
Normendie à siège devant le fort castiel d’Aguillon, en Gascoingne,
et y fist maintes fois assaillir par diviersses mannierres, et mout
y eut de bonne chevalerie et de noble avoecq lui. Et y mist grant
coustages d’enghiens et d’autres instrummens et atournemens d’asaut,
desquels messires Loeis d’Espaingne, chilx bons chevaliers de qui
vous avés oy parler ens ès guerres de Bretaingne, estoit souverains
et ordonnères, car li dis dus avoit plus de fianche en lui et en son
consseil, que il n’ewist en tout le demorant de son host. Si y trouva
li dis messires Loeis d’Espaingne, le siège durant, maint nouviel et
soutil enghien dont on n’avoit oncquez veu user devant che, pour chiaux
de le ditte fortrèche grever et adammagier; mès dedens avoit si bonne
bachelerie que il se deffendoient bien contre tout et deffendirent,
si comme vous avés chy dessus oy. Endementroes que cilz sièges se
tenoit devant Aguillon et que tous les jours priès y avoit assault
et escarmuches, ungs assaux se fist de chiaux de l’ost à chiaux de
dedens, et y eut pluisseurs belles appertisses d’armes faittes. Avint
que messires Phelippes de Bourgoingne, filz au duc de Bourgoingne et
cousins germains au duc de Normendie, et qui estoit li ungs des biaux
chevaliers de toutte l’ost de son eage, et qui vollentiers s’avanchoit
en armes, entendi de cel assault qui jà estoit coummenchiéz; si s’arma
vistement et monta sus un courssier durement appert, pour son corps
avanchier et pour plus tost venir à l’assault, et le feri des esperons.
Li courssiers qui estoit durement fors et rades et orguilleus, se mist
au cours et s’abusça parmi un fosset, et chei en lui touillant sus
le dit monsigneur Phelippe de Bourgoingne, et le confroissa et bleça
tellement que li chevaliers n’eut oncquez puis bonne sancté, mès morut
assés briefment, dont li dus de Normendie fu trop durement courouchiés:
che fu bien raisons, car c’estoit li plus puissans de linaige,
d’iretaige et de ricoise de toutte Franche.
Assés tost apriès ceste aventure, vinrent les nouvellez au dit ducq de
le bataille de Crechi et de le grant desconfiture qui y avoit estet. Et
remandoit li roys son fil le duc de Normendie, et li senefioit qu’il
s’en revenist en Franche et deffesist son siège de devant Aguillon.
De ces nouvellez fu li dus de Normendie durement courouchiés, che fu
bien drois, car il avoit juret le siège et dit qu’il ne s’em partiroit,
si aroit le castiel à se vollenté; mès li mandement dou roy son père
escusoient et dispenssoient son sierement. Non obstant ce, ces lettrez
veues, il manda en sa tente tous lez grans seigneurs de l’ost qui
là estoient, le ducq de Bourgoingne, le duc de Bourbon, monsigneur
Jaqueme de Bourbon, le comte de Forès, le daufin d’Auviergne, le comte
de Vendosme, le comte de Laille, le comte de Ventadour, le comte
de Bouloingne, le comte de Nerbonne, monseigneur Loeys d’Espaingne
et monseigneur Carle d’Espaigne, son fil, seigneur de Partenay, le
seigneur de Crain et pluisseurs autres bannerès et chevaliers qui là
estoient, et leur compta lez nouvelles que on leur avoit apportées, et
le mandement que li roys ses pères li faisoit. Si leur pria amiablement
que sour ce il li volsissent conssillier honnerablement. Tout chil
seigneur furent durement courouchiet et dolant de ces nouvelles et
de le desconfiture de Crechi, che fu bien raisons, car li courounne
de Franche estoit moult afoiblie de haulte honneur, et ce ne fu mies
merveillez; nekedent il conssillièrent au dit duc, tout d’un acort et
d’une vois, et li dissent que se plus haute honneur seroit et estoit
dou raller deviers le roy son père, qui le mandoit, que là demourer,
seloncq che que avenu estoit et seloncq l’estat dou royaume qui à lui
parvenir devoit. Adonc fu ordounné et coummandé que chacuns toursast et
deslogast au matin et sieuwist les bannierrez.
Quant ce vint au matin, chacuns se hasta de toursser et de deslogier et
sieuwir les bannierres. Chil qui estoient dedens Aguillon, perchurent
tantost que li hos se deslogoit et s’en alloit en voiez. Sitos que
messires Gautiers de Mauny vit chou, il se courut armer et fist tous
ses compaignons armer et monter sour lors chevaux, et passèrent parmi
le pont qui fais y estoit, et vinrent as loges. Si trouvèrent des
gens assés qui derière estoient atargiés; si leur coururent sus et
en ocirent grant plenté. Li dis messires Gautiers ne se vot mies là
arester, ains fist son pignonciel chevauchier avant jusques à l’arière
garde, qui les darrains volloit rataindre et garder, et dont messires
Carles d’Espaingne, qui portoit les armes de Castille à un quartier de
France, estoit chiés. Là coummencha ungs hustins très grans et très
durs, et y eut pluisseurs chevaliers et escuiers d’un lés et d’autre
reverssés. Touttesfois, Englès et Gascon s’i portèrent si bien que il
obtinrent le plache. Et fu desconfite ceste arrière garde, et pris
ungs bons chevaliers de Normendie, mout amis et prochain dou duc,
qui se clamoit messires Grimoutons de Cambli. Et retourna messires
Gautiers de Mauny avoecq ses compaignons dedens Aguillon et ramenèrent
des pourveances et dou harnas assés des Franchois avoecq pluisseurs
prisonniers.
Quant li compaignon de Aguillon eurent fait leur chevauchie, enssi
comme vous avés oy, et il furent rentrés à tous leurs prisonniers
et lor gaing ou dit castiel, il demandèrent bellement et sagement à
aucuns gentilz hommes qu’il tenoient pour prisonniers, pourquoi li
dus s’estoit deslogiés si soudainnement. A envis le disoient, mès on
les examina et pria tant qu’il le dissent, et recordèrent touttes les
avenues qui estoient avenues au roy englès et à ses gens, et coumment
il avoit à Crechi desconfit le roy de Franche et se puissance, et
leur recordèrent le grant cantitet des prinches et des seigneurs
qui demouret y estoient, et coumment li roys englès avoit assegiet
le forte ville de Callais. De ces nouvelles furent li compaignon de
Aguillon durement liet, et en firent à leurs prisonniers milleur
compaignie et toutte le bonne chière qu’il peurent. A l’endemain, ils
departirent leur butin. Si eschei messires Grimoutons de Cambli en le
part de monseigneur Gautier de Mauny, parmi un restorier qu’il fist as
compaignons, et demoura ses prisonniers. Fº 96.
--_Ms. de Rome_: Li dus Jehans de Normendie, toute la saison,
avoit tenu son siège devant Agillon, et là dedens enclos les bons
chevaliers d’Engleterre, messire Gautier de Mauni et les aultres qui
si vaillanment s’i estoient tenu et porté, et tenoient encores que,
pour asaut que on lor fesist, onques ne s’esbahirent, mais furent trois
jours tous reconfortés, non que li dus de Normendie se tenist là pour
cose que li castiaus de Agillon vausist, fors que par droite herredrie
et merancolie; car on euist fait quatre tels castiaus que Agillon est,
pour ce que li sièges cousta au roiaulme de France. Et encores avint
uns grans mesciés entre les François, ensi que je vous recorderai, et
environ la moiienné d’aoust que li rois d’Engleterre passoit parmi
le roiaulme de France. Il avint que une escarmuce se fist devant le
chastiel d’Agillon, des chevaliers et esquiers de l’hoost à l’encontre
de ceuls de dedens qui vaillanment les requelloient, toutes fois qantes
fois que il estoient requis et assalli.
Assés nouvellement estoit venus en l’oost mesires Phelippes de
Bourgongne, fils au duch Oede de Bourgongne, pour ce temps, contes
d’Artois et de Boulongne, et cousins germains au duch de Normendie.
Chil mesires Phelippes de Bourgongne estoit uns moult jones chevaliers
et de grant volenté, ensi que là le moustra; car si tretos que li
escarmuce fu conmenchie, il ne volt pas estre des darrains, mais se
fist armer et monta sus un coursier fort et rade durement et de grant
haste, pour plus tos venir à l’escarmuce. Li dis mesires Phelippes de
Bourgongne prist une adrèce parmi les camps, et broça coursier des
esporons, liquels estoit grans et fors, et qui se esquella au cours et
enporta le chevalier, tout maugré lui: siques, en traversant et sallant
un fosset, li coursiers trebusça et cei et jetta le dit mesire Phelippe
desous lui. Onques il ne pot estre aidiés ne seqourus, mais fu si
confroissiés que onques depuis n’ot santé, et morut dedens trois jours
apriès: dont li dus de Normendie et tout li signeur furent durement
courechiet et à bonne cause.
Assés tos apriès ceste aventure et la mort dou dit mesire Phelippe
de Bourgongne, vinrent les nouvelles en l’oost de la desconfiture de
la bataille de Crechi. Et remandoient li rois de France et la roine,
lor fil, le duch de Normendie, et li enjoindoient expresseement
et especiaument, toutes paroles et ensongnes misses arrière, il
se partesist et deffesist son siège, et retournast en France pour
aidier à deffendre et garder son hiretage. Et avoecques tout ce
encores li segnefioient il le grant damage que li noble du roiaulme
de France avoient pris et eu par celle bataille de Creci. Quant li
dus de Normendie ot leu tout au lonc ces lettres, si pensa sus moult
longement, et en demanda consel as contes et as barons, qui dalés lui
estoient, car moult à envis se departoit, pour la cause de ce que il en
avoit parlé si avant. Li signeur li dissent que tout estoit reservé,
puisque père et mère le mandoient, et que bien et par son honnour il
se pooit departir. Si fu adonc ordonné et aresté que, à l’endemain, on
se deslogeroit, et retourneroient toutes gens en France: des quelles
nouvelles la grignour partie de ceuls de l’oost furent moult resjoï,
car chils sièges lor avoit esté trop lontains et moult pesans. La nuit
passa. Qant ce vint au point dou jour, on se conmença à deslogier et
à tourser tentes et trés et tout mettre à charoi et à voiture. Et se
hastoit et delivroit casquns dou plus tos conme il pooit; et se missent
tout au cemin environ solel levant. Li compagnon, qui dedens Agillon
estoient, perchurent cel affaire que on se deslogoit; si en furent tout
esmervilliet.
Les nouvelles en vinrent à mesire Gautier de Mauni, qui tous jours
estoit des premiers levés et des darrains couchiés. Sitos que il le
sceut, il fu armés et apparilliés, et aussi furent tout li compagnon,
et montèrent as chevaus: «Or tos, dist il, li François s’en vont sans
dire adieu. Il fault que il paient lor bien allée en auqune manière,
et fault que il aient auqunes nouvelles qui lor soient venues de
France, car li rois, nostres sires, est deçà la mer; et poroit avenir
que ils et ses gens aueroient combatu les François, et i poroit avoir
eu une grande desconfiture. Il nous en fault sçavoir, conment que ce
soit, la verité; car c’est tout acertes que il se deslogent pour celle
saison.» Adonc se departirent euls de le forterèce de Agillon en grant
volenté, et estoient bien trois cens, messires Gautiers de Mauni tout
devant. Et s’en vinrent ferir et fraper en la qoue de ces François
qui s’en aloient; et trouvèrent d’aventure un chevalier de Normendie,
mestre d’ostel dou duch, et de son consel, et estoit demorés derrière,
pour faire haster le charoi et le sonmage: ils et tout chil qui
avoecques lui estoient, furent pris, et biaucop encores d’aultres. Et
retournèrent messires Gautiers de Mauni et les Englois dedens Agillon,
et i ramenèrent tout le butin et les prisonniers.
Par ce chevalier de Normendie sceut li dis mesires Gautiers de Mauni
tout ce qui avenu estoit en France, et conment li rois d’Engleterre
avoit pris terre en Normendie et estoit venus tout son cemin, ardant et
essillant le pais, et avoit passet la rivière de Sainne et de Sonme,
maugré tous ses nuisans, et arestés à Crechi en Pontieu, et là atendu
deux jours le roi de France et sa poissance et combatu et desconfi et
cachiet en voiies. Et i estoient mort et demoret sus la place onse
chiés de pais, quatre vins banerès et douze cens chevaliers et plus de
trente mille honmes d’autres gens. Et apriès tout ce, il estoit alés
mettre le siège devant la forte ville de Calais. De ces nouvelles fu li
dis messires Gautiers de Mauni si resjoïs que il n’en vosist pas tenir
cent mille frans, et dist au chevalier, lequel on nonmoit mesire Mouton
de Cambeli: «Cambeli, des rices et bonnes nouvelles que vous avés
dites, vous en vaudrés grandement mieuls.» Fº 125.
P. 4, l. 8: Li dis messires.--_Ms. B 6_: Messires Phelippes, pour eulx
veoir, demanda son coursier, comme a ung grant seigneur qui pluiseurs
en avoit; on luy amena ung jone poulain, que nouvellement on luy avoit
envoiet et sur lequel il n’avoit oncques monté. Quant on lui ot amenet,
il le refusa, pour che que oncques ne l’avoit chevauchiet. Et ensy que
on en aloit querir ung aultre, vey que ches escarmuches estoient trop
belles. Adonc messires Phelippes, qui eult grant desir de veoir, dist:
«Amène me che coursier. Je monteray desus; chis aultres vient trop
longement.» Il monta sus et le fery des esporons et le hasta moult. Che
poullain, qui les esporons ne connisoit, se commencha à enorguillier
et à se mentenir merveilleusement et assallir et atreper diversement.
Et messires Phelippes, pour lui aprivisier, le feroit des esporons
aigrement. Che coursiés enporta son seigneur de telle fachon que il
n’en peult estre maistre, et l’enporta parmy ung fosset où il trebuscha
li uns dessus l’autre. Oncques il ne pot estre à tamps aidiés qu’il ne
fust blechiés et sy froisiés que oncques puis il n’eut sancté, mais
morut dedens quinze jours: dont tous les seigneurs furent durement
courouchiés, car c’estoit le plus riches et le plus grant de linaige du
royaume de Franche. Fºs 345 et 346.