Joye et bonne destinée
680 Ilz m'ont trestuit aouré,
Mais ja orent demouré
Longuement, et la vesprée
Fu ja bien près qu'avesprée
Comme a soleil resconçant;
685 Mes berbis, qu' ou bois paissant
Aloyent, fu temps de traire
En leur toyt, et moy retraire.
Si dis lors a voix rassise
A cil lés qui fus assise:
690 «Monseigneur, trop tarde jé;
S'il vous plaist, prendray congié
Que je ne soye blasmée.
Tart est, près de nuyt fermée,
Temps est de mes berbis mettre
695 En toyt et de m'entremettre
D'afforrer mes aignelez
En noz petiz hostelez.»
Lors en piez me suis levée,
Et cil le congié ne vée,
700 Ains de bon cuer l'ottroya;
Hors du boys me convoya,
Ne point ne m'ot en despris
Pour tant s'a trier me pris
Mes bestes a mon appel,
705 Ainçois aida au tropel
Assembler, dont pris a rire
Et en souriant lui dire:
«Monseigneur, par saint Legier!
Bien vous siet estre bergier;
710 Oncques si jolis pastour
Ne repaira cy entour.»
A rire s'en commença,
Congié pris, il me laissa,
Mais ainçois a moy s'offry
715 Ne oncques il ne souffry
Que genoil je meisse a terre
N'au congié n'a don requerre.
Tous me touchierent la main
En disant: «Et soir et main
720 Vous doint Dieux, doulce bergiere,
La riens que plus ariez chiere.»
Ainsi adonc se partirent
Ceulz de moy et congié prirent,
Et ou terminoit li vaulz
725 On leur mena leurs chevaulz;
Si s'en vont dessus ridant,
Jouant, riant et chantant.
Et je a l'ostel m'en tourne,
Mais tart m'est que je retourne;
730 Si mis mes berbis en toit,
Car la nuit ja me hastoit
Et les pris a affourrer,
Besoing n'oz de demourer.
Ainsi celle nuit passay,
735 Mais sachiez que moult pensay
A ceulz qui sus la fontaine
Me trouverent a grant peine,
Sur tous d'un me souvenoit
Et au devant me venoit
740 Son beau corps, gent et faitis,
Et son doulz maintien gentilz,
Son parler, son regard doulz
Qui plaire el me fist sur tous.
Au matin, quant vachier corne,
745 Que toutes bestes a corne
On meine aux champs pour repaistre,
Mis mes berbis en champestre
Et vers le bois me tournay,
Mais ainçois bien m'atornay
760 D'estroitte cotte de vert;
Mon peliçon fu couvert
D'un beau ridé chainse blanc,
Et ceinte parmi le flanc
Fus de ceinture ferrée,
755 Reluisant com fust dorée,
La ou pendoit la boursete
De soye fine, doulcete.
Et le faitis esguillier
Lez le coutel a taillier.
760 La alay ou je souloye,
Et ainsi comme j'aloye
Mes compaignetes encontre;
En alant en leur encontre
De loings me pristrent a rire
765 Et commencerent a dire:
«Dont me vient ce, Marotele,
Qu'adès ta belle cotele
Tu as vestue et es ceinte
De ta jolie sursainte?
770 T'a ton pere fiancée,
Ou se as nouvelle pensée?
Oncques ne te veismes yer;
Ou alas tu ombroier?
Si fus tu bien demandée;
775 Or le demande a Houdée.
En l'aunoy fusmes en l'ombre;
De pastours y ot grant nombre
Atout flajolz et bedons,
Qui aporterent maints dons
780 Aux pastoureles qui tindrent
La feste et bien s'i maintindrent:
Parrot a la joue enflée
Aporta de giroufflée
Trestout fin plein son giron
785 A Belote du Firon;
De soussie plein chappel
Aporta Robin Happel
A Marion la Gautiere;
Une tartre toute entiere
790 Et un beau gros grant gastel
Aporta soubz son mantel
Colin Gautre de la Broce;
Jehannot pendant a sa croce
Aporta tout un jambon,
795 Oncques je ne vi si bon,
Et la meilleure despense
Qui oncques entrast en pense,
Deux bouteilles toutes pleines.
Si dançames en ces plaines
800 Ou ot moult belle assemblée
De joye et baudour comblée.
N'y a pastoure ou paÿs
Jusqu'en ces larris laÿs
Qui ne venist a la feste,
805 De dancer et chanter preste.
Si n'y ot en ceste année
Plus grant feste et mieulx menée.
Girout te demanda moult,
Ne oncques dancer ne voult
810 Pour ce que pas n'y estoies.
Et ou fus tu toutesvoyes
Quant avecques nous ne vins?
Or nous di que tu devins?»
Adonc Lorete appellay
815 Et tout bas a lui parlay,
Car celle fu plus m'amie,
Et dis: «Ne m'esgaray mie,
Ains compagnie plaisant
Plus que vous vi et faisant
820 Chiere bonne et doulcereuse,
Dont je suis toute amoreuse.
Si n'y avoit pas pastours,
Mais ceulz qui scevent les tours
De courtoisie et d'onneur,
825 Car n'y avoit nul menour
De chevalier ou gentil
Escuier, de baron fil.
Sus la fontaine en ce bois,
Ou souvent seulete vois,
830 Me trouverent ou chantoye
Et mon entente mettoye
A ces floretes cueillir.
La me vindrent acueillir,
Ainsi mon chant me traÿ.
835 Quant je les vi m'esbahy,
Car cuiday estre honnie
Et de toute honneur banie.
Mais de ce garde n'avoye,
Car oncques, se Dieux me voye,
840 Je ne vi gent si courtoise.
Doulcement sans mener noise
Gracieux salu me dirent,
Puis des chevaulx descendirent
Et s'assirent couste mi,
845 Mais sur tous, par saint Remi!
Y ot un qu'ilz appelloient
Monseigneur, quant l'appelloient,
Qui estoit doulz et plaisant
Et bonne chiere faisant,
850 Qui de chanter me requist
Et moult doulcement m'enquist
De mon estre et que faisoie
En ce bois ou m'esbatoye;
Et tant fist que je chantay,
855 Quant plus riens je ne doubtay,
Une chançonnete ou deux,
Et certes je fus bien d'eulx
Merciée et chier tenue;
Et ja estoit nuyt venue
860 Quant d'eulx je me departi.
Or t'ay dit en quel parti
Je fus yer la remontée,
Mais en pensée boutée
Nouvellete suis sans doubte,
865 Tant me plaist ycelle route
De gens doulz et avenans,
Et adès suis souvenans
De cil qui le mieulz me plaist,
Qui me dist sans trop long plaist
870 Qu'il me revendroit veoir
Et decouste moy seoir.
Si me tarde qu'il y viengne.
Dieux doint qu'il lui en souviengne
Et que, sans penser villain,
875 Me vueille amer com je l'aim,
Sans villennie me faire!
Car ne pense a me meffaire
Pour homme qui soit en vie,
Ne d'autre riens n'ay envie
880 Fors que nous chantions ensemble,
Il n'y pense, ce me semble,
Autre mal et non fais je.»
«Hé Dieux! que c'est bien songé!»
Lorete adonc respondi:
885 «Par le Dieu qu'en crois pendi!
Or te voy en male cole
Qui veulz laissier nostre escole
Et renoncier au mestier
Pour de tel gent t'acointier.
890 Laisse en paix tout, soterele.
Est ce estat de pastorelle
Qui bestes a a garder?
Il te convient regarder
A ton honneur, ou, sans doubte,
895 Tost la perderoies toute,
Mieulx te vauldroit estre morte.
Sont telle gent de ta sorte?
Ilz t'aroient tost honnie
De toy faire villennie.
900 Certes, pou tenroient conte.
Te fault il un filz de conte
Se d'amours te veulz tramettre?
Certes, chascun son cuer mettre
Doit, se joïr veult a droit
905 D'amours, selon son endroit.
Il est tant de valetons
Si beaulx qui gardent motons
Et pour t'amour se deffrisent
Et te servent et te prisent;
910 Choisis un, se veulz amer,
Et ne te fay pas blasmer
De ceulz qui d'amour legiere
Aymeroient toy, bergiere.»
Adonc respons: «Certes, suer,
915 Amer ne vueil a nul fuer
Par amours, ce n'est pas fable,
Qui qu'il soit, mais s'agreable
M'est un seul plus qu'aultres mille
Pour son corps gent et abille,
920 Pour tant n'ay je pas envie
D'emprendre amoureuse vie;
Ja Dieux ne m'y doint embatre!
Mais je me vueil, bien esbatre
Et jouer sans villennie,
925 Ne fault ja que je le nye.
La veue riens ne me couste
De cil qui me plaist et gouste;
Si ne m'en fault ja blasmer,
Car sans mal le vueil amer
930 Pour le bien qui en lui maint,
Et ainsi sont amé maint
Vaillans pour leur grant bonté
Si com l'en m'a raconté.»
Lorete adonc me respond:
935 «Voir est, si com lievre pont,
Qu'a ton vueil a droit compas
Aimeras, n'y fauldras pas.
Cuides tu faire a ta guise
D'Amours qui les cuers desguise
940 Estrangement et scet prendre?
Et ja le pues tu aprendre
Quant elle te fait tant plaire
Homs de nature contraire
Au mestier de bergerie.
945 Par Dieu! c'est grant resverie
Coment ton cuer y puet tendre,
Et si te pues bien attendre,
Tant t'en vueil bien ores dire,
Puis que le tien cuer y tire,
950 Se souvent as sa hantise,
Qu'Amours, qui les cuers atise,
Ne te laira pas durer
Sans de lui t'enamorer,
Se il est tel qu'il te face
955 Semblant ne d'ueil ne de face.
Mais je te pri, toutevoye
S'il te plaist, que je le voye
Et que le secret tout sache,
Car en soy maint mal ensache
960 Cuer qui aime ou veult haïr
Sans a nul le regehir.»
Lors dis qu'il me plaisoit bien,
Car je la savoye bien
Secrete, et o moy venroit
965 Ou boys ou j'aloye droit,
Si seroye mieulx que seule,
Mais ja n'yssist de sa gueule
Chose qui a celer feist,
Gardast que tant ne meffeist;
970 Et celle le me jura
Par serment et asseura.
Ainsi, noz berbis chaçant
Qui devant nous vont paissant,
Entre noz deux seulement,
975 De ce parlant belement,
Vers le bois nous sommes traittes
Et loings des autres retraittes
Tant qu'a la fontaine veismes
Et sus l'erbe nous seïsmes.
980 La fusmes la matinée,
Reveismes a la disnée,
A ressie retournames
Ou boys, ou d'amours parlames.
Ainsi trois ou quatre jours
985 En ce boys allons tousjours
Qu'onques nul vers nous ne vint,
Mais tost après cil revint
Dont m'anuyoit la demeure;
Les chevaulx senti en l'eure
990 Car l'oreille ailleurs n'avoye,
Si saillis tost en la voye
Pour savoir se cil estoit
Que le cuer m'amonnestoit.
Quant de loings le vi venir
995 Amours me fist devenir
Vermeille ou vis, et couleur
Muay, sans sentir douleur.
De loings je le regardoye;
A l'entrée l'attendoye
1000 Du boys dont il approchoit.
Lui troisiesme chevauchoit
Sans plus, li biaux et li gens.
N'ot pas mené tant de gens
Comme a l'aultre fois avoit.
1005 Ma compaingne qui le voit
De paour prist a trembler
Et ou vis morte sembler;
Si me dist par grant freour:
«Je mourray cy de paour,
1010 Nous serons ja tost honnies,
De folie t'ensonnies
De tel seigneur t'acointier.
Yssons hors de ce sentier,
Il nous en vault mieulx fouïr
1015 Et nous aler enfouïr
Soubz ces fueilles en ce boys.
Vien se tu veulz, je m'en vois;
Mieulz voulsisse estre grevée
D'un bras que t'avoir trouvée
1020 Anuyt n'ycy convoyée.
--Dieux! que tu es effroyée!»
Dis je, «Lorete, regarde
Comme il rit; tu n'aras garde:
Il n'est pas tel qu'il nous face
1025 Villennie ne mefface.»
Cellui ainsi chevaucha
Tant que de nous approcha,
Et je contre lui m'aval.
Il descent de son cheval,
1030 Je m'encline et le salue
Comme affiert a sa value,
Mais tost me vint relever
Et dist: «Dieu vueille sauver
Ceste bergierete gente,
1035 D'aigniaulx garder diligente.»
Lors me prent parmi la main,
Et je ou vert boys le main
Seoir sus la fontenele.
Doulcement dist: «Marotele,
1040 Vous veoir moult desiroye
N'a aultre riens ne tiroye
Qu'a cy retourner arriere,
Car oncques ne vi bergiere,
Dont je soye souvenant,
1045 A mon gré si avenant
Ne dont le chant tant me pleust,
Tant autre bien chanter sceust.
Or vous pri je, doulce amie,
Que ne m'escondissiez mie
1050 De chanter sans plus long plait,
Car vostre chant moult me plait.
Mais dites, doulce maignete,
Est ce vostre compaignete
Que je voy la toute seule
1055 Assise sus celle esteule?»
Lors a respondre me pris
Au chevalier que tant pris,
Bassement sans arrestance,
Et de mesprendre en doubtance
1060 Dis: «Monseigneur, grant mercy
Dont tout mon fait vous plait si.
C'est de vostre bien sans faille,
Non mie que je le vaille.
Si suis de bonne heure née
1065 Quant Dieu m'a ad ce menée
Qu'a tel chevalier je plais
Dont tout li mondes tient plais
Du grant renom et vaillance;
Si vueil du tout sans faillance
1070 Estre vostre en tout honneur,
Car bien sçay que deshonneur
Jamais ne pourchaceriez
Vers moy, vous ne daigneriés.
Si commandez a vo guise,
1075 Soit chant ou autre devise,
Ja ne vous contrediray
Mais du tout obeïray
Sans que nulle riens remaigne,
Monseigneur; mès ma compaigne,
1080 Que veez la, seure n'est mie.»
Lors dist: «Venez ça, m'amie,
N'aiez ja de moy doubtance,
Car a vous faire ne pense
Chose qui vous desagrée.
1085 --C'est ma conpagne secrée,
Monseigneur, faittes lui chiere,»
Ce dis je, «et l'aim et tiens chiere.»
Lors celle c'est approchée
Qui tint la chiere embrunchée,
1090 Et de contenance simple,
Le chapperon, que ot sans guimple
Affulé, de son chief oste
Et s'agenoilla decoste
Cellui, qui lui tend la main
1095 Et dit: «Dieux vous doint bon main,
Bergierete savoureuse,
Ne soiez pas paoureuse
De moy qui suis vostre ami,
Mais vous seez coste mi.
1100 Et dittes de voz nouvelles
Entre vous deux, pastourelles,
Car pastouriaux aussi sommes,
Voz chiers amis et voz homes.»
En sa compagnie avoit
1105 Deux chevaliers qu'il savoit
Secrez, sages, sans murmure,
Car d'autres gens n'ot il cure,
Qui furent jolis et cointes,
N'orent pas gonnele a pointes
1110 Mais haincellins a grans manches,
Estrois, serrez sus les hanches.
De velous vert decouppez,
Brodez, d'or entour frappez,
Et coliers d'orfavrefie,
1115 Moult riches a pierrerie;
Si n'a de cy en Artois
Nul chevalier plus courtois
En fait, en dit, en langage
Et en maintien doulz et sage.
1120 Cellui ou le plus pensoye
Lors n'estoit vestu de soye,
Mais d'une grant hoppellande
Longue et ot une guerlande
En son chief o un fermail
1125 De pierrerie et d'esmail,
Un riche colier luisant
Qui moult lui fu aduisant,
De dyamans tout semé
Et de perles asesmé,
1130 Mais de ce ne fais je conte
Combien qu'adès vous en conte,
Car ses condicions, faittes
A souhait, toutes perfaittes
Furent a mon gré, par m'ame,
1135 Telles qu'en ce monde dame
N'a que on la deust blasmer
D'un tel chevalier amer,
Et ce plus l'embelissoit
Que le fin or qui luisoit
1140 Ne la pierrerie aussi.
Longuement fusmes yssi,
Ou mainte raison ot ditte
Que je n'ay pas cy escripte
Pour le conte qui seroit
1145 Si long qu'anuyer porroit;
Pluseurs chançons y chantay,
Et cil chanter escoutay
De qui le chant me plaisoit
Et trestout quanque il faisoit.
1150 La devisames sans conte
D'amours maint gracieux conte,
Et a mainte belle enqueste
Respondis a sa requeste;
Maint doulz ris, maint doulz regart
1155 Fu gitté, se Dieux me gard,
Celle part ou fist bel estre;
Et, tout soit il bien grant maistre,
En son fait n'en son accueil
N'ot ne mauvaistié n'orgueil,
1160 Dont forment m'esbaÿssoie
Quant a sa valour pensoye
Et le veoie sur tous
Humble, gracieux et doulz,
Et ce yert ce que plaissoit
1165 Mon cuer a qui il plaisoit.
Longuement ou lieu nous seismes,
Ou maint plaisant conte deismes
Qui a conter bien seoit
Mais pas ne nous desseoit,
1170 Tant y fussions grant espace,
Car legierement temps passe
Cuer qui en ayse demeure,
Un jour ne lui est une heure.
Ja d'avesprir s'aprestoit;
1175 Un chevalier qui estoit
En la place avoit ja dit
Maintes fois, dont fu maudit
De moy, a basse murmure:
« Sire, le temps pou vous dure,
1180 Ja est tart, le jour nous fault;
Souviengne vous qu'il vous fault
Devers noz seigneurs aler
A qui avez a parler. »
Lors disoit cil: « Je m'en vois »,
1185 Puis se rasseoit ou bois
Et ne s'en pouoit partir,
Et moy aussi sans mentir
Voulsisse bien qu'a tousjours
Près de lui fust mes sejours,
1190 Mais partir nous convenoit
Pour la nuit qui ja venoit.
De moy se parti atant
Le bel et bon que j'aim tant;
Au departir m'acola,
1195 Je m'encline, il s'en ala
Esperonnant son cheval;
Et je m'en viens contreval
La prée, atout vert chappel
Ou chief, menant mon tropel,
1200 Devisant a ma compagne.
Et ainsi par la champagne
Venismes en noz maisons,
De hebergier fu saisons;
Si failly no parlement
1205 Atant, mais tout bellement
Avons l'une a l'autre ou bois
Mis journée; a basse voix
Deismes: « Lieve toy par main,
A Dieu jusques a demain. »
1210 Celle nuit ainsi passa
C'oncques mon cuer ne pensa
Fors a cil sanz qui n'avoie
Nul bien se ne le veoie.
Si n'y ay gaires dormi,
1215 Mais en pensant a par mi
Disoie ces mos yci
Comme ouïr les pouez ci:
_Bergierete_
Dont me vient telle aventure
Qu'amer me fault maugré mien?
1220 Je ne cuidasse pour rien
Qu'amours fust de tel nature.
Simple sans amer estoye
Ne pensée sossieuse,
Je me jouoye et chantoye,
1225 De plus n'estoye envieuse.
Or n'ay fors de penser cure
Ne je n'ay nul aultre bien
Fors veoir cil qui le mien
Guer a tout, je le lui jure,
1230 Dont me vient telle aventure?
Son gent corps ou que je soye
Et sa chiere gracieuse
Adès m'est vis que je voye,
De plus ne suis curieuse.
1235 Hé las! je sens la pointure
D'amours qui me tient si bien
Que je n'ay sens ne maintien,
Tant mez en amer ma cure,
Dont me vient telle aventure?
1240 Au matin quant le jour crieve
Pensant a amours me lieve,
A soleil levant m'en vois
O mes berbis vers le bois.
Ma compaingne d'assez près
1245 Me suivoit, si vint après,
Dont je fus moult resjouÿe
Si tost que je l'oz ouÿe;
De loings le chief me hocha,
Puis, quant elle s'approcha,
1250 Sus la fontaine en alons
Seoir, ne fu mie longs
Ly chemins, lors commençay
Com celle qui plus pensay:
« Dis, Lorete, doulce amie,
1255 Et ne te mentoys je mie?
Est il bel le chevalier,
Par ta foy, que tu vis hyer?
N'est il gracieux et gent
Et plaisant a toute gent?
1260 Sont pastoureaulz de tel sorte?
Bien aroit pensée torte
Ou aveugle les deux yeulx
A qui il ne plairoit mieulx
Qu'un bergier, tant fust apris.
1265 De quoy ay je donc mespris
S'il me plaist, sans mal penser
Et sans nullui offenser? »
Lorete respond atant:
« Bel et gracieux est tant
1270 Voirement que riens n'y fault,
Ne je n'y voy nul deffault,
Et bien voy que l'aimeras,
Dont encor te blasmeras.
Mais, s'il les autres surmonte,
1275 A toy ce que vault et monte
Qui pastourelle remains?
De tant t'aimera il mains
Comme en lui a plus valour.
Bien tendroit a grant foulour
1280 D'en toy mettre s'amour toute.
Quelque dame aime sans doubte
Belle et de grant renommée.
Cuideroies tu amée
Estre de lui, fole, nyce!
1285 Garde qu'il ne te honnisse,
Car s'amour n'aras tu pas;
Et ne te fie en ce pas
N'en son regard doulz et simple;
Chascun te tendroit a simple
1290 De toy attendre a s'amour.
Mais me croy et sans demour
Esloingne ce bois ramage
Ains que plus ayes domage,
Et gard que plus ne t'y treuve
1295 Ains que fole amour t'esmeuve
A faire plus grant folie,
Car a grant sens cil s'alie
Qui esloingne le meschief
Ains qu'il en viengne a mal chief;
1300 Mais pour bien je le t'anonce,
Car tu n'aras ja une once
De s'amour, ne pou ne grain:
Tel espi n'est pas sans grain.
Cuides tu qu'a pourveoir
1305 Soit adès bon? a veoir
Est au regard savoureux
Qu'il a le cuer amoreux,
Mais pour passer temps puet estre.
Tout soit il noble et grant maistre,
1310 Bien vouldroit trouver aucune,
Car pou sont qui n'aiment qu'une,
A qui se peüst esbatre,
S'a ce se pouoit embatre.
Mais c'est trop grevable peine
1315 A cuer, qui d'amour certaine
Aime entierement, partie
Qui en deux lieux est partie
Ou en pluseurs, et scet bien
Qu'il n'en a pas tout le bien;
1320 Et mieulx vauldroit, n'est pas gas,
Amer en un lieu plus bas
Qu'en si hault n'en si grant pris
Qu'on soit tenu en despris.
Ne te souvient il, Marote,
1325 Que ton pere, Jehan Burote,
Qui est sage homme entre mille,
N'a pareil en nostre ville,
A de beaulx rommans assez
Qui parlent des temps passez.
1330 L'aultrier en un, dessoubz l'orme,
Lisoit seant sus sa forme;
Au propos de telz amans
Raconte cellui rommans,
Ainsi com je me recorde
1335 Il me semble qu'il recorde
D'un filz de roy, et m'est vis
Comme il compte en son devis,
Qu'on appelloit roy de Troye
Le pere; avint toutevoye
1340 Que la roÿne un fier songe
Songa, nel tint a mençonge,
Quant de cel filz grosse estoit,
Avis lui fu qu'elle avoit
Enfanté un grant tyson
1345 Ardent qui la bastison
De la ville toute ardoit,
La cité toute perdoit
Le païs et le regné.
Le roy, quant l'enfant fut né,
1350 Occire le commanda,
Mais la roÿne manda
Qu'a son pastour fust baillié
Et non de coteaulx taillié,
Car trop ert bel enfançon.
1355 Si fu nourry en façon
De filz de bergier ou bois,
Et quant grant fu, atout oys,
Cuidoit au pastour filz estre,
Nés en village champestre.
1360 Si fu bel, gentil et gent
Et plaisant a toute gent,
Sur toute autre creature.
Bien retrait a sa nature,
Car, tout gardast il berbis
1365 Et mengast lait et pain bis,
Courtoys fu et avenant,
Abille et bien souvenant;
En lui ot gentil bergier;
En maint boys, en maint vergier
1370 Repairoit berbis paissant.
Une pucelle en passant
Vid li gentilz homs naïs,
La plus belle du paÿs,
Menant berbis en pasture;
1375 Cent corps et belle faitture
Ot la pucelle au cler vis,
Et nommée a mon avis
Fu par droit nom Senonné,
Si lui a son cuer donné,
1380 Car trop lui plot son doulz ris.
Le bergier nommé Paris
Fu puis, comme on fait entendre,
Mais lors nommé Alixandre
Estoit cil gentil pastour,
1385 Si n'y avoit la entour
Pastourel a lui semblable,
Tant fust doulz et amiable
Que Senoné moult l'ama
Et doulz ami le clama.
1390 Si orent, si com j'entens,
Les deux amans moult bon temps;
Un tendis et lit faisoient
De fueilles vers, ou gisoient
Braz a braz sans couverture
1395 Fors de branches et verdure,
N'aultre ne voulsissent mie,
Paris promist a s'amie
Qu'a toujours mais l'aimeroit
Ne jamais ne la lairoit,
1400 Ainçois une grant riviere
Tourneroit son cours ariere
Que son cuer fust deposé
D'elle amer ne reposé.
Si fist ceste convenance:
1405 En un arbre en souvenance
L'escript atout le coutel,
Dont il tailloit maint fretel,
Et dist que cel arbre et fust
Tesmoing du convenent fust.
1410 Mais puis autrement avint,
Car dit lui fu dont il vint
Et de quel gent estoit né,
Dont desplut a Senonné,
Car aussi tost s'en ala,
1415 Plus berbis ne garda la,
Ains s'en retourna a Troye
Dont ses parens orent joye,
Sa pouvre amie oublia
Qui moult s'en contralia,
1420 Puis ama roÿne Heleyne
Dont il eut doleur et peine.
Doncques puez tu bien veoir
Que chascun veult asseoir
Son cuer selon son degré,
1425 Car Senonné plus a gré
Ne vint a cil par nul tour
Quant sceut qu'il n'estoit pastour,
Ains yert de royal orine;
Pour ce amer une roÿne
1430 Voult, dont mal lui ensuivi.
Et ainsi, je te pleuvi,
Puez tu veoir et aprendre
Qu'on se doit a son per prendre
Qui veult joïr a son vueil
1435 D'amours et avoir moins dueil.
Or t'ay conseillié, moy semble,
Loyaument, car, puis qu'ensenble
Loyalles compaignes sommes,
Ne devons pour nulles sommes
1440 Souffrir l'une l'autre traire
A riens qui lui soit contraire,
S'estre y puet remede mis
Par nous ou par noz amis.»
Adonc a celle respons
1445 Qui m'ot tel sermon expons:
«Lorete, tu dis merveilles
Qui l'amer me desconseilles
Pour ce que pastoure simple
Suis sans atour et sans guimple,
1450 Et dis qu'en moy a nul fuer
Cellui ne mettroit son cuer
Pour ce que d'estat pareil
Ne sommes ne d'appareil,
Et a Senonné, te semble,
1455 Bien devroye prendre exemple,
Que Paris tost oublia.
Tu dis voir, mais il y a
Aultre livre, il m'en recorde,
Qui d'Ercules nous recorde,
1460 Qui fu si chevalereux
Et en armes tant eureux
Qu'oncques nul ne le passa,
Tant en armes s'avança,
Et si ert roy couronné
1465 De grant terre et de regné;
Mais Amours si le lia
Et si fort humilia
Qu'il ne lui desplaisoit mie
Charpir laine avec s'amie;
1470 Et lui, qui ert de tel pris
Que les lyons rendoit pris,
Fut subgiet a une femme
Qu'il servoit comme sa dame.
Si n'y a nulle grandeur
1475 En amours quant grant ardeur
Fait par plaisance soubzmettre
Le cuer ou il se veult mettre.»
Ainsi respondis atant
A Lorete, mais pour tant
1480 Lui dis que ja ne doubtast
Et son penser en ostast,
Que ja mon cuer si volage
Ne seroit qu'il eust folage
En l'amour ou m'embatoye,
1485 Mais amer, bien le sentoye,
Le me convendroit sans faille,
Quel mal que souffrir m'en faille,
Car mon cuer s'y adonnoit
Et du tout a lui donnoit,
1490 Voulsisse ou non, et ne peusse
Pour poyssance que g'y eusse
M'en oster ja, tant l'amoye;
Et que trop mieulx l'amour moye
Me plaisoit a lui donner
1495 Et mon cuer abandonner
Qu'a nul aultre; posé ore
Que tant ne m'amast encore
Comme un autre m'aimeroit
Qui dame me claimeroit
1500 Souveraine et redoubtée.
Tant y eux m'amour boutée,
Si ne m'en blasmast jamais,
Car trop tart ert dès or mais.
Et celle me dist qu'atant
1505 S'en deporteroit et tant
Comme elle pourroit au fort
Me donroit bon reconfort,
Car puis qu'une riens fault estre
N'y a lieu sermon ne maistre.
1510 En tel devis tout le jour
Nous fusmes et sans sejour
Ne parlions d'autre matiere
Ensemble, et se toute entiere
Une sepmaine en parlasse
1515 Ne me sembloit pas l'espace
D'une heure, tant me plaisoit
En parler, si me faisoit
Resjoïr la souvenance
De sa doulce contenance.
1520 La tous les jours assemblions
Et des aultres nous amblions
Entre nous deux bergieretes
Parlant de noz amoretes;
Si repairions la souvent,
1525 Ou fust par pluie ou par vent,
Nul mal ne nous estoit grief.
Mais, pour conter plus en brief
Sans tous les jours raconter
Qu'Amours nous y feist hanter,
1530 Nous y fusmes celle année
Mainte heure et mainte journée,
Et cil souvent y venoit
A qui bien en souvenoit.
Si me plut tant sa hantise
1535 Que je l'amay de tel guise
Que tout mon age y parra.
Ainsi ou bois repaira
Celui qui si s'y maintint
Qu'entre ses laz bien me tint,
1540 Combien que peine mettoie
A moins l'amer, et doubtoye
Que mal m'en peüst venir,
Et se m'en peusse tenir
Volentiers trop moins l'amasse
1545 Pour n'en souffrir si grant masse
De doulour pour sienne amour
Dont j'estoye en grant cremour.
Pour ce contre Amours disoie
Ainsi, quant je m'avisoie,
1550 Et m'yert vis qu'en mes clamours
Ainsi respondoit Amours:
_Balade a responses_
Amours, escoute ma complainte.
--Or dis: qu'as tu? de quoy te plains?
--De toy par qui je suis destraintte.
1555 --Tort as quant de ce te complaings.
--Non ay voir, car ma joye estains.
--Joye en aras s'en toy ne tient.
--Trop crain le grant mal qui en vient.
--Pense au bien, non pas au domage.
1560 --Vueille ou non, d'un seul me souvient.
--Aime ley; si feras que sage.
Veulx tu que j'aime? est ce contrainte?
--C'est drois quant ton cuer est atteins.
--Sera ce cil qui m'a estraintte?
1565 --Oïl, car de tout bien est pleins,
--Je n'ay donc pas tort si je l'aims?
--Non, car chascun a bon le tient.
--Et se mon honneur ne soustient?
--Si fera voir, c'est son usage.
1570 --Or me dy qu'en faire apartient?
--Aime ley; si feras que sage.
Raison me met en trop grant crainte.
--Ne la croys, joye tolt a mains.
--Tu m'as vers elle en guerre empainte.
1575 --Desconfis la, joing moy les mains.
--Honneur dist qu'en vauldroye mains.
--Il ment, chascun bon en devient.
--Fait, et donc amer me convient?
--Ce te sera grant avantage.
1580 --Que feray donc se cil revient?
--Aime ley; si feras que sage.
Princes gentilz, Amours me tient.
--Il apertient bien a ton age.
--Un seul ami mon cuer retient.
1585 --Aime ley; si feras que sage.
Ainsi je me debatoye
A par moy et combatoye,
Pensant a son doulz maintien
Si trés plaisant que je tien
1590 C'oncques plus perfait en somme
Ne l'ut autre mondain homme.
Et ad ce mon cuer pensoit
Tout temps et ne reposoit.
Mais quant la ensemble estions
1595 Toute l'entente mettions
A nous entre regarder.
Ne sçaroye recorder
Les regars, les doulz parlers,
Les venirs et les alers,
1600 Les doulz ris, les contenances,
Les trés plaisans ordenances
Amoureuses; tout n'aroye
Jamais dit, je ne pourroye.
La se seoit couste mi
1605 Mon trés savoureux ami,
Que j'ay maint jour attendu,
Ou gisoit tout estendu
Sus l'erbete qui venoit,
Et en mon giron tenoit
1610 Sa teste et j'aplanioye
Son chief et aonnyoye,
Puis je lui mettoye au col
Les deux braz dont je l'acol.
Or pensez se la avoit
1615 Plaisir et s'il y devoit
Avoir maint doulz mot conté,
Tout ne soit cy raconté.
Et sachiez certainement
Qu'ainsi dura longuement
1620 Sans que m'amour me requist,
Mais ne failloit qu'il enquist
Se il la pourroit avoir,
Car savoir pouoit de voir
Que toute entiere l'avoit,
1625 Apercevoir le pouoit.
Mais, comme soit chose dure
A souffrir la grant ardure
Dont Amours les cuers destraint,
Il me dist, comme contraint,
1630 Une fois que vers moy vint,
Et ou moys de may advint,
Qu'il m'amoit de cuer entier,
Et que ja n'estoit mestier
De ce long sermon en faire,
1635 Car aviser son affaire
Je pouoie bien de fait
Et com de vouloir perfait
Il m'amoit, et que l'amasse
Seurement, et ne doubtasse
1640 Que mon honneur garderoit;
Et moult bien se garderoit
De faire chose nesune
Dont j'euse pesance aucune.
Ainsi cellui me pria
1645 Qui mon cuer sur tous tria;
Si fus adonc esperdue,
Car doubtay qu'en guise deue
Respondre ne lui sceüsse
Ainsi comme je deüsse,
1650 Car ne le peusse escondire
N'aussi ne vouloye dire
L'amour que je lui portoye.
Aussi en mon cuer sentoye
Que pour riens chose ne feisse
1655 Dont nullement me meffeisse;
Si doubtoye a ottroyer
Chose dont mauvais loyer
Me venist et cuer dolent,
Et ne sçavoye el talent
1660 Qui l'ot meu a me prier.
Et cellui sans detrier
Me prie que je le croie
Et que m'amour lui ottroye
Et mon vouloir lui responde.
1665 Lors de pensée perfonde
Souspiray sans avoir yre,
Et lui commençay a dire
Craintivement en tremblant:
« Monseigneur, par mon semblant
1670 La moye amour se descele;
Ne fault ja que je le cele,
Bien sçay que l'apercevez;
Apercevoir le devez,
Car Amours si le demonstre;
1675 Mais pour tant se je le monstre,
Vueille ou non, ne croy je mie
Que n'ayez dame et amie
Aultre part qui vous adrece
Et de moy plus grant maistrece.
1680 Si ne devez requerir
Autre amour n'ailleurs querir,
Se loyal estre voulez,
Et mon cuer trop adoulez
Seroit, quelque povre femme
1685 Que je soye, s'autre dame
Avoit la joye de vous
Et j'en eusse le courroux;
Si nous en passons ainsi,
Car sachiez que vous aim si
1690 Qu'aultre je ne vueil amer,
En aye doulz ou amer;
Mais de vous je ne vueil, voir,
Nulle aultre promesse avoir
Ne qu'aultrement je me loye:
1695 Il me souffist que vous voye
Et que vous aime a par mi,
Car a autre estes ami;
Et aussi je vous di bien
Que pour morir ne pour rien
1700 Je ne m'abandonneroye
A folie, ainçois mourroie.
Je ne sçay se vostre entente
Seroit a si faitte attente,
Mais, pour voir, sus sains vous jure
1705 Que jamais si faitte injure
Ne feray a mon honneur,
Soit pour grant ou pour meneur. »
Adonc cil respond atant:
« Et qui vous en requiert tant?
1710 Ne m'en fault ja escondire,
Car pourchacier, faire ou dire,
Je ne pense, par mon ame!
Chose dont vous aiez blasme
Ne dont vostre honneur descroisse,
1715 Ains desir que je l'accroisse
Ne ja ne le requerray,
De vous avoir ne querray
Fors l'amour en bonne foy
Et le doulz baisier par foy;
1720 Nulle n'est qui excuser
S'en doye ne reffuser
Ce a son ami; par m'ame!
Ce n'est pas trop, belle dame.
Aultre chose ne demand,
1725 Est ce oultrage a un amant?
Quant de plus feray requeste
Je vueil qu'on m'oste la teste! »
Lors m'en ris et pris a dire:
«Qui vous pourroit escondire
1730 Requeste si trés courtoise?
Je l'ottroy, comment qu'il voise,
Car mon cuer sens par mi fendre,
Si ne le puis plus deffendre. »
Lors cil m'embrace et me baise
1735 Doulcement, souspirant d'aise,
Et puis m'en regracia
Humblement et mercia.
Mais ce baisier me trahy,
Maintes fois l'ay puis haÿ,
1740 Car mon cuer vint du tout prendre
Et d'amoureux dart esprendre.
Si en fusmes puis si duit
Que c'estoit tout no deduit
Trés plaisant, sans nous lasser,
1745 Et noz braz entrelacer
En baisant a longue alaine
Sans pensée autre villeine.
Ainsi en ce bois ramé
J'acointay mon bien amé
1750 Et devins toute changée
Et de pastours estrangée,
Ou je souloie hanter
Autres chançons a chanter
Que celles qu'ains oz apris,
1755 Et ceste balade apris,
Que cy deviser propos,
Qui fu selon mon propos:
_Balade_
Ha! le plus doulz qui jamais soit formé,
Le plus plaisant que nulle autre accointast,
1760 Le plus perfait pour estre bon clamé,
Le mieulx amé qu'onques mais femme amast!
De mon vray cuer le savoreux repast,
Tout quanque j'aim, mon amoreux desir,
Mon seul amé, mon paradis en terre,
1765 Et de mes yeulx le trés perfait plaisir,
Vostre doulceur me meine dure guerre.
Vostre douleur voirement antamé
A le mien cuer qui jamais ne pensast
Estre en ce point, mais si l'a enflammé
1770 Ardent desir qu'en vie ne durast
Se doulz penser ne le reconfortast,
Mais souvenir vient avec lui gesir;
Lors en pensant vous embrace et vous serre,
Mais quant ne puis le doulz baisier saisir
1775 Vostre doulceur me meine dure guerre.
Mon doulz ami, de tout mon cuer amé,
Il n'est penser qui de mon cuer gitast
Le doulz regard que voz yeulz enfermé
Ont dedens lui; riens n'est qui l'en ostast
1780 Ne le parler et le gracieux tast
Des doulces mains qui, sanz lait desplaisir,
Veulent partout encerchier et enquerre,
Mais quant ne puis de mes yeulx vous choisir
Vostre doulceur me meine dure guerre.
1785 Trés bel et bon, qui mon cuer vient saisir,
Ne m'oubliez, ce vous vueil je requerre,
Car quant veoir ne vous puis a loisir
Vostre doulceur me meine dure guerre.