60 Parmi bouscages hantoye
Et par ces landes sauvages
Pour repaistre enmi herbages
Les berbietes mon pere,
Et quoy qu'adès en appere,
65 Ainsi par maintes anées
Furent par moy pormenées,
Tant que je fus ja percreue,
Sans estre nul jour recreue
Du mestier, qui me plaisoit,
70 De bergerie, et faisoit
Matin lever par grant cure.
D'autre riens n'avoye cure
Fors de repairier en champs
Et en bois, ou les doulz chans
75 Des oysiaulx souvent ouoye,
N'autres gens je n'avouoye
Fors pastoures et pastours.
Si savoye tous les tours
Du mestier de bergerie:
80 Aigniaulx en la bergerie
Soignier, mettre fein en creche,
Semer en toit paille fresche,
Et les mottons d'une part
Trier, oindre et mettre a part,
85 Berbis traire, et faire a heure
Aigneulx teter, et desseure
Le fourrage es rastiaulx mestre;
Ne nulle mieulx entremettre
Ne se sceust de tout l'affaire
90 Qu'il convient au mestier; faire
Anble de son et d'aveine
Pour faire remplir la veine
Aux berbis, qui aignelé
Avoyent qui n'est coulé,
95 Savoye, et mes berbis tondre
En may assise en belle onbre
Au matin et a vesprée,
Et aporter de la prée
Herbe aux aignelez petiz,
100 Pour leur donner appetiz
Quant ilz viennent en saison
Qu'on les tient en la maison;
Et bien raporter des champs
Aucunes berbis meschans,
105 Vieilles et a dos pelé;
Et, s'aucune eust aignelé
La hors, l'aignel entre bras
Porter dedens mon rebras,
Et eulz garir de la rongne.
110 N'y avoit si grant besoingne
Dont je ne fusse maistresse
Et des bergieres l'adrece.
De tout ce soigneuse estoye.
A droitte heure me hastoye
115 De mener a remontée
Mes berbis sus la montée
D'un tertre ou herbe ot menue;
Et quant soleil ert soubz nue,
Au matin a la rousée
120 D'ou terre estoit arrosée,
Ou temps d'esté, par herbis
Couvers mener mes berbis
Bien savoye, et assembler
Mon parc, que le loup embler
125 Ne m'en peüst chief ne queue
Et que nulle ne fust seue.
La en l'ombre me seoie
Soubz un chaine et essayoye
A ouvrer de filz de laine,
130 En chantant a haulte alaine;
Ceinturetes je faisoie,
Ouvrées com ce fust soye,
Ou je laçoye coyfettes
Gracieusetement faittes,
135 Bien tyssues et entieres,
Ou raisiaux ou panetieres
Ou l'en met pain et fromage.
La soubz le chaine ramage
S'assembloient pastourelles,
140 Et non mie tout par elles,
Ainçois veissiez soir et main
Son ami parmi la main
Venir chascune tenant,
Plus de vint en un tenant,
145 Dont l'un flajolant venoit
Et l'autre un tabour tenoit,
L'autre musete ou chievrete;
N'il n'y avoit si povrete
Qui ne fust riche d'ami.
150 Et la vous veissiez enmi
La place mener la tresche
Joliement sus l'erbe fresche
Parrot, Soyer et Harnou
Et Regnault, qui ot maint nou
155 D'amours fait sus son chappel
Et boquet sus le jupel
Que Rambourt ot atachié
Et mis le chappel ou chié,
Comme a son ami trés chier.
160 Ainsi les veissiez treschier
Et karoler et baler,
L'un en dançant reculer
Tenant la main au cousté,
Et le pan devant osté
165 Et a la ceinture mis,
Puis en dançant s'est remis
A la queue emprès Gilon
Et devant met Sebilon.
Joliement y vait Belote
170 Qui bien joue a la pelote,
E Mangon et Jehanneton
Et Belon, au joly ton
Des instrumens acordés.
La veissiez bergiers hordez
175 De gans blans et d'aumosnieres
Et de diverses manieres
D'outilz telz qu'il apartienent
A bergiers qui gays se tiennent:
Trenche pain, cysiaulx, forsetes,
180 Boiste a ointure, esguilletes,
Aloine, cernoir, cordele,
Une grande tace belle,
Fil, aguille, et deel avec
Y a, bergier n'est sanz hec;
185 Mainte autre chose a dedens
Bonne, et lanieres pendans,
Et la grant clef de la porte
De la bergerie on porte
Qui a une bille pent
190 Et derriere vait frappent,
Et tout pent a la ceinture,
Ou le mastin a esture
On tient lié a toute heure
Qu'après les conins ne cueure,
195 La houlete bien taillée,
Par amoretes baillée,
Que bergier tient en sa main,
Et la panetiere a pain,
Ou aulx et fromage on met.
200 Biaulx oysiaulz, je vous promet,
Ont ceulz qui sont les plus cointes,
Tout n'ayent ilz nulles pointes
Qui leur voise au pas grevant,
Et la poittrine devant
205 Desnoulée, ou le blanchet
Pert blanc de nouvel achet
Ou la croix de la chemise
Quant toute neufve elle est mise.
La a cotes de buriaulx
210 Vous veissiés ces pastoreaulx
Mener feste a desmesure,
Pour attaindre a la mesure
Fraper du pié en dançant,
Gautier emprès Helissant
215 A cloche pié faire un sault,
Si comme amours les assault,
Huer, crier, rigoler
Et ensemble entr'acoler;
Est ce vie vie vie?
220 Qui jamais a d'autre envie?
Puis, quant de dancier sont las,
Les veissiez par grant solas
Eulx seoir sus l'erbe drue,
Chascun amant lés sa drue,
225 Sus la clere fontenelle,
En chantant de voix isnelle,
Ataindre pain et fromage
Et tout mettre sus l'erbage,
Et ces pastoureaulx gentilz
230 Vous trenchier ce pain faitis
Par lesches grandes et lées,
Après doulces acollées
Les gitter en la fontaine
Et par bonne amour certaine
235 D'ycellui mengier eulx paistre.
En celle lande champestre,
De flours couverte a tous tours,
Sont ilz aise ces pastours
Berbis gardans par sillons,
240 Et ces jolis oysillons
Qui les cuers leur resjoïst!
En celle place on oÿst
Chanter Parrot et Margot:
«Larigot va larigot,
245 Mari, tu ne m'aimes mie,
Pour ce a Robin suis amie.»
Ainsi amont et aval
Tout y retentist li val
Des haultes voix deliées
250 De ces pastorelles liées,
Chantans a joyeuse chiere.
Et Robin, qui a moult chiere
Marion qu'il aime moult,
Si quiert aval et amont
255 Pour trouver couldre qui ploye,
Large et longe, et la s'employe
Atout un large coutel,
Assis sus son bleu mantel,
Si fent la couldre par mi
260 Et dit que, par Saint Remi!
Esclisse fera de couldre,
Ensemble veult les bous couldre,
Si ara de flours chapiau
Moult bien suroré d'orpeau
265 Que s'amie a en sa bourse.
Adonc n'y a si rebourse
Qui chapel a lie face
A son doulz ami ne face
De muguet et flours d'amer
270 Ou de roses d'oultremer.
Tendis vont o leurs musetes
Cueillir cormes ou noisetes,
Ou chastaignes en ce boys
Abatre ou cerner des noix,
275 Selon qu'il est la saisons,
Ou roysins en moustoisons,
Li pastours, puis les aportent
Aux belles qui se deportent
En l'ombre et leur font chapeaulz.
380 Chascun dit: «Li miens est beaulz.»
Si broustent la tel viande
Ne nul d'eulx plus ne demande.
Telz y a qui jus leurs fleustes
Mettent et trayent aux butes,
285 Aultres la lute commencent,
Et les autres si s'avancent
A faire aucuns jeux de forces,
Ou arrachent les escorces
Des arbres vieulx et mossus;
290 Leurs chaperons lient sus
De bien estroitte maniere
Et cousent une lasniere
Grande et large a celle escorce,
Leur main ou creux de la torse
295 Boutent et bouclier en font,
Espées de boys reffont;
Lors commence l'escremie,
Chascun dru devant s'amie
Joue du bouclier et fiert
300 Ses compains comme il affiert.
La veissiez vous de beaulx coups
Lancier sur teste et sur coulz,
Et cellui qui mal se targe
De l'escorce dont fait targe,
305 En emporte mainte boce
Souvent quant lui fault l'escorce;
L'aultre le mort, et se couche,
Fait, et tient close la bouche;
La chascun se vient ploier
310 Et au lever essaier,
Et cellui qui mieulx le lieve
Le pris et l'onneur enlieve.
En yver jouent aux billes
Et au parquet et aux quilles
315 Et aux meriaulx et aux noix
Et a autres esbanois.
D'aultres jeux font ilz assez
Biaulx et plaisans, ce pensez,
Devant leurs belles amies
320 Qui ne sont pas endormies
A jugier des mieux apris
Et bien asseoir le pris.
Et orriez ces valetons,
Quant ilz sont es sommetons
325 Des montaignes, jargonner
Et l'un l'autre ramposner
En jargon, tout en chantant,
Que nul fors qu'entr'eulx n'entent.
Ainsi se vont deportant
330 Li pastorel, mais pour tant
Ne laissent a prendre garde
Des berbis qu'ilz ont en garde;
Puis au vespre s'en retournent
Et tous et toutes s'atournent
335 De trier leurs berbietes;
Congié de leurs amietes
Prenant li joli pastour,
Et se mettent au retour.
Ainsi longuement hantay
340 Celle vie ou je chantay
Mainte jolie chançon,
Et en l'ombre du buisson,
O mes compaignetes belles
Et leur ami avec elles,
345 M'ombroyay mainte journée.
Joenne estoye et atournée
Comme pastoure polie:
Surcot vert, cote jolie
J'avoye et graille ceinture,
350 Bourse, espinglier a esture
Fait et cotelet faitis
Et tous les gentilz outilz
Qu'apertiennent a bergiere,
Et sus pelice legiere,
355 Chainse crespé et delié,
Blanc flairant et bien lié.
Mignote estoie et grassete,
Et riant a voix bassete,
Et gente, ce disoit on.
360 Si fus de maint valeton
Amée moult chierement,
Mais si me tins fierement
Que nul ne daignay amer;
Maint bergier a cuer amer
365 Plourant vint m'amour requerre,
Mais nul ne la pot acquerre.
Non obstant que mes compagnes
Veoye par ces champaignes
O leurs doulz amis deduire,
370 Nul ne pouoit mon cuer duire
Ad ce que l'amer empreisse
Ne qu'aultre vie appreïsse
Que celle qu'aprise avoie.
Qu'estoit amer ne savoie
375 N'aprendre ne le vouloie,
Ne de riens ne me doloie.
Tout mon soing ert de berbis
Garder parmi ces herbis
Et ces flours par prez cueillir
380 En may, ne un seul jour faillir
On ne veist, main ne ressie,
Que chappellet de soussie
Ne meisse ou de passeroses
Ou de muguet ou de roses
385 Ou d'aultres flours plus nouvelles.
Ces pastoureaulx leurs nouvelles
Me venoient raconter
Et pour mieulx mon cuer domter
Nouvellès dons m'aportoyent:
390 Ceinturetes ou estoient
Pendans bourses et couteaulx,
Et aultres soubz leurs manteaulx,
Chappellez vers, devisez
Gentement, moult desguisez,
395 Me presentoient en don;
Et vous y veissiez adon
Varlez descendens d'un tertre,
Qui maton, formage et tartre
M'aportoient ou flamiche;
400 Pomes, poires, blanche miche
Me venoient presenter,
Et de leurs maulx guermenter
Piteusement se penoient,
Et près de moy se tenoient
405 Pour moy servir, s'eusse chier
Leur servise, ou pour trenchier
Devant moy pain et fromage.
L'un me disoit: «C'est dommage,
Marotele, se tu n'aimes
410 Je te pry qu'ami me claimes,
Pastourele gente et belle,
Ne soiez vers moy si felle.»
L'autre disoit: «Doulce amie,
Et ne m'aimeras tu mie
415 Quant je suis ton chier ami?
Tu vois que, s'un seul demi
Pain avoie, la moitié
T'en donroye a cuer haitié.
Aime moy, fillete doulce,
420 Je te donray une bourse
Jolie d'or et de soye.»
Ainsi alors ne pensoie
Nulle riens qui me grevast,
N'il ne fust riens qui levast
425 De moy parole d'acort
D'amer, pour tout leur recort.
A tous faisoie response
Que pour neant tel semonse
M'aloient amonnestant;
430 Si s'en souffrissent atant,
Car amer par tel devise
Ne vouldroie en nulle guise.
En ce point longuement fus
Faisant de m'amour reffus
435 Et dongier a toute gent;
Tant fussent preux, bel ou gent,
Pou m'estoit de leurs clamours.
Orgueilleusete d'amours
On m'appelloit pour le temps;
440 Mais je vous diray par temps
Coment Amours s'en venga,
Qui bien mon vouloir changa,
Combien qu'il m'estoit avis
Que tant eust homme cler vis,
445 Gent corps, beaulté ne valour,
N'aimeroie, ains grant folour
Me sembloit d'ainsi amer
Pour en sentir doulz n'amer.
Or diray je que m'avint,
450 Il n'a mie des ans vint,
Ains croy que quatre ans passez
N'a mie encore d'assez:
Un jour en l'ombre seoie
Soubz un chaine et asseoie
455 Un vert jolis chappellet
Dessus mon chief crespellet,
Sus une fontaine belle.
Et comme d'amours rebelle
Vouloye la seulete estre;
460 Ou lieu avoit moult bel estre,
Bois fueillu tout environ
Et l'erbe jusqu'au giron,
Par placetes drue et basse;
De flouretes a grant masse
465 Diverses ot et planté,
Sus la fontaine planté
Arbres beaulz de moult belle ombre
Que soleil ne feist encombre.
Mes berbietes gardant,
470 La seoie en regardant
Les floretes que cueilloye,
Qu'en la fontaine mouilloie,
Et de haulte voix serie
Chantoye si que l'orie
475 Du boys en retentissoit.
Droit a celle heure passoit
Par le grant chemin ferré,
Qui ert lez le bois querré,
Une grant tourbe de gens
480 Sus chevaulx mignoz et gens
Qui entendirent le son
Et le dit de ma chançon.
Adonc se sont arrestez
Et ou boys, y ot de telz,
485 Entrerent, suivant la voix
Du chant queroient ou bois,
Mais ne m'ont pas tost trouvée,
Car le boys fueillu leur vée;
Mais moy, qui fus seule en crainte,
490 Des chevaulx ouÿ la frainte
Qui par le bois se hastoient
Et ja près de moy estoient,
Tout ne me veissent ilz mie.
Adonc la char me fremie
495 De paour, si me tins coye
Et du tout mon chant acoye.
Au chief de piece tant firent
Ceulz qui en riens ne meffirent
Que dessus la fontenelle
500 Me trouverent; voix ysnele
N'oz pas a les saluer,
Ainçoys, sans moy remuer,
Me tins assise et honteuse
Et de baudour souffraiteuse.
505 Tremblant et rougie ou vis
Je devins quant je les vis,
Car je n'oz gens de tel pris
A veoir souvent apris:
Frains dorez, selles couvertes
510 Avoyent blanches et vertes
Et de diverses couleurs
Faittes aux devises leurs.
Dessus gros chevaulx mignos
Et sus genez espagnolx
515 Montez estoient li ber,
Plus gentilz que nul ober,
Riches robes et trainans,
Vestues trés avenans,
D'or et de soye brodées
520 Et a devises bandées,
L'une d'or, l'autre d'argent,
Escharpes qui bel et gent
Leur estoient avenans,
Dont les cliquetes sonnans
525 Tout le boys retentissoient
Pour les sons qui en yssoient,
Chappeaulx jolis de festus
Sus leurs chaperons vestus
Avoyent jusques a l'ueil
530 Pour l'arsure du soleil.
Moult furent bien assesmez
Les gentilz hommes amez,
Beaulx et gens a droit souhaid,
Gracieux et de bon hait.
535 Adonc assembla la route
Ou mainte haye fu route
Pour venir a l'assemblée
Ou sans cause fus troublée.
Lors, comme frans, sans orgueil,
540 Tous descendirent ou brueil.
Or me tins je pour surprise,
Bien cuiday morte estre ou prise.
Vers moy adreçant leur pas
Tous ensemble isnel le pas
545 Distrent a joyeuse chiere:
«Dieux vous gard, doulce bergiere.»
Et je honteuse et tremblant
Me lieve a couart semblant;
Si com je sceus leur rendi
550 Leur salu, plus n'atendi
Mais loings fus plus d'une toyse.
En celle route courtoise
Ot un si fait chevalier
Que, s'ilz fussent un millier,
555 Si passast il, com moy semble,
Trestous les aultres ensemble
De valeur, de sens, de pris
Et de quanque bien apris
Doit avoir en tous endrois.
560 Beauls et gens, jolis et drois
Fu dessus les aultres tous,
Et me semble que trestous
L'appelloient Monseigneur,
Dont vi qu'il ert le greigneur
565 Et le plus autorisié.
La un chevalier prisié
S'avance et me prist a dire:
«Pastoure, paour n'ayez n'yre,
Car vous n'arez se bien non
570 Par nous.» Lors nomma par nom
Cil qui les autres passoit
Et dist: «Par cy trespassoit
Monseigneur que voiez cy
Et sa compagnie aussi.
575 Si chantiez, ce m'est avis,
Bel et bien a droit devis
De haulte voix deliée,
Pour ce vostre chiere liée
Moult desira a veoir
580 Et decoustes vous seoir
Pour vostre doulz chant ouïr.
Si ne nous pouez fouïr:
Chanter il vous convendra
Dont ja mal ne vous vendra.»
585 Adonc vers cellui me meine
Qui Dieu doint bonne sepmaine,
Et je humblement m'encline
Devant lui la chiere cline,
Si le saluay tout bas,
590 Mais cellui fist un grant pas
Et tost relever me vint,
Un doulz ris qui lui avint
Gitta moult joyeusement
Et dist gracieusement:
595 «Et, par Saint Sauveur d'Esture
Voycy joyeuse aventure!»
Adonc sus l'erbe menue
S'assist et par la main nue
Me prist et decouste lui
600 M'assist, si n'y ot cellui
Qui ne se soit tost assis.
Adonc des foys plus de six
Me pria que je chantasse
Hault et cler, riens ne doubtasse,
605 Mais longuement m'excusay
De chanter, car je n'osay.
Cil dist: «Doulce, pastourele,
N'escondissez la querelle
Que vous fais, ainçois chantez
610 La chançon que plus hantez.»
Quant vis la grant courtoisie
De ceulz, aucques acoisie
Fut la paour qu'eue avoye;
Si m'asseuray toutevoye
615 Et dis a cil, qui rioit
Doulcement et me prioit,
Que par son commandement
Chanteroye ysnelement,
Mais en gré le voulsist prendre,
620 Car moult y ot a reprendre.
Lors a chanter commençay
La chançon que je pensay
Qui la plus nouvelle estoit
Et qui le mieulx me goustoit.
625 Si vous diray la chançon
Dont ouÿrent du chant son:
_Bergierette_
Il n'est si jolis mestier
Com de mener en pasture
Ces aigneaulx sus la verdure,
630 Jamais faire aultre ne quier.
Qui verroit ces bergieretes
Et ces jolis pastoureaulx
Entr'amer par amouretes
Et faire de flours chapeaulz,
635 Il diroit qu'il n'est sentier
Ne voye qui soit si pure,
Jamais d'aultre n'aroit cure,
Si s'en vouldroit accointier.
Il n'est si jolis mestier.
640 Ces pastours o leurs chevretes
Au joli chant des oysiaulx
Vous dient ces bergieretes
Et ces beaulx motez nouveaulx,
Et aiment de cuer entier,
645 Au son de leur turelure
Dançant tant comme esté dure,
D'autre joye n'ont mestier.
Il n'est si joli mestier.
Ainsi ma chançon finay
650 Et devant cil m'enclinay
Qui de chanter m'ot requise.
Mon chant loua de grant guise
De son bien et de sa grace,
Si m'en sceut et gré et grace
655 Et bien m'en remercia,
Et dist: «Pastoure, cy a
Maint gentil homme vaillant,
Si ne soyez deffaillant
D'encore une a leur requeste
660 Chanter, vous l'arez tost preste,
S'il vous plaist, en petit d'oure,
Or chantez, doulce pastoure.»
Adonc pour leur vueil perfaire
Plus prier ne me voulz faire,
665 Si chantay joliement
Ceste chançon liement:
_Bergierete_
Au joly bousquet
Vont ces pastoureles
Cueillir du muguet.
670 Chappellet de flours
Font a leurs amis,
Par fines amours
Ou chief leur ont mis.
La font maint hocquet
675 O leurs chalemeles
Parrot et Huguet,
Au joly bousquet.